¹ Uwu darsa se in wa darse, Theophilus, wa buki kweren emegeme se Yeso wa bura u wuza me nan obezezze me, ² a waŋa uca ogeme se a yita me, amaro a geme se a yita me, se ma mase ubuku agaŋgaŋ ǝsuru uvunu u saŋsaŋ a waŋa ano a geme se ma zake ŋe da ŋa yisun nlen. ³ Amaro u shǝ makpai a mame, ma yonke rete a reme a ŋe nan ruma nan ti lǝmu te geme se ŋa nin gara se manze. Ənyimi timuru ituru naze ze ma beze rete a reme a ŋe, konzen mǝ bǝnu aza epe te gomo tǝ Ədǝshǝri. ⁴ Se mara a gurna nan ŋe, enze ma buki a ŋe tago ŋa deke Jeruselem ne, da ŋa cikǝ ŋa pa rituma regeme se Aco wa buki a ŋe, aza epe egeme se, ma go, "Ŋi wa kone əsuru imi ⁵ se Jone nane ze ma zore ŋi nan manyi, nane ze ara zoro u huŋi nan uvunu u saŋsaŋ ənyimi timuru kakkapo." ⁶ Uca ogome se ŋa gurna enze ŋa saŋare me, "Aco, uca ugiya ze ŋo ra kursu Isreal te gomo a teŋe? ⁷ Ma goŋ ŋe, " Dan ihiŋi zi ŋi ru uca ogeme se Aco na yiya baka nan agata ame. ⁸ Konzen ŋi ka a gata, uca ogeme se Uvunu U saŋsaŋ u ra tunu aza ǝhǝŋi, enze ŋi nin cikǝ ano u yisun nlen ŋa maŋ ǝnyimi Jeruselem zale nan ənyimi Judea zale nan Samaria, konzen a waŋa u maso un nyaŋa. " ⁹ Uca ogome se Yeso Aco ma mase u biyǝ te gogoro ti giya, se ŋa da ə nərə ədəshəri, enze owero Kate əji a haŋe. ¹⁰ Se ŋa da ə nərə ədəshəri dondon nane se ma ra ŋana, ara agemme, enze an ka repo tore a laken ŋe ənyimi tommo ti run. ¹¹ Ŋa go, "ŋŋi ano Galilee, baka iya ze ŋi na tore a rigiya ə nərə ədəshəri? Yeso u giya se ana yita ənyimi ə həŋi a waŋa ədəshəri, nane ze ma ra kuru uga nane se ŋi na nəri mi a wame ənyimi ədəshəri." ¹² Enze ŋa kuri a Jeruselem əsuru ɔwɔɔ u Olives, se oze voto nan Jerusalem, tano to yere ətiyə o vonke. ¹³ Se ŋa deŋe, enze ŋa nya ənyimi ugura uwa aza, ara a geme se ŋa ra cikǝ ənu. Ŋa ze Peter, Jone, Jamese, Anduru, Philip, Thomas, Bartholomew, Matthew, vana u Jamese u Alphaeus, Simon uzealot, nan Judas vana u Jamese. ¹⁴ Zale ŋa gura ate uga ono vento, ŋa ŋuna iruwa a taye kuyyuca. Ŋa gura nan awai, Mary əyin Yeso, nan ano wanome. ¹⁵ Ənyimi timuru te geme Peter wa tore ənyimi Ayeno, ano uga 120, ma go, ¹⁶ "Ayeno, iwa da i cikǝ kake se ere egeme se aa darse inin binja, se Uvunu Usaŋsaŋ wa buku nan u dakano əsuru ənu David epe Judas, ono ogeme se ma male ano me Yeso. ¹⁷ Se ma ze ono vento ənyimi a hado enze ma kai egeme se eze e heme ənyimi riburi ra ano u yisun nlen magita." ¹⁸ (Wagiya ma naa kwa uru ǝnyimi e heme egeme se maa ka baka riwuza reme ri buru, a regeme ma rizi əsuru ara a zagate geten, enze ripuŋa reme ri buzəru zale ti nyana to suru ti kuŋku. ¹⁹ Kweren ano a geme se ŋa ze nan u cikǝ a Jeruselem ŋa kone eme, enze ŋa tisa uwǝru mi "Akeldama," nane ze, "Uwǝru mǝnyi.") ²⁰ Nane ze ezen u darsa ənyimi u takarda u Psalm, 'Deke u wəru mi cikǝ ko iyabo, konzen tago o deke ono vento cikǝ ara me ne'; 'Owe keŋ ma yete ara ahame mə mənti.' ²¹ Eze kima, baka nane, ono vento ənyimi ano me se ma ŋanaze nan woro kuyyu uca kweren se Yeso Ukase wa ze nan mme ənu, mə suri mme nan woro, ²² ubura me ǝsuru ozoroso u Jone a waŋa ətiyə a geme se a yete me a woro, ono ogome se ma nii u yira ohome." ²³ Enze ŋa rai nan an ka repo, Joseph se a gosemme Barnabas, a gosemme konzen Justus, nan MattHias. ²⁴ Ŋa remmo Ədəshəri ŋa go, "Ŋŋo, Aco, u ruu zale iruwa ano, pərsi əvizi ənyimi an ka repo u giya se ŋo naa zaka ²⁵ da ma yita ənyimi u yisun nlen Konzen ono i ruma ehe egeme se Judas wa kini ma wame ara a hame a geme se ma zake." ²⁶ Enze ŋa wuza azazako, enze a gare aza Matthias, konzen enze ŋa biza me ənyimi ano ituma beren se ŋa ruku.