¹ Wagiya ənyimi church a Antioch, aya atuma wara ǝnu nan ano obezezze. Ŋa ze Barnabas, Simeon (se a gosemme Niger), Lucius u Cyrene, Manaen (oyeno o re rene ri Herod u tetrarch), nan Saul. ² Se ŋa ra gurwǝnǝ Aco nan u pətə ənu, uvunu u saŋsaŋ go, "Iyan ni Barnabas nan Saul a rekero, da ŋa wuza ituma egeme se Na tisa ŋe da ŋa wuza." ³ Se ŋa mase upətə ənu, ŋa remmo, enze ŋa tare taare ateŋe aza ano agiya, enze ŋa sarme ŋe ŋa dura. ⁴ Nane ze Barnabas nan Saul ŋa tarse eme geme se Uvunu u Sansan na buku a ŋe enze ŋa tu ŋa wame a Seleucia; ǝsuru a regeme ŋa pete okoŋgo ŋa wame a Island u Cyprus. ⁵ Se ŋa da ǝnyimi ape a Salamis, ŋa yisu nlen mǝ Ədəshəri a synagogue u ti Jew. Ŋa ze nan Jone Markusu manze unu malo o hoŋe. ⁶ Se ŋa wame zale ǝnyimi island ŋa wame a Paphos, enze ŋa mura owe ono obere, utuma ompor u ti Jew, ono ogeme se a gosemme Bar Jesus. ⁷ Obere ugiya ŋa gursa rete nan Proconsul, Sergius Paulus, ono ogeme se ma ze nan uru iyabo. Ono u giya mə cikə nan Barnabas nan Saul, bakase ma nare da ma kuna nlen mǝ Ədəshəri. ⁸ Bata Elimas "obere" (nane ze a waŋare riji a reme) ma meshe magita nan ŋe; ma me cenene da ma waŋare Proconsul u yiya birwa beme. ⁹ Enze Saul, se a gosemme konzen Paul, se ma binja nan uvunu u saŋsaŋ, ma nəri mi kima. ¹⁰ Enze ma go, "ŋŋo vana ono uburu, ŋo kerne nan zale isana rikita nan ri wuza ri buru. Ŋŋo ono u nyamene kuyya isana magaŋgaŋ. U dama deke u waŋara uruna uwǝ Ədəshəri ni, ane? ¹¹ Wagiya nǝrǝ, u ware Aco ura aza a hai, konzen ŋo rǝ cikǝ uru. Ŋo da ma nǝrǝ oŋmwe a timuru. "Waze aregemme i duru duru nan mǝri wa pete Elymas; ma me utangarzo a saŋara ano da ŋa me me u ware ŋa ŋana nan me. ¹² Se proconsul wa nǝrə eme geme se ana ŋuna, enze ma gare ma yiya birwa, bakase ma kuna iwi obezezze aza Aco. ¹³ Wagiya Paule nan arene a hame ŋa tura okoŋgo manyi ǝsuru a Paphos enze ŋa rai a Perga ənyimi Pamphylia. Jone wa deke ŋe enze ma kuri a Jeruselem. ¹⁴ Paule nan arene a hame ŋa wame əsuru a Perga enze ŋa rai a Antioch u Pisidia. Aregeme ze ŋa pete ənyimi Synagogue ətiyə o vonke enze ŋa cikǝ a nyaŋa. ¹⁵ Amaro u biyǝ makiri enze atuma, ano u məntə Synagogue tome ŋe a ŋa go, " Reno, ngase eze nan re rituma ru piyə ano a rigiya, buku ni." ¹⁶ Enze Paule yere nan uware o home ǝdǝshəri; ma go, "Ano arome Isreal nan nŋi se ŋi gare nan Ədəshəri, kuna. ¹⁷ Ədəshəri a ano agiya Isreal ma zake ano Aco a hado enze ma yiza ŋe uca ogome se ŋa cikǝ ǝnyimi nnyaŋa ma Egypt, konzen nan rekonlon regeme se re ze nan otore gbau ma zuzi ŋi ənyimmi. ¹⁸ Ənyimi siwai ituru naze ma ŋana nan ŋe ənyimi uja. ¹⁹ Se ma mase u dutun nyaŋa ti puru Sunare, enze ma nya ano a hado ma cikə umura o hodo. ²⁰ Zale tegogoro ti giya a woze a maro siwai sinu ituru naze nan ituru shibi. Amaro te gogoro ti giya zale, Ədəshəri wa nyaŋe ano u biyǝn nlen a ka deŋe a Samuel utuma. ²¹ Enze ano me wa saŋara a nyaŋe ogomo, enze Ədəshəri nyaŋe Saul vana u Kish, ono eboze i Benjamin, mə cikə ogomo a siwai ituru inaze. ²² Amaro se Ədəshəri wa zuzi mi a tegomo, ma ŋuna David bare da mə cikə ogomo o hoŋe. I waze aza David zi se Ədəshəri wa go, 'Na tinka David Vana u Jesse da mə cikə ono alake nan birwa bon, ono u wuza zale eme geme se In barse a ma woze. ²³ Əsuru a biruza bi ono u giya Ədəshəri wa rai nan Ukase a Isreal, Yeso, uga nane se ma buki ma ra ŋuna me. ²⁴ Ame u wuza igiya yəi, bata Yeso ra, Jone wa bura u yisu o zoro a kweren ano Isreal ageme se ŋa gare ŋa deke macara maŋe. ²⁵ Se Jone wa ra gura ituma eheme, ma go, 'əvizi ŋo ra gose min ze? Dan mi zi ono me ne. Kuna kima, owe ra ra a maro a haŋ, ti ŋaforo ta tau a hame in ta date in buzi ni.' ²⁶ Reno, abiya bi ruza bi Abraham, nan ano ageme se ŋa ra ǝnyimi ə həŋi se ŋa gurwǝzənə Ədəshəri, aza!a!hado ze se rituma aza ri kase ri giya renze a tome nan no. ²⁷ Baka ano ageme se ŋa ze nan u cikǝ ənyimi Jeruselem, konzen ano əsəssəru a haŋe ŋa ta ru mi ni,enze ŋa binja eme geme se atuma wə biyə se kuyyu gurna ətiyə ovonke a bi da anyamene me. ²⁸ Nane se ŋa ta mura iyabo iwuma egeme se inin wuna me ma wi ni, ŋa buku a Pilate a woo me. ²⁹ Se ŋa mase u binja zale egeme se a darsa aza a hame, ŋa duti mi aza u titi nze ŋa ka luta me isau. ³⁰ Enze Ədəshəri wa yiza me əsuru ənyimi ano u wiju. ³¹ Ə nərə mi ənyimi timuru cebete nan ano ageme se ŋa ra nan me əsuru ə Galilee a wame a Jeruselem. Ano agemme ŋanze Wagiya àno u yisun nlen ma me a ano. ³² Nane ze woro ra biyə mi a ano nlen ma wuma se eme geme se Ədəshəri wa buku ano aco a hado, ³³ mana binja do me, nan abiya a haŋe, baka u yiza Yeso. Nane se eze nan u darsa ənyimi u takarda o repo u psalm: 'Ŋo Vana o hoŋ ze, Kane Na cikǝ Aco o hoi. ³⁴ 'dondon ze se ma yiza me ma tura me ənyimi ano u wiju baka ripuŋ a reme ri tan wishu ni, Ədəshəri wa bənu uruna u giya: 'Min ra nya u huŋi Uvunu konzen dondon taye te geme se a buku a David.' ³⁵ Baka nane ze ma kuru ma buki a iyi rina, 'Ŋo dama a deke ono u Saŋsaŋ ma nii uwishu ni.' ³⁶ Baka se uca ogeme se David wa wuza re rere ru barsa birwa bə Ədəshəri uca rimiza reme, ma me enrɔɔ; a luta me nan ano aco me enze ripuŋa reme ra mura uwishu. ³⁷ Baka se ono ogeme se Ədəshəri na yiza ma ta nii uwishu ni. ³⁸ Baka nane deke a ŋo ru eme, reno, se ǝsuru ono u giya ana biyə iŋi nlen ma u yita macara. ³⁹ Bakam me kuyya ono se ma na gara ma yiya birwa ana zuzi mi a kweren tegogoro te geme se makiri ma Moses ma ta date ma zuzi mi ni. ⁴⁰ Baka nane pəpəi ni baka eme geme se atuma Ədəshəri wa bənu aza me se i dawa mura ŋi ni: ⁴¹ 'Nərə, Ŋi ano sarma me, kerkene ni enze Konzen i wuri; Baka se ra wuza ituma ǝnyimi timuru ate, Ituma egeme se u dama gara u yiya birwa ne, nee owe bii a ŋo u dama gara me ne."' ⁴² Se Paule nan Silas wa ra deke ara me, ano wa vale ŋe da ŋa vati u biyǝ nlen ma vento ma geme ma me konzen ətiyə o vonke uwǝ ǝji. ⁴³ Se u gurna u Synagogue wa maso, ti Jews cebete nan ano əpən ageme ŋa pete a Judaism ŋa tarse Paule nan Barnabas, ono ogeme se mə bǝnu nan ŋe da ŋa wushi əji ənyimi ogwene Ədəshəri. ⁴⁴ O vonke uwǝ ǝji, ano ape wa suri ŋa gurna ara vento da ŋa kuna nlen ma Aco. ⁴⁵ Se ti Jew tə nəri riyǝgə ra ano, ŋa binja nan reero enze ŋa bǝnu baka tegogoro te geme se Paul wə biyə a ŋe enze ŋa tinza me. ⁴⁶ Konzen Paul nan Barnabas ŋa bənu təndəsi ŋa go, "I wa ze kake se Nlen mə Ədǝshǝri anin bura u biyǝ mi iŋi. Ŋi giya a tipi mi əsuru iŋi ate konzen a ŋi yete iŋi iruwa ano ageme se ŋa na dira ruma ri suŋ, nərə ni woro ra kuri a yisu mi a ano əpən. ⁴⁷ Baka nane Aco na buku a woro, ma go, 'Na yiya ŋi uga ura u saŋsaŋ a ano əpən, nane se ŋi nin ra nan nlen ma ri kase a kweren turara tin nyaŋa ma masano." ⁴⁸ Se ano ə pəŋ ŋa kuna nane, iruwa wa runti ŋi enze ŋa tuŋara nlen ma Aco. Ano ageme se a zaka da ŋa mura ruma ŋa yiya birwa. ⁴⁹ Nlen mə Ədǝshǝri mə bəku gaŋka ənyimi nyaŋa ma me zale. ⁵⁰ Enze ti Jew ti bunki awai ageme se ŋa gara nan u yiya birwa, nane ze ano arome əsəssəru ape. Nane wa ka zuu u nyaka ma kpai aza Paul nan Barnabas enze ŋa zuzi ŋi a bi rəŋu bin nyaŋa ma ape ma me. ⁵¹ Enze Paul nan Barnabas ŋa tere uturu atau a haŋe a waŋa aza haŋe. Enze ŋa waŋ ape a ti Iconium. ⁵² Konzen atuma wa binja nan uruntu birwa nan Uvunu Usaŋsaŋ.