¹ Awe wa rai əsuru a Judea a waŋa Antioch enze ŋa mase ayeno, a gusa, "Se ana mamara ŋi uga nane se Moses wa buku a wuza, dan nane, ŋi dama mura ri kase ne." ² Igiya wa wuna Paul nan Barnabas ŋa pete a magita nan ŋe. Enze ŋa zake Paul nan Barnabas nan awe ənyimi a haŋe da ŋa wame a Jeruselem da ŋa ka gurna nan atuma nan ano aŋono aza u saŋara u giya. ³ Enze nŋe Konzen, se church na tuma ŋe, ŋa wake a Phoenicia nan Samaria enze ŋa buki u waŋaro u ano əpən. Ŋa ra nan izalla cebete a zale ano ayeno. ⁴ Uca ogeme se ŋa ra a Jeruselem. Church wa kai ŋe nan tare terepo nan atuma nan tenoŋo nze ŋa biyǝ zale tegogoro te geme se Ədəshəri wa wuza nan ŋe ⁵ Enze awe ano ageme se ŋa kai u giya biruwa, ano ageme se ŋa ra ǝnyimi ri buŋu ri ti Pharisees, ŋa yere ŋa tore ŋa go, "Eze kima a mamare ŋe konzen a buki a ŋe a ŋa tarse makiri ma Moses." ⁶ Enze a tuma nan te noŋono ŋa gurna ara vento da ŋa bǝnu aza nlen ma giya. ⁷ Amaro magita cebete, Peter wa yere o tore enze ma goŋ ŋe, "Reno, dan nan udakano ne uca u wuma se una waka, Ədəshəri wa wuna azazako ənyimə əhəŋi, se nan ənu a haŋ ano ǝpǝn ŋanin kuna remelo ren nlen, enze ŋa yiya biruwa. ⁸ Ədəshəri, ono o geme se ma ru biruwa, ma biyə a ŋe, ma nya ŋe Uvunu u Saŋsaŋ, uga nane se ma wuza a woro; ⁹ ma ŋuna ə cikə garere, ma ŋuna iruwa eheŋe i cikǝ saŋsaŋ baka u yiya biruwa. ¹⁰ Wagiya baka iya ze ŋi ra kunuza Ədəshəri, se ŋi ra nara utara utira a remelo ra atuma Yeso egeme se né anaco a hado né woro wa ta date i mutana nanno ne? ¹¹ Bata woro na yiya birwa se ara kawo ohodo baka ogwene o Yeso Ukase, uga nane se ŋa ze." ¹² Kusun riyǝgǝ rimi ra go wete nŋe a kunuza an Barnabas nan Paul aza tegogoro ti mumuru nan imi iwi egeme se Ədəshəri wa wuza ənyimi ano əpən bakaŋ ŋe. ¹³ Amaro se ŋa mase u bənu, enze Jamese ma gare, a gusa, "Reno, kunan ni kima. ¹⁴ Simon na buku nane se Ədəshəri na bura u wuza ogwene ma male ano əpəŋ baka da ma zuzi a ŋe ano ə riji a reme. ¹⁵ Nlen ma atuma ma gare nan igiya, nane se eze nan udarsa, ¹⁶ 'Amaro tegogoro ti giya ra kuru, konzen ra piyǝ ka gura ka David, ogome se uwa rizi; Ra citi mi konzen in yiza əpin mi konzen, ¹⁷ Da a daŋara ano me né ŋanin giŋərǝ Aco, a gura ano əpən ano ageme se a tisiza ŋe nan riji a ron kusun.' ¹⁸ Imi giya enze Aco na buku, əvizi na wuza tegogoro ti giya se a ruu geten a ano ageme se ŋa ware do. ¹⁹ Baka nane, a ehoŋ, en ze tago woro giŋəri ano əpən ageme se ŋa na ka Ədəshəri nan betoi ne. ²⁰ Woro konzen inin darsa ŋe me nane se ŋa nin suru a re rere ri ti sumu, ŋa suri a rijama ra kwaro, konzen ŋa deke uwushu binama be geme se a dan tuzi ni, nan u wushu a goro mənyi. ²¹ Baka Moses wa biizi a timuru a teme konzen mǝ biyə ənyimi ti Synagogues kuyyǝ ətiyə o vonke." ²² Enze u nii eme eze kima a atuma nan ano aŋono, nan church me kweren, ŋa zake Judas se a gusan me Barnabas, nan Silas, se ŋa ze ano əsəssəru a church me, enze ŋa tome ŋe a Antioch nan Paul agura Barnabas. ²³ Ŋa darse igiya: "Əsuru atuma nan ano aŋono, Reno riŋi, a waŋa a reno ra ano əpən ənylml Antioch, Syria, nan Cilicia: A goŋ ŋi koo! ²⁴ Woro wa kone awe ənyimi əhəŋi ŋa suri ənyimi ahado, ŋa ta saŋare do ne, konzen ŋa tarse ŋi sololo nan isana obezezze ogome se u nin waŋara iruwa i hiŋi. ²⁵ Igiya eze nane, woro wa gare da i zake ano arome daa ituma ŋe iŋi a gura nan Barnabas nan Paule ano ageme se woro barse, ²⁶ ano ageme se ŋa nyaka iruwa e heŋe baka riji ra Aco o hodo Yeso Ukase. ²⁷ Baka nane woro ra tuma Judas nan Silas, ano ageme se ŋa nin buki iŋi nane me nan ate ahaŋe nan isana amelo a haŋe. ²⁸ Baka eze kima a Uvunu u Saŋsaŋ nan woro konzen, baka tago a tare ŋi utira o denden ken nan tegogoro ti giya se tenze akira a bara me: ²⁹ nane se ŋi nin deke u ŋiza a sumu, mənyi, te gogoro ti riguŋ, konzen akwaro rijama. Ngase ŋi deke tegogoro ti giya, ŋi ra cikǝ shammo. I ka deŋe shammo." ³⁰ Enze nŋe, se a mase usarma o hoŋe, ŋa tunu ŋa wame a Antioch; Se ŋa mase o woro ano a ri vento, enze ŋa nyaŋe rituma. ³¹ Se ŋa mase u bara me, iruwa wa runtu ŋi baka agaŋgaŋ ageme se ə piyə ŋe nan no. ³² Judas nan Silas, zale atuma ze, ŋa piyə ano nan agaŋgaŋ a cebete enze a vəti ŋi a gata ənu. ³³ Se ŋa mase u ŋuna timuru a regemme, ŋa nyaŋe taye ti u ŋana shammo əsuru a reno a wame ano ageme se ŋa tuma ŋe. ³⁴ (Enze Silas nəri eze kima mə cikə a ra me.) ³⁵ Enze Paule nan Barnabas ŋa cikǝ a Antioch nan udaŋara ano cebete, enze ŋa bezezze konzen ŋa yisu nlen ma Aco. ³⁶ Amaro te ti muru Paule goŋ Barnabas, "Deke wagiya i kuri konzen i ka nəri reno a kuyya ape ageme se i wa yisu nlen ma Aco, konzen inəri nane se ŋa ze." ³⁷ Barnabas wara nara u yita da ŋa waŋ nan Jone se a gusan me Markusu. ³⁸ Enze Paule wa gose itaze kima a yete Markusu ni, ono ogeme se ma deke ŋe a Pamphylia konzen ma ta wushu əji nan ŋe ituma me ne. ³⁹ Enze magita ma a yere derte ənyimi a haŋe, nane se ŋanin warna nan ate a haŋe, enze Barnabas yete Markusu nan me enze ŋa pete okoŋgo manyi ŋa wame a Cyprus. ⁴⁰ Enze Paule zake Silas ŋa dura, amaro se reno ra nyame u məntə u wuza ogwene u Ədəshəri. ⁴¹ Enze ma wame ənyimi Syria nan Cilicia, əvəri obezezze te church.