¹ Paule konzen ma ra a Derbe nan Lystra; enze aregemme, uyu tuma se riji a reme a gusanno me Timothy wa ra a rame, vana uwai u Jew se ma yiya birwa; aco me waze u Greek. ² Ma ze ma deme nan reno kima uga ano ageme se ŋa ra Lystra nan Iconium. ³ Paule wa nara ŋa ta wuza tano nan me; enze ma yete me ma tuzi mi oshoro baka isana nlen ma ti Jews se ŋa ra ti rara te geme, bakase ŋa ruu zale Se aco me u Greek zi waze. ⁴ Se ŋa me uruna o pete ənyimi te pe, enze ŋa ŋiza ti church agaŋgaŋ ageme se ŋa naa darsa da ŋa tarse, agaŋgaŋ ageme se atuma nan ano aŋono wa darse ənyimi Jeruselem. ⁵ Nane ze ŋa wuza nan ti church enze ti ŋuna a gata ənyimi u yiya birwa konzen nŋe ə vərənu Kuyya ətiyə. ⁶ Paul nan ano a hame ŋa tarse ənyimin nyaŋa ma Phrygia nan Galatia, baka se Uvunu u Saŋsaŋ wata deke ŋe ŋa yisun nlen ənyimin nyaŋa ma Asia ne. ⁷ Uca ogeme se ŋa ra voto nan Mysia, ŋa gaŋ pete ənyimi Bithynia, enze Uvunu u Saŋsaŋ tuna ŋe. ⁸ Se ŋa ra waka a laken Mysia, enze ŋa tu ŋa ra ape a Troas. ⁹ Paul nan ətitiyə enze rituma ri ra ame ənyimi tero: ono Macedonia ma raa tore a rame, a tisiza o home a gusa, "Ra ənyimi Macedonia da u male do." ¹⁰ Uca ogeme se Paule wə nǝri uga tero teme enze iwa yere sasa igoro i wame a Macedonia, ina masa u yita me aga Ədəshəri na tisa do daa ika yisun nlen ma me a ŋe. ¹¹ Nan u mase ome okoŋgo u səru əsuru a Troas, woro meshe uruna cass a wame a Samothrace, ətiyə u tarse me i ra a Neapolis. ¹² Se i suri a regeme i wame a Philip, se anze ape a Macedonia, ape ageme se a kira iwuma ənyimin uwiyan nyaŋa konzen arere a Roman, enze i cikǝ a ape a geme timuru cebete. ¹³ Ətiye o vonke iwa suri əkəi iwame ulu rii, ageme ze woro wara a gusa inin ka ŋuna taye. Woro cikǝ a nyaŋa enze i bənu a awai ageme se ŋa tarse ŋe. ¹⁴ Uyu wai se a gusan me Lydia, ono u rǝsǝ te jebeto ǝsuru ape a Thyatira, ma gurwəzənə Ədəshəri, mme a kunuza ohodo. Aco wa pəni birwa beme da ma kuna nlen ma geme se Paule rə biyə mi. ¹⁵ Uca ogeme se mme nan ətitǝu a hame a zoro ŋe, ma ŋuna do, a gusa, "Ngase ŋi na biyən nlen, na iya bira a Aco, ra konzen i cikǝ ətitəu." Nze ma ŋuna do i pete kake. ¹⁶ Eme wa ra aza nane, se woro a wame ara taye, uyu galla se maze nan uvunu u nii tegogoro ti wagiya nan tə əji. Ma rase nan ano əsǝssǝru a hame nan ijamane cebete baka u biyǝ isana tegogoro te geme. ¹⁷ Uwai me a ŋanu tarseze Paule nan woro ə sənə, a gusa, "Ano a giya ano ituma ze iwo ogomo Ədəshəri. Ŋa ri ituma iwu yisu u huŋi uruna u mura ri kase." ¹⁸ Na wuza nane timuru cebete. Se Paule wa kuna ucərə əpuru nan me cebete, ma waŋaro enze ma goŋ uvunu mi, "Naa buku a ŋo ənyimi riji ri Yeso Ukase suru ənyimi ahame." Enze uwə suri ənyimi ahame. ¹⁹ Se ano ǝsǝssǝru a hame naa nǝrǝ nane se u runa u mura ohoŋe unaa dura, enze ŋa me Paule nan Silas ŋa wame nan ŋe ənyimi ara awi ijamane əji awa ano əsəssəru. ²⁰ Se ŋa ra nan ŋe ara u biyǝn nlen, ŋa go, "Ano a giya ŋa ra nan kaŋ gursa ape me. To Jews tenze. ²¹ Ŋa ra yisun nlen ma geme se ma dama ənyimi makiri mageme se ti Romans ti gare konzen ti wuza ituma nan no ne." ²² Enze riyǝgǝ ra ano re yere aza Paule nan Silas; ano u biyǝn nlen ma me ŋa darse tidii a ripuŋ ŋa reŋe enze ŋa ŋuna ətəri ŋi nan siwayaŋ. ²³ Se ŋa tari ŋi kima, enze ŋa biza ŋe ənyimi nyan enze ŋa buki ono inyan me a ma wuza rinyaŋana reŋe kima. ²⁴ Amaro se mana masa u kuna nane, enze ma biza ŋe peu ugura ǝnyimmi sasa ma biza atau a haŋe ənyimi okoŋgo. ²⁵ Nan bi zate bə ǝtitiyǝ Paule nan Silas ŋa ra taye nan u gusa irina Ədəshəri, adaŋara ano inyan me a kunuza o hoŋe. ²⁶ Aregemme awa kone a nyaŋa a zuu, zale biciti bi ugura inyan me a zuu; enze kweren ti rəkəi ti mi ti wə pənu, konze magwaiwa mə kəvi ma gwarso. ²⁷ Ono rinyana ma zeme an roo enze mǝ nǝri ti rəkəi ta akura inyaŋ me kusun nan u pəni; enze ma wuŋki uvira u pannon me, a nara u wuna rete a reme, adodonzo a hame ano inyan me nə suru ŋa wuri. ²⁸ Enze Paule jarame kpai, a gusa, "tago o wɔɔ rete a re ne, bakase woro rənu zale." ²⁹ Ono rinyaŋana ma tisa əpəni ura enze ma pete nan teson, konzen mana binja nan iwi, ma raa ma gara a nyaŋa əji Paule nan Silas, ³⁰ enze ma zuzi ŋi ma go, "Ano əsəssəru, iyaze mmi nin ŋuna kake nze mmura rikase?" ³¹ Ŋa go, "Yiya birwa a Yeso, Aco, enze ŋo ra mura ri kase, ŋŋo nan akura a hai." ³² Ŋa biyə nlen ma Aco a me, zale nan ano ənyimi a kura a hame. ³³ Enze ono rinyaŋana reme ma yete ŋe nan uca ogeme nan ətitiyə mi, enze ma kwiji terkwene a teŋe, enze mme nan zale a kura hame a wa zoro ŋe. ³⁴ Nane se ma ra nan Paule nan Silas ənyimi a kura a hame nze a raa nyaŋe imu wushu, birwa baa runtu mi kima nan kusun ano ageme se ŋa ze ano a kura a hame, nane se mana gara nan Ədəshəri. ³⁵ Wagiya se iwaze ara na sana, ano u biyǝn nlen ŋa tome a anyaŋana, a gusa, "deke ano ageme dura." ³⁶ Ono rinyaŋana ma ra ma buki nlen ma me a Paule, a gusa, "ano u biyǝn nlen ma me ŋa na tuma nan amelo i mi daa min deke ŋi i dura: Baka nane suru ni əkəi, konzen i wame shammo. ³⁷ Taken nane Paul goŋ ŋe, "a zate ano ŋa ti təri do ŋa ti ta saŋara do iyabo ne, né ita ze gaŋgaŋ woro ano Roman ze—enze ŋa ŋuna do ənyimi inyan. Ŋa ra nara ŋa ta sope do tii? Aban geme! A ŋa ra nan ate a haŋe ŋa zuzi do." ³⁸ Enze anyaŋana me ŋa ka buki rituma reme ano u biyǝn nlen ma me, konzen se ŋa kuna Paule nan Silas ano Roman ze, ŋa kuna iwi. ³⁹ Enze ano u biyǝn nlen ma me ŋa ra ŋa riwa izama a ŋe bata ŋa zuzi ŋi, aa saŋara o hoŋe a ŋa dura ŋa suri ape me. ⁴⁰ Enze Paule nan Silas ŋa wa suri inyan enze ŋa ra ətitəu a Lydia. Uca ogeme se Paule nan Silas wa nǝri a wanome, ŋa bənu nan ŋe enze ŋa deke ape me.