¹ Wagiya ənyimi ti kuru te geme tenze ogomo Herod wa tare taare ateme aza awe ano ageme se ŋa ra church baka da ma mura ma nyaŋe kpai. ² Ma wuna James nan u wanome Jone nan uvira u pannon. ³ Se ma nii nane na runtu ti Jews iruwa, nze ma kuru ma me Peter konzen. Egeme a woze ǝnyimi timuru ti borode u dira yeast. ⁴ Se a mase ome ohome, enze ma wuna me inyan konzen ma wuna əburi ti suja ti naze ti wuza rinyaŋana reme; ma ra nara ma ta rai nan ŋe a ano amaro izalla u pəri. ⁵ Nane ze a deke Peter inyan, enze ano ageme se ŋa ra ǝnyimi church wa remmozo Ədəshəri bakan mme. ⁶ Nan ǝtitiye se bata Herod wa ra waŋ ma rai ma zuzi mi da biyən nlen, Peter wa ran ro a zate ti suja ti repo, utəsə nan magwaiwa, ano rinyaŋana ŋa yiya ərəkəi ə nərə ara inyanze me. ⁷ Aregemme, umaleka uwə Ədəshəri uwa yoŋko nan me, enze ura pənu ənyimi inyan me. Nze ma dupa Peter a rikira enze ma zinza me ma gomme, "Yira tore sasa," enze magwaiwa ma me ma kuŋku ame a tare. ⁸ Umaleka me gomme, "Goro konzen u soke ti ŋaforo te." Nze Peter wuna nane. Nze u maleka me gomme, "Soke udii usəru mi enze u tarson." ⁹ Nane ze Peter wa tarse umaleka me enze ma suri. Ma ta aru eme geme se umaleka na wuza Gaŋgaŋ ze ne. Ma ra gusa ma ra nii mi uga tero tenze. ¹⁰ Se ŋa wake ano rinyaŋana ru bura nan ro repo, ŋa rai u gəgkə- əkəi a biru se a wame ənyimi ape; ǝpənun ŋe nan rete a reme. Ŋa suri əkəi enze ŋa tarse uruna ŋa tu, enze u maleka me wa deke me. ¹¹ Uca ogeme se imamme wa sope me, enze ma go, "Wagiya ze minə ru se Aco Mana tuma umaleka o home enze ma zuzun a suru a tare ti Herod, konzen əsuru a tegogoro tegeme zale tenze ano ti Jew wa ra pa me. ¹² Se ma ru nane, nze ma wame ətitəu Mary əyin Jone, konzen ma tisa Markusu, Aregemme se ano cebete wa gurna konzen a beremmo. ¹³ Se ma tere ərəkəi mi, orere ugalla se a gusan me Rhoda ma rai da ma gare. ¹⁴ Se ma kone ma ru remelo ri Peter, baka u runtu birwa ma ta date mə pəni əkəi mi ni; ma kuri ənyimi ugura me nan teson; enze ma goŋ ŋe Peter ze wa ra tore ǝkəi mi. ¹⁵ Enze ŋa gomme, "Ŋo na canze." Enze ma me cenene. Ŋa go, "umaleka ohome ze." ¹⁶ Enze Peter me cenene a gwanza ərə kəi, konzen sə ŋa pəni əkəi mi, ŋa nǝri mi enze ŋa kerkene ŋa Luna iwi. ¹⁷ Enze Peter wəki ŋi u ware a go wete, enze ma biyə a ŋe nane se Aco na zuzi mi inyanze. Ma go, "Buku ni tegoro ti giya a Jamese nan ayeno." Enze ma deke ŋe ma wame a riya. ¹⁸ Wagiya se ina deŋe oyere, nlen ma yere kpai-kpai ǝnyimi ti suja dan bate ne aza eme geme se iwa mura Peter. ¹⁹ Amaro se Herod wa giŋəri mi enze ma ta mura me ne, ma saŋare ano rinyaŋana reme enze ma wuna a woze ŋe. Enze ma tu ma wame əsuru a Judea a ka Caesarea enze mǝ cikǝ a geme. ²² Ano wa səkənə, "Remelo ri giya rə ədəshəri renze, dan ri ono renze ne." ²³ Aregemme umaleka u vape me, bakase ma dan nya Ədəshəri ubare o home ne; ijiji ze wa wushi mi ma ze ne mə wi. ²⁴ Nlen mə Ədǝshǝri ma gaŋana u pənu konzen əvərənu. ²⁵ Se Barnabas nan Saul wa mase ubinja tero a teŋe, enze ŋa kuri əsuru a Jeruselem, Ŋa ra nan Jone, se a gosemme Markusu.