¹ Wa giya atuma nan a yeno ageme se ŋa ra ǝnyimi Judea ŋa kuna se ti Gentiles konzen taa ka eboze Ədəshəri. ² Uca ogeme se Peter wa kuri ǝnyimi Jeruselem, ano a geme se ŋa gara nan u tusu te shoro ŋa ŋiska me nan nlen; ³ ŋa go "Ŋo naa gura rete a re nan ano ageme se a dan tusu ŋi te shoro ne Konzen u wushu imu wushu nan ŋe!" ⁴ Enze Peter ma me u buzərən nlen ma me a ŋe; ma go, ⁵ In ti ra remmo ǝnyimi ape a Joppa, enze ri tuma ri ra uga tero ənyimi o kero aa tunu, uga ope ŋe usəru ǝdǝshǝri nan ti bolo ateme ti naze. Uwa tunu imi. ⁶ In buki ne nin barna ǝnu konzen in wuza adodonzo aza me. In wa nǝri inama iwa tau anaze i masano, inama i buru, i nama iwu gurmu, inama iwu wuŋku tipuru, nan itidi iwa ədəshəri. ⁷ Enze in kuna ubukənu, "Yira tore, Peter; wuna uwushi!" ⁸ In go, "Dan nane ne, Aco; iyabo i madini ne iwu dira saŋsaŋ i dawa pete imi ənu ni." ⁹ Enze a kuru əbukənu konzen, "Eme geme se Ədəshəri na wuna i sansan, tago u tisa madini ni." ¹⁰ Igiya a kursu ənu ka taro, enze a zaki, akursi kuyya ənyimi ədəshəri konzen. ¹¹ A tore, Aregemme an ka taro wa da tore əkǝi awə titəu a regeme se woro wǝrǝ nu; a tuma ŋe ǝsuru a Caesarea a rawa imi. ¹² Enze uvunu buki imi an wame nan ŋe, konzen tago in beze ŋe u barsa rete ne. Ayeno a giya ame tase ŋa wame nan mi, enze i wame ǝnyimi a kura a ono me. ¹³ Ma buki a woro nane se ma na ni u maleka me a tore ənyimi ətitəu a hame konzen a gusa, "Tuma ano a wame a Joppa konzen u kursi Simon ono ogeme se a tisiza me Peter. ¹⁴ Ma ra biyə o hoi rituma regeme se rinin ka ye—ŋŋo nan zale akura a hai." ¹⁵ Se in mura u bənu nan ŋe, enze uvunu u sansan u tu aza a haŋe, uga nane se uwa rai aza a hado u gura me. ¹⁶ Naa dunza u bənu uwa Aco, nane se ma go, "Jone maa zoro ŋi nan manyi; ŋŋi konzen ara zoro u huŋi nan uvunu u sansan." ¹⁷ Konzen ngase Ədǝshǝri ma nya ŋe isana ənəwa uga nane se ma nya do uca ogeme se woro wa nyaka iruwa e hedo a Yeso, Aco, Ukase, manze ma a ze Mmi, se nin date in nyamene iwə Ədəshəri?" ¹⁸ Se ŋa kone tegogoro ti giya, ŋa ta kuru ŋa buki iyabo ne, enze ŋa tuŋare Ədəshəri Konzen ŋa go, "Wagiya Ədəshəri na nyaka ruma ano əpən zale." ¹⁹ Wagiya ano ageme se a sarme ŋe baka ma kpai se a bura nan u wənə u Stephen a sarmo a wame a yayau a ka deŋe a Phoenicia, Cyprus, nan Antioch, zalen nane ŋa biyǝ nlen aza Yeso a ti Jews base. ²⁰ Bata awe a haŋe, ano arome ǝsuru a Cyprus nan Cyrene, ŋa rai a Antioch nze ŋa yisu Konzen a ti Greeks, ə biyə o hoŋe nlen ma lo aza Yeso Aco. ²¹ Uware uwa Aco Waze nan ŋe; ano cebete ŋa gare ŋa waŋaro a waŋa Aco. ²² Epe aza haŋe wa pete a te toŋe ti church a Jeruselem, enze ŋa tome Barnabas a wame peou a Antioch. ²³ Se ma rai ma nəri eme geme se Ədəshəri na wuza, birwa bə runti mi; enze ma runi ŋi a ŋa cikǝ nan Aco a ŋe i ruwa Kweren. ²⁴ Konzen mme ono u kima ze nan u binja nan uvunu u saŋsaŋ a gura u yiya birwa, ara Aco ano cebete ŋa vətə nu. ²⁵ Enze Barnabas ma wame a Tarsus da ma giŋərə Saul. ²⁶ Se ma mura me, enze ma rai nan me a Antioch. Iwə cikǝ, ənyimi riwai reme kweren ŋa gurna ara a vento nan Church me enze ŋa bezezze ano cebete. Ano u yiya birwa a bura u tisa ohoŋe ti kirista a Antioch. ²⁷ Ənyimi ti kuru te geme aya atuma ŋa tunu əsuru a Jeruselem a waŋa Antioch. ²⁸ Owe ohoŋe, nan riji Agabus, maa yere se uvunu u saŋsaŋ na dupa me nze ma buki se ara wuza e komo a masano mame kweren. Aa wuza igiya ənyimi timuru ti Claudius. ²⁹ Nane, ano u yiya birwa, uga nane se ono nin date, ŋa barse ŋa tome nan ti mala ayeno ənyimi Judea. ³⁰ Ŋa wuza igiya; Ŋa tuma Barnabas nan iru da aka nya ano a ŋono nan Saul.