¹ Amaro timuru shibi, Ananias ogomo ti priest, nan ana ŋono, nan u lauya se a gusan me Tertullus ŋa wame a gemme. Ano a giya ŋaa ra nan a gaŋgaŋ aza Paule əji gumina. ² Uca ogeme se Paule yere o tore əji gumina, enze Tertullus me ubiyə agaŋgaŋ aza a hame enze ma goŋ u gumina, "Baka ŋŋo woro ze gayan, konzen baka uru ituma ehe na ra nan u mamara tegogoro kima an nyaŋa; ³ baka nane woro ra gusaŋ ŋo kukwan cebete konzen woro na ka zale tegogoro te geme se ŋo ra wuza me, nan tegomo a te Felix. ⁴ Baka tago in mənti a rigiya konzen ne, na saŋare da u kunan bate nan telo. ⁵ Baka woro na mura ono u giya manze ono u sarma nan ono u kaŋgursa u wara ano Jews a masano mame kweren. Manze ono u səru o rekero ri Nazareth. ⁶ Ma gaŋ ŋuna a warna ugura Ədəshəri, baka nane ze woro wa me me. ⁷ Konzen ono usəru Lisiyas ma ra ma kwakale me a tare a tedo nan agata, ⁸ Ngase u saŋare Paule a za zale nlen ma giya, ŋo ra ru mi se a gaŋgaŋ a giya se woro nə biyǝ aza hame nane ze." ⁹ Ti Jews timi konzen ta gurna a gaŋgaŋ, se nane ze a gaŋgaŋ a giya wa ze gaŋgaŋ ze. ¹⁰ Konzen Se u gumina wa goŋ Paule ə mə bǝnu, Paule gare, "Na ru se nan siwai cebete ŋo na dakano ə biyə nlen an nyaŋa ma giya, baka nane min ze nan u runtu birwa da min bii a ŋo eme geme se min ru. ¹¹ Ngase ŋo nin date u giŋəri, i dan wake timuru rikuri ni se in wa nyana ənyimi Jeruselem dan ka gurwənə. ¹² Se ŋa muran ənyimi ugura Ədəshəri, Min wata meshe magita nan owe ne, konzen in wata gursa riyǝgǝ ni, né ənyimi Synagogues, né ənyimi ape. ¹³ Ŋa dan buki a ŋo isana a gaŋgaŋ a geme se min wa biyə se wagiya ŋa ra wuza me aza a haŋ ne. ¹⁴ Konzen na gara igiya a ŋo, se aza uruna ogeme se ŋana tisa riyǝgǝ, take uruna ogemme me ze min wuza ituma Ədəshəri awanaco ahodo. Min gare konzen in wuza zale eme geme se ira ənyimi makiri nan emegeme se atuma wa darse. ¹⁵ In ze nan itəndəsi ənyimi Ədəshəri uga ano agiya, se ara ra a yisiza kweren ano magaŋgaŋ nan ano riwuza ri buru. ¹⁶ Enze ŋuna se min ra conno da in cikǝ nan birwa bi saŋsaŋ əji Ədəshəri nan ano. ¹⁷ Wagiya amaro siwai cebete in wa ra nan ti mala a anon nyaŋa man nan u ŋiza iru. ¹⁸ Ngase in wuza nane, te ti Jews əsuru a Asia ta muran ara u gurna u visiku ara ənyimi ugura Ədəshəri, dan nan riyǝgǝ né hauwo ne. ¹⁹ Ano ageme ŋa ta ze a rigiya wagiya enze ŋa buki eme geme se ŋa ze nan no aza a haŋ, ngase ŋa ze nan iyabo. ²⁰ Né nni, ano a giya me ŋanin buku eme woro egeme se ŋa mura i mi se in wa yere in tore əji ano cikə u tidara u ti Jews, ²¹ irənu eze aza iyabo evento igiya se in wa yiza remelo ənu se in wa yere ntore ənyimi a haŋe, 'Eze aza u yira ano wənə se enze ara biyə o hoŋ nlen ənu a ŋo əji kane."' ²² Enze Felix, ono ogeme se ə ruku biyə mi a me ma ze nan uru aza Uruna, enze ma shenke u kunan nlen ma me. Ma go, "Uca ogome se Lysias u kumanda wa ra əsuru a Jeruselem, Min ra wuza adodonzo aza nlen ŋa mai. ²³ Enze ma goŋ ono usəru ti suja se Paul ma nin ka kayya me ara rinyaŋana, konzen a nyame rərə baka tago a kate arene u rasa nan eme geme se ma ra barsa me ne. ²⁴ Amaro te Timuru, Felix wa kuri nan Drusilla uwai o home, ugalla ti Jews, enze ma tome a rame nan Paule enze ma kone ame epe u yiya birwa ənyimi Yeso Ukase. ²⁵ Konzen uca ogeme se Paule wa bənu nan me aza ma gaŋgaŋ, uməntə rete, nan epe ətiyə u biyǝn nlen, Felix kuna iwi enze ma go, "Da waŋ yəi. Konzen ngase se in mura rərə dan nan udakano ne, ra tuma a ŋo." ²⁶ Uca ogomme, maa ra yisa birwa se Paule ra nyo home iru, baka nane ma basa ma tome a me enze mǝ bǝnu nan me. ²⁷ Bata se siwai se repo sa wake, Porcius Festus mə cikə u gumina a maro Felix, konzen Felix wara barsa da ma mura mənyi a ti Jews, enze ma deke Paule a tare ta nyaŋana.