¹ Se ətiyə Pentecost wa rai, zale o hoŋe ŋa ra revento. ² Aregemme enze uvunu tu əsuru ədəshəri a gurumu nan ukara uga u nyana rikumu, enze u binja zale akura me aregeme se ŋa ra cikǝ ənu. ³ Enze nlen ma yonko a ŋe uga ura ogome se a warse, konzen ŋa cikǝ aza kuyyu ono. ⁴ Ŋa binja nan Uvunu u saŋsaŋ enze ŋa me u bənu eboze keken, nane se Uvunu na nyaŋe ŋa biyǝ. ⁵ Wagiya ara me aze nan ti Jews ano a geme se ŋa ze nan u cikǝ ənyimi Jerusalem, ano u kuna iwi Ədəshəri, ǝsuru a kuyan nyaŋa ǝnyimi ǝdǝshǝri . ⁶ Se ŋa kuna ugara ogeme, ano u nannai me ŋa gurna enze imamme wuna ŋe buu baka ano zale ŋa kuna ŋe əbənu nan eboze e heŋe. ⁷ Ŋa kerkene nan iwi; Ŋa go, "Dan dondon zale ano agiya se ŋa biyǝ eboze Galilee ze ne? ⁸ Baka iya ze woro ra kunuza o hoŋe, kuyyono ənyimi eboze e hedo egeme se aa yoo so do ənyimmi? ⁹ Ti Parthians nan ti Medes nan ti Elamites, nan ano a geme se ŋa ze nan u cikǝ a Mesopotamia, ənyimi Judea nan Cappadocia, ənyimi Pontus nan Asia, ¹⁰ Phrygia nan Pamphylia, a Egypt nan u daŋara ti rara ti Lybia a wame a Cyrene, nan agen əsuru a Rome, ¹¹ ti Jews nan ti Proselytes, ti Critans nan ti Arabians woro na kuna ŋe əbiyə mi aza dondon ituma iwə Ədəshəri." ¹² Zale ŋa kuna iwi konzen ŋa kerkene; ŋa goŋ ate a haŋe, "Iyaze imi giya?" ¹³ Nane ze awe wa gəlli ŋi ŋa Konzen ŋa go, "Ŋa naa shə manyi mi buri ma sau manze." ¹⁴ Enze Peter ma yere ma tore nan ka beren, ŋa yiza amelo a haŋe, enze ma goŋ ŋe, "Ano a Judea nan zale u huŋi ano u cikǝ a Jeruselem, deke a ŋi ru igiya; kuna ni amelo agiya a haŋ kima. ¹⁵ Baka ano agiya ŋa dan shiyə iyabo uga nane se ŋi ra adodonzo me ne, baka, oyere iru itaro ze base. ¹⁶ Bata igiya enze ə buki əsuru a utuma Joel: ¹⁷ 'Inin cikǝ ǝnhimi timuru tu maso masano,' Ədəshəri go, 'Ra kuŋku uvunu o hoŋ aza ano kusun. Abiya nan agalla əhəŋi ŋa ra biyə eme geme se a da was nii ni, ano maŋina ŋa ra nərə mi a tero, konzen ano a ŋono ŋa ra wuza tero. ¹⁸ Konzen aza a rere a haŋ nan awai arere a haŋ nan u dakano Ra kuŋku Uvunu o hoŋ, konzen ŋa ra biyə nlen ma geme se na ŋuna a ŋe da ŋa biyǝ. ¹⁹ Ra beze u huŋi imi iwi ədəshəri nan ti runa an nyaŋa a garwa, mənyi, ura,nan iŋshəmu. ²⁰ Oŋmwe ra ura waŋaro mǝri Konzen u bǝrmǝ u cikǝ mǝnyi, bata ǝtiyǝ ǝsǝru nan uca ogeme se a yiya bata Aco rai. ²¹ Isaze nane ze se ano a geme se kweren ŋa tisa a riji ra Aco ara kawo ŋe.' ²² Ano arome a Isreal, kuna nlen magiya: Yeso ono Nazareth, dondoŋ ono ogeme se Ədəshəri wa yonke ŋi baka ri wuza re tegogoro ti səssəru, ti iwi nan obezezze ti runa te geme se Ədəshəri wa woze aa me ənyimi əhəŋi, uga nane se ŋi ru. ²³ Ono u giya a nyaka me nane ze Ədəshəri wa yiya nan uru o home ze a wuza; nan ŋŋi, nan tare ti ano u dira u ru makiri, ŋuna me u uwənə se a dase me u titi. ²⁴ Konzen Ədəshəri yiza me, ə zuzi mi a ma kpai mu wənə, bakase iwa taa ŋuna u me me ne. ²⁵ Baka David wa biyə epe heme, 'In wazen nəri Aco iimi əji kuyu uca, baka ma ra uware bilai abon baka tago ə zuzun ni. ²⁶ Baka nane birwa bon ba ze pau konzen nlen ŋa maŋ mə biyə izalla. Konzen, ripun ŋa ron rə cikǝ təndəsi. ²⁷ Baka nane u tan deke bewo abon bi wame a Hades ne, ne o deke ono u sansan o hoi mə nəri uwishu. ²⁸ Uwa pəni imi ti runa ti ruma; u ra a ŋuna o hoŋ in binja nan birwa bi run baka mmwinyu a mai.' ²⁹ Ayeno, Nin bənu nan ŋi təndəsi aza onoŋono David: mə wənə konzen a wase me, konzen isau eheme zenan woro a ra a Kane. ³⁰ Nan nane, ma aze utuma Ədəshəri konzen ma ru se Ədəshəri ma atono nan otono aa me, se ma ra a tura bi buri bi ripun ŋa reme aza ridirəŋ a reme. ³¹ Mə nǝrǝ igiya enze ma bǝnu aza u yira u Ukase, 'A taa kini mi ma wame a Hades ne, nee a deke ripun ŋa reme ri nǝri iwishu.' ³² Yeso u giya—Ədəshəri wa yiza me, woro zale iwə nǝri. ³³ Nane se a yiza me a waŋa bilai bə Ədəshəri nan nane se ma kai u buku Uvunu u saŋsaŋ əsuru a Dada, ma kuŋki igiya əkəi, se ŋi nari konzen i kuna. ³⁴ Baka David wa ta nyana Ədəshəri ne, bata ma gose, 'Aco me goŋ Aco ohoŋ, "Cikǝ u ware bilai a boŋ, ³⁵ Se Na ŋuna ano u nyamene u huŋi urako u tara atau a hai."' ³⁶ Baka nane, deke a kura Isreal ŋa ru zale nan birwa be vento se Ədəshəri wa ŋuna me manze Aco nan Ukase, Yeso u giya se ŋi wa gape." ³⁷ Wagiya se ŋa kuna nane, ŋa kuna ana tiya ŋe iruwa e heŋe, enze ma goŋ Peter nan a daŋara ano ituma me, "Ayeno, iyaze woro nin ŋuna?" ³⁸ Enze Peter goŋ ŋe, "ka ni, e deke macara məŋi konzen e zoro, kuya ono, ənyimi riji ri Yeso Ukase baka o deke macara məŋi, konzen ŋi ra ka ənəwə a Uvunu u saŋsaŋ. ³⁹ Egeme se ə buki a ra iŋi konzen a ra abiya nan zale ano a geme se ŋa ra yayau geten, ano cebete nane se Aco Ədəshəri a hado nin tisa." ⁴⁰ Nan udaŋara agaŋgaŋ cebete ma buki ame konzen ma vale ŋe; ma go, "Ka rete a re ǝsuru ǝnyimi rimiza ri buru rigiya." ⁴¹ Enze ŋa kai eboze e heme konzen a zoro ŋe, konzen ǝ vǝti ano u tarse ohome ǝnu ǝtiyǝ agemme uga ti guu ti taro. ⁴² Ŋa wushu ǝji nan obezezze nan ugurnaza, a pusa oborode nan ǝnyimi taye. ⁴³ Iwi wa tunu aza kuyya ruma, enze ano ituma Yeso wuza tegoro cebete se ta nya ano iwi. ⁴⁴ Zale ano a geme se ŋa yiya birwa ŋa ze nan ŋe konzen ŋa wuza tegogoro ara a vento, ⁴⁵ ŋa rəsi tommo nan eme geme se ŋa ze nan no enze ŋa ware zale a ŋe əpun, nane se ono rə giŋərə mi. ⁴⁶ Amaro ətiyǝ a vento ŋa tore aza iyabo evento da ŋa wuza ituma nan no ənyimi ugura Ədəshəri, enze ŋa pose aborode ənyimi ti titau, enze ŋa ware imu wushu nan izalla nan ijai a ŋe iruwa; ⁴⁷ ŋa tuŋare Ədəshəri nan u mala ano zale. Kuyya oŋmwe Aco ǝ vǝrǝ ano a za ano a geme se ŋa ware u ka me.