¹ Nane se a wuza ənyimi Iconium se Paul nan Banarbas wa pete ənyimi Synagogue u ti Jews enze ma me ubənu nane se ano cebete zale ti Jews nan ti Greeks tinin gara ŋa yiya iruwa. ² Enze ti Jews ano ageme se ŋa nyamene ŋe ŋa waŋare iruwa i ano ǝpǝn konzen ŋa ŋuna ŋe iruwa eheŋe i caro nan ayeno a haŋe. ³ Nane ze ŋa cikǝ ara agemme ŋa dakano, əbənu təndəsi nan agata Aco, mme a wuza eme geme se nlen ma me maze aza ogwene o home. Ma wuza nane nan u wuza tegogoro ti səssəru nan u wuza ti mumuru te geme se a dawa nẹri ni a suru a tare ti Paul nan Barnabas. ⁴ Məsəru ma ano ape a dare ŋe: adaŋara ulu ti Jews, awe konzen ulu atuma a Yeso. ⁵ Se zale ano əpəŋ nan ti Jews se ŋa ŋuna uga ŋa nin nyaka azaano əji a haŋe a cuta konzen a gisi Paul nan Barnabas nan azuwa, ⁶ se ŋa ru nane enze ŋa some a wame ape a Lycaonia, Lystra nan Derbe, nan nyaŋa mu lake, ⁷ ageme ze ŋa dutana nan u yisun nlen ma me. ⁸ A Lystra owe wara cikǝ, lauwo a garwa atau ahame, uguŋ zi əsuru ɔyɔɔ, ono ogeme se ma ta ru nane se tano te ze ne. ⁹ Ono me ma kone Paule əbənu. Se Paule dura əji a nərə ome enze ma nərə mi maze nan u yiya birwa be geme se ma nin wamo. ¹⁰ Enze ma gomme, ma yiza remelo nan agata, "Yira tore nan atau a hai." Enze ono me yere ma canko enze ma ŋaŋka a liŋəru. ¹¹ Se riyǝgǝ ri mi ri nǝri eme geme se Paule na ŋuna, enze ŋa yiza amelo, əbiyə mi nan eboze i ti Lycaonia, "ti sumu tina tunu a woro ənyimi uga ano." ¹² Ŋa tisa Barnabas "Zeus," konzen Paul, "Hermes," baka se manze ma ze ono u bənu. ¹³ U priest u Zeus, ono ogeme se ugura rebere a reme wara lake nan ape me, ma rai nan ti gənci agura alere ərəkəi a o pete ape me; mme nan riyǝgǝ ri mi ŋa ra nara u nyaka te goro ti ŋiza a rebere. ¹⁴ Se atuma a Yeso, Barnabas nan Paule, kone nane, ŋa darse tommo a teŋe enze ŋa yere nan teson ŋa suri ənyimi riyəgə reme ŋa wame əkəi sasa, əsənə ¹⁵ a gusa, "ano a rome, baka iya ze ŋi ra wuza tegogoro ti giya? Woro ano ze nan ri wuza uga nŋi. Woro na ra nan nlen ma loo, da ŋi deke tegogoro te woro ti giya i kuri Ədəshəri ageme se a ze nan ruma, ono ogeme se ma ruza ədəshəri, nan a nyaŋa, nan udandale nan zale emegeme se ira nyimmi. ¹⁶ A simiza se gene se sa wake, ma deke zale anon nyaŋa keken ŋa woze tano a ti runa ateŋe. ¹⁷ Taken nane, ma ta deke rete a reme nan bitə ru ni, ənyimi egeme ma wuza i wuma enze ma ŋiza ŋi bura ə suru ədəshəri nan əbuŋu imu wushu, ma binja iruwa iŋi nan imu wushu nan uruntu birwa." ¹⁸ Nan agaŋgaŋ a giya, Paul nan Barnabas ŋa tuna riyǝgǝ rimi u wuza o hoŋe rebere. ¹⁹ Enze te ti Jews əsuru a Antioch nan Iconium ŋa rai enze ŋa nya riyǝgǝ reme kpai. Ŋa gisi Paul enze ŋa zuzi mi ənyimi ape me, nan adodonzo u guna se mənə wənə. ²⁰ Wagiya se atuma wara atore əliŋərə o home, ma yere ma tore enze ma pete ape me. Ətiyə u tara me, enze ma wame a Derbe mme nan Barnabas. ²¹ Amaro se ŋa mase u yisun nlen ənyimi ape agemme enze ŋa ŋuna ano cebete ŋa waŋaro ŋa kai Yeso, enze ŋa kuri a Lystra, ŋa ku ŋa wame a Iconium, konzen ŋa wame a Antioch. ²² Ŋe a gaŋana u biyə mi nan u piyǝ iruwa iwa atuma da ŋa gaŋana u məntə u yiya birwa be ŋe, a gusa, "Woro ra pete kake ənyimi tegomo tə Ədəshəri baka u shǝ kpai a ti runa cebete." ²³ Uca ogeme se ŋa zake ate a haŋe tenoŋo ənyimi zale te church, enze ŋa nyaŋe taye nan u pate ənu, konzen ŋa nyaka ŋe a tare ta Aco, o ono ogeme se ŋa gare ŋa yiya biruwa. ²⁴ Enze ŋa wake ənyimi Pisidia enze ŋa wame a Pamphylia. ²⁵ Se ŋa mase u biyǝ nlen ma me ənyimi Perga, ŋa tu ŋa wame a Attalia. ²⁶ Əsuru a regeme, ŋa pəri ənyimi okoŋgo a wame a Antioch, ara ageme se ŋa mura u cikǝ gbau ogwene Ədəshəri baka ituma egeme se ŋa mase u wuza me. ²⁷ Uca ogeme se ŋa deŋe ənyimi Antioch enze ŋa gura ti church teme ara vento zale, ŋa bii zale tegoro te geme se Ədəshəri wa wuza nan ŋe, nan nane se mə pəni ano əpən əkəi u yiya biruwa. ²⁸ Ŋa cikǝ ŋa dakano nan atuma me.