¹ Paule ma yiza əji mə nəri ano u cikǝ u tidara enze ma go, "Ayeno, Na cikǝ nan Ədəshəri ənyimi zale riwuza a zene u ra a kane." ² U priest u səru Ananias ma goŋ ano ageme se ŋa ra tore voto nan me a ŋa tere me anu. ³ Enze Paul gomme, "Ədəshəri ra tere o hoi, ŋo ra kpiji u piŋəri. Ŋo ra cikə da ŋo biyən nlen nan makiri, konzen u nyakan da a tərun, aza makiri?" ⁴ Ano tore a lake ŋa go, "Nane ze ŋŋo nin tara u priest u səru u Ədəshəri nlen?" ⁵ Paule go, "Mmi in dan ru ni, ayeno, se mme u priest u səru zi ni. Bakase eze nan udarsa, Tago u bii iyabo iburu aza ono u məntə u huŋi ni." ⁶ Se Paule nəri ulu vento me u ano cikə u tidara ti Sadducees tenze konzen a daŋara me ti Pharisees, enze ma yiza remelo mə bǝnu nan a gata ənyimi u tidara me, "Ayeno, mmi u Pharisee zi, vana u ti Pharisees. Baka se min ze təndəsi a pa u yiza ano u wənə se enze a raa biyə o hoŋ nlen aza me." ⁷ Se ma go nane enze magita ma yere ənyimi ti Pharisees nan ti Sadducees, konzen ri yǝgǝ ra ano re me ra warna. ⁸ Baka ti Sadducees ti go u yizan ano u wənə dəmənu ni, né ti maleka, konzen né uvunu, bata ti Pharisees ta gare nan nane kweren. ⁹ Enze ara yere hauwo, konzen a daŋara ano bezezze a ti Pharisees yere ŋa tore a meshe magita, a gusa, "Woro dan ni ara o worko ono uja ne, iyaze ngase uvunu né u maleka nə bənu nan me?" ¹⁰ Se magita ma yira cebete, ogomo ti kaptin kuna iwi se ŋanin darsa Paule a kwata akwata me baka ŋe, enze ma buku a ti suja a ti tu ti ka yita me nan agata ənyimi ano u cikǝ u tidara me, da ŋa ra nan me ənyimi u gura. ¹¹ Ətiyə u tarse me nan ətittiyə Aco wa tore a laken me enze ma go, "Tago u kuna iwi ni, uga nane se ŋo na bənu aza haŋ ənyimi Jerusalem, take nane ze ŋŋo konzen u ra ka biyǝ mi ənyimi Rome." ¹² Se ara wa sane, adaŋara ti Jews wa gura ǝnu nan o tono tago ŋa wushu né ŋa shi iyabo ne, se ŋana wuna Paule. ¹³ Ano wa kira ituru naze ano ageme se ŋa gura ǝnu. ¹⁴ Ŋa wame ogomo ti priests nan ano a ŋono enze ŋa go, "Woro na ŋuna ate a hado ənu, idama wushu iyabo ne se woro na wuna Paule. ¹⁵ Wagiya, deke ano u cikǝ u tidara buki a ogomo kaptin da ma duti mi iŋi, uga ŋa ra nara u kuru kunan nlen mame kima. A ehodo, woro na goro da ewoo me bata ma rai a rigiya." ¹⁶ Konzen vana u wanome Paule ma kuna se ŋa tete da ŋa pa me, nane ze ma wame enze ma ka pete u gura ma buku a Paule. ¹⁷ Paule tisa owe ənyimi ti suja teme, "waŋ nan ono maŋina ma giya ogomo kaptin, bakase maze nan imu buku ame." ¹⁸ Nane ze u suja me yete ono maŋina ma me nze ma ra nan me ogomo Kaptin enze ma go, "Paule ono u nyan na tisan a wame ame, kk ma goŋ mi a min ra nan ono maŋina a ŋo." ¹⁹ Enze ogomo kaptin ma yete me ma me me uware ŋa wame a rekero enze ma saŋare me, "Iyammo ze ŋo ra nara u ta buki imi?" ²⁰ Enze ono maŋina me go, "Ti Jews tina gara da ti saŋare ŋi da ŋi duti Paule nan ŋəru u tidara, uga ŋa ra vati u saŋara o home aza nlen ŋa mame. ²¹ Konzen tago i nyaka me a ŋe ne, bakase ano ageme se a kira ituru naze ŋana tete binyaŋa da ŋa woo me. Ŋa na təsə nan ate a haŋe, ŋa dama wushu né ŋa shi ni se ŋa na wuna me. Wagiya ŋana goro, ŋa ra pa da ŋa kone iŋi." ²² Enze ogomo kaptin mi ma deke ono maŋina me dura, amaro se mana buku ame, "Tago u buki owe se ŋo na buku enlen ma giya imi ni." ²³ Enze ma tisa me ti suja te repo mago, "Mura ti suja sinu se repo da ti wame peu uga Caesarea, nan ano ibarko ituru sunare konzen, nan ano agwene sinu se repo. Ŋi ra deke a rigiya nan uca iru itaro nan ətittiyə." ²⁴ Konzen ma buki a ŋe a ŋa mura ibarko egeme se Paule nin nyana, da a mura a waŋ nan me shammo a Felix u gumina. ²⁵ Enze ma darse u takarda uga nna: ²⁶ "Claudius Lysias a waŋa ono u səru u gumina Felix, kukwan. ²⁷ Ono ugiya ti Jews ta me me konzen ŋa raa nara u wuna ome nan ate a haŋe, uca ogeme se in wa rai aza a haŋe nan ti suja enze in zuzi mi, in wa ra se in ru onon nyaŋa ma Roman manze. ²⁸ In wara nara in ta ru baka iyaze ŋa me me, enze in waŋ nan me u tidara o hoŋe. ²⁹ Enze in ru Se ŋa ra tinziza ome aza u saŋara epe makiri a maŋe, konzen iyabo wata rǝnu aza hame se e deŋe u wənə né a ŋuna me inyan ne. ³⁰ Enze bata ŋa buki imi ago ŋana gura ǝnu aza ono me, enze na ŋuna se na tuma nan me a ŋo sasa, konzen na buku a ano u tinziza o home a ŋa ra nan macara a ma me a ŋo. Cikǝ shammo." ³¹ Nane ze ti suja ta tarse eme geme se mǝ buki aŋe. Ŋa yete Paule ŋa ra nan me a Antipatris nan ətittiyə. ³² Ara wa sane, ti suja teme cebete ta deke ano ibarko ŋa wame nan me konzen ŋŋe nan ate ahaŋe ŋa kuru a ran tuma maŋe. ³³ Se ano ibarko wa deŋe a Caesarea ŋa nyaka rituma ri utakarda a u gumina, enze ŋa nyame Paule konzen. ³⁴ Se u gumina wa bare u takarda, ma saŋare a iya ulu un nyaŋa manze Paule wa ka suru ənu. Se ma ru se maa suru a Cilicia, ³⁵ ma go, "Ra kuna o hoi kima nga se anon nlen ŋa mai ra a rigiya." Enze ma buki a yiya me ənyimi a kura əsəru a Herod.