¹ Wagiya se ŋa wake ənyimi ape a Amphipolis nan Apollonia, ŋa ra ape a Thessalonica, ara ageme se Synagogue u ti Jews wa rənu. ² Paul, se riwuza reŋe renze ra ze, ma wame a ŋe, konzen ǝnyimi tittiyə te o vonke ti taro mme a bezezze ohoŋe ənyimi nlen ma me. ³ Ma ra pǝnizi ere nlen ma me konzen ǝbiyǝ mi nane se i waze kake daa Ukase ma shi kpai enze ma yere konzen ǝnyimi ano u wiju. Ma go, "Yeso u giya se min ra yisu mi iŋi manze Ukase me." ⁴ Adaŋara ti Jews a nyaŋe kpai enze ŋa ra ŋa mura Paul nan Silas, agura nan ano ti Greeks te geme se ta waŋaro cebete, nan awai ə səssəru dan bate ne. ⁵ Konzen ano udira uyiya birwa a ti Jews, se a yiza ŋe nan tinya, ŋa yete awe ano əburu əsuru atira ti ijamane, ŋa gura riyǝgǝ ra ano a ra avento, enze ŋa gura ape me a kukumuzu. Aa tinza akura Jason, Ŋa ra nara ŋa ta ra nan Paul nan Silas əkəi a ano. ⁶ Konzen uca ogeme se ŋa ta mura ŋe ne, ŋa duri Jason nan awe adaŋara reno reme a waŋa ano ə mumuru awa ape me, a riwa, "Ano agiya se ŋa na waŋara masano ma me ŋana ra a rigiya. ⁷ Ano agiya se Jason na ka ŋe riwuza reŋe rita ze garere nan emegeme se Caesar barse ne; ŋana guna ago oyo ogomo rənu—Yeso." ⁸ Riyǝgǝ nan ano əsəssəru ape me ŋa burkǝlu se ŋa kuna tegogoro ti giya. ⁹ Bata amaro se ano əsəssəru wa mura Jason enze adaŋara ŋa nyaka iru uga i rinyaŋana, enze a sope ŋe ŋa dura. ¹⁰ Nan ətittiyə agemme ayeno wa tome Paul nan Silas a Berea. Uca ogeme se ŋa deŋe a gemme, ŋa wame ənyimi Synagogue u ti Jews. ¹¹ Wagiya ano a giya waze nan u dutu rete ŋa kira ano ənyimi Thessalonica, bakase ŋa ka nlen ma me nan u guta u birwa, kuyyu uca ŋa gose nlen ma me ŋa nǝri né tegogoro teme ta ze nane me ze. ¹² Baka nane ano cebete wa kai, a gura ano ubuku a kone ənyimi awai ti Greeks nan anarome cebete. ¹³ Se ti Jews ti Thessalonica ta ru se Paule wara yisu nlen mǝ Ədəshəri a Berea konzen, enze ŋa wame a regemme ŋa burkǝli ano me nan betoi. ¹⁴ Enze aregemme, reno re tome Paule a ma wame udandale manyi, enze Silas nan Timothy cikǝ a rame. ¹⁵ Ano ageme se ŋa ra ŋana Konzen a tarse nan Paule ŋa yete me peu a wame ape a Athens. Se ŋa deke Paule a geme, enze ŋa kai rituma əsuru a me da Silas nan Timothy ŋa rai a me sasa. ¹⁶ Uca ogeme se Paule wa raa pa ohoŋe a nyimi Athens, se ma nəri əsumu enze uvunu o home dupa me a birwa a beme. ¹⁷ Enze ma me obezezze ti Jews ənyimi Synagogue nan a daŋara ano ageme se ŋa gurwǝzənə ə Ədəshəri, zale nan ti rara ti jamane nan ano ageme se a mura ŋe a ra me. ¹⁸ Enze konzen awe ano uruu a Epicurean nan Stoic ŋa mura me. Awe go, "Iyaze itidi igiya ra barsa ubuku mi?" Awe go, "Maze uga ono ogeme se ma tisiza ano a ŋa tarse ədəshəri a geme se ata ru ni," bakase mara yisu nlen ma Yeso nan u yira o home. ¹⁹ Ŋa ita Paule enze ŋa rai nan me a Areopagus, a gusa, "Woro nin date iru isana obezezze u sau ugiya se ŋo na rǝ biyə mi? ²⁰ Bakase ŋo na ra nan isana tegogoro ti gbau a tetoŋe a te do. Baka nane, woro ra barsa ita ru eme geme se tegogoro ti giya te ze." ²¹ (Wagiya zale ti Athenians nan agen a geme se ŋa ze nan u cikǝ a gemme ŋa care uca dan a wuza iyabo ne konzen dan a biyə né a kunuza iyabo i sau ne.) ²² Nane ze Paule wa yere o tore ənyimi a zate a ti Areopagus enze ma go, "Ŋŋi ano Athens, na nərə nane se ŋi ru u tarse me a kuyyu ulu. ²³ Nane ze in wa wake tenton enze in nəri tommo te geme se ŋi gurwǝzənə ənu, in wa mura ridirən nan igiya se a darse. "A waŋa Ədəshəri a geme se a taa ru ni," Baka iyaze ŋi gurwǝzənə ənyimi u dira uru, igiya na buki iŋi. ²⁴ Ədəshəri a geme se a wa ruza masano nan zale emegeme se ira nyimmi ma me, bakase manze Aco ə Ədəshəri nan anyaŋa, ma taa cinzənə ədirən ageme se ana piyǝ nan tare ne. ²⁵ Né a gurwəzənə baka eme tare ta ano, uga mara giŋǝrǝ iyabo, ngase mme nan rete a reme ma ŋiza ano ruma nan evonkene nan kuyammo. ²⁶ Əsuru ono vento ma ruza zale te pee pee ta ano da ŋa cikǝ o bene anyaŋa, se ma mase ogose uca nan aba konzen u wiya nyaŋa ma ti regeme se ŋa nin cikǝ ənu, ²⁷ baka da ŋa mura ŋa giŋərə Ədəshəri, né irənu ŋa nin giŋərə mi ŋa mura me. Bata ma taa ze geten nan woro ne. ²⁸ Baka ənyimi a hame woro ze nan ruma nan ovonkeze nan udima, uga nane se anyaŋan nlen ŋa mǝŋi ma go, 'woro konzen ituma eheme ze.' ²⁹ Baka nane, ngase woro ituma tare a teme tenze, i ta ze kima woro wuza adodonzo aza tommo ti umura uga ti gold, né ti silver, né azuwa—uruza tommo baka uru əsəssəku nan u nii ono. ³⁰ Baka nane Ədəshəri wa kuŋki macara uca u rilakere ri udira uru, konzen wagiya mana buku a kuyyo ono a ti rara zale a ŋa kai. ³¹ Eze nane bakase ma na yiya oŋmwe se ono ogeme se ma zake mara biyǝn nlen ma masano ənyimi gaŋgaŋ. Ədəshəri wa nyaka uru aza ono u giya ə kəvi baka u yira o home ənyimi ano u wiju." ³² Wagiya se ano Anthens wa kone u yira uwa ano ageme se ŋana wiju, adaŋara ŋa tinza Paule; konzen awe go, "woro ra kuna o hoi konzen aza eboze igiya." ³³ Amaro nane, Paul deke ŋe. ³⁴ Awe wa gurna ŋa kone me enze ŋa gare, agura nan Dionysius ono Areopagite, uwai se agusan me Damaris, konzen adaŋara nan ŋe.