¹ Oyono wərənu ape a Caesarea, a gusa me Cornelius,ono u səru ti suja a suru ulu Italia. ² Maa ze ono u nyaka rete, ma gurwǝzənə ə Ədəshəri nan zale ana kura a hame; ma ŋiza iru cebete aano ageme se ŋa ra barsa me. Konzen kuyyu ca ma remmozo ə Ədəshər. ³ Uga iru toroi ewo yere, ma ti nii sansan uga ənyimi tero u maleka a raw ā me. U maleka me gomme, "Cornelius!" ⁴ Cornelius ma vake u maleka ǝji əyimi iwi enze mago, Iyaze, Ono u səru?" U maleka me gomme, "O remmo o hoi nan ti mala te a ano u dira ina nyana aza inə cikǝ e ma dodonzo əji Ədəshəri. ⁵ Wa giya, tuma awe a ŋa wame ape Joppa da ŋa ra me nan Simon ono ogeme se a gosemme Peter. ⁶ Mara cikǝ nan Simon ono u duwərə si kasa, ono ogeme se ətitəu a hame raa laken u dandale manyi." ⁷ Uca ogeme se u maleka ogeme se maa bənu nan me naa deke me, Cornelius tisa arere aa titəu ahame, nan u suja ono u nyaka rete ə nyimə arere a hame. ⁸ Cornelius biya ŋe zale egeme se ana wuza nze ma tome ŋe a ka Joppa. ⁹ Ətiyə u tarse me a waŋaa iru rase, se ŋa ra ǝnyimi tano ateŋe nŋe a deŋe voto nan ape me, Peter wame aza ətiəu mi daa ma remmo. ¹⁰ Enze ekomo me mme ə ginərə eme geme se man in wushu, se ano wa da a shira imu wushu, a nyame u nii uga tero, ¹¹ enze ma nii ədəshəri pənu konzen uga opozo aa tunu, iyabo pampalake uga ojebeto a tunu a masano, ome nane nan agoro a naze. ¹² Zale isana i nama uja iwa atau naze nan egeme se i wunki ti puru a nyaŋa, nan i tidi iwə ədəshəri. ¹³ Enze ma kone remelo ri bukənu nan me: "Yira, Peter, wuna uu wushi." ¹⁴ Enze Peter go, "Dan nane ne, Aco; min taa wushu eme madini ni." ¹⁵ Enze remolo ri rawa me u ra o repo: "Eme geme se Ədəshəri na visuku, tago u tisa eme madini ni." ¹⁶ Igiya wa wuza me ka taro; Nze əwə zəki opozo me a ka ədeshəri. ¹⁷ Se i mamme i wuna me buu aza nane se mana nii eme geme se eze, enze ano ageme se Cornelius wa tome,ŋŋe a tore ǝrəkəi, amaro se ŋa naa saŋara u runa u waŋa ətitəu mi. ¹⁸ Nze ŋa tisa əkəi ŋa saŋare nee Simon, ono ogeme se a gosemme Peter,maa daa cikǝ a geme. ¹⁹ Se Peter wa da adodonzo aza tero, enze Uvunu u sansan buka ame, "Kuna, awe, an ka taro ŋa na ra a giŋərə o hoi. ²⁰ Yira konzen u tu enze u wan nan ŋe. Tago u nyamene u wame nan ŋe baka se mi naa tuma ŋe ne." ²¹ Enze Peter tu ma mura ŋe nze ma go, "Mmi zi ono ogeme se ŋi ra ginǝrǝ mi. Ŋi na rawa a riya ze?" ²² Ŋa go, "Ono rinyaŋana rin sau se a gosemme Cornelius, ono u wuma konzen ono ma gaŋgaŋ, ono u tarse Ədəshəri, konzen anon nyaŋa ma ti Jews kusun ŋa ra bənu aza a hame, u malika u sansan u wǝ Ədəshəri u wa tome me a ŋo da a ŋo rai a me ətitəu, baka da ma kone ri tuma a suru a ŋo." ²³ Enze Peter goŋ ŋe a ŋa pete da a ŋa cikǝ nan me. Ara wa sane ma yere ma tarse ŋe, nan a daŋzara ano wano me a suru a Joppa ŋa tarse me. ²⁴ Ətiyə u tarse me konzen ŋa ra a Caesarea. Cornelius ma ra a pawo o hoŋe; ma a tisa zale reno a reme nan arene a hame a geme se ŋa ra lake. ²⁵ I wa deŋe aza egeme se Peter na pete, Cornelius mura me nze mə kupənə a tauwa hame da ma gurwənə mi. ²⁶ Enze Peter yiza me, a gusa, "Yira tore! Mmi ono ze." ²⁷ Se Peter wa da a bənu nan me, ma pete ma ra nan ano cebete. ²⁸ Ma goŋ ŋe, "Ŋŋi nan ate ǝhǝŋi ŋi ru se dan makiri manze u Jews wuza re rene nee ma wame a regen ŋa maiyin nyaŋa. Baka Ədǝshǝri na bezon se tago in tisa ono ogeme se mazen macara nee ono madini ni. ²⁹ Baka nane ze na ra dan nan magita ne, u uca ogeme se ana a tuman. Baka nane ze Mina a saŋarai baka iya ze ŋo na tuma i mi." ³⁰ Cornelius go, "Tittiyə ti naze se ti naa waka a rawa uca u giya se eze, Na raa be remmo i mi ətitǝu nan uca iru toroi; enze in ni owe a tore a laken mi ǝnyimì tommo! ti sansan. ³¹ Ma go, 'Cornelius, be remmo a be Ədəshəri na kuna, konzen u ŋiza tegogoro te geme se ŋo ŋiza ano u dira ina dunza Ədəshəri aza a hai. ³² Baka nane tuma owe a ma wame aa Joppa, konzen a tisaiy oyo ono se a tisiza me Simon, manze konzen Peter. Mazen nan u cikǝ a kura ono u wərə si kaza riji a reme Simon, a laken u dandale manyi. ³³ Enze u ca vento in tome a ŋo. Eze kima se ŋo na ra. Se igiya, woron giya se irənu Kweren ǝji Ədəshəri, da a kone zale egeme se Ədəshəri na a Buku da ŋo buki a ano." ³⁴ Enze Peter pǝni ǝnu a hame ma go, "Gaŋgaŋ, Min ru se Ədəshəri dan orere owe ze ne, ma ta tarse amaron nlen ma buu ni. ³⁵ Da a wuna nane, a kuyan nyaŋa ono ogeme se ma gurwənə konzen ma wuza imi wuma enze ma kai. ³⁶ Ŋi ru ri tuma re geme se ma tome nan no a ano Isreal, uca ogeme se aa yisun nlen ma loo aza u cikǝ shammo ǝnyimi riji re Yeso, Ukase, se manze Aco u kusun— ³⁷ ŋi nan ate ǝhǝŋi ŋi ru eme geme se awa wuza se iwa pǝnu zale ǝnyimin nyaŋa ma Judea, a bura ǝ nyimi Galilee, amaro ozoro ogeme se Jone ma yisu; ³⁸ nlen epe Yeso u Nazereth, nane se Ədəshəri wa gubǝri mi nan Uvunu u Sansan nan agata a me. Mme aa ŋana o pese pese a wuza tegoro ti wuma konzen ano u dira gayan baka ono u buru ŋa wamo, baka Ədəshəri wa ze nan me. ³⁹ Nan ǝji a hado woro wa nəri zale tegoro te geme se Yeso wa woze, an nyaŋa ma ti Jews nan ənyimi Jerusalem. Ŋa wuna me reshere ŋa tǝsi u titi ma zene ma wi, ⁴⁰ enze Ədəshəri yisiza me ǝtiyǝ u taro,nane ze i wuna azene a nǝri mi konzen, ⁴¹ dan baka zale ano ne se ano ageme se ŋa nǝrə nan əji a haŋe konzen nan ano ageme se Ədəshəri wa zake ŋe—baka woro wa wushu konzen i shi nan me amaro u yira ome əsuru a ano u wiju. ⁴² Maa buku a woro da a yisu a ano konzen da ŋa ru se manze ono ogeme se Ədəshəri wa zake da ma cikǝ ono u biyǝ nlen ma ano ruma nan en keze. ⁴³ Aza hame ze Zale atuma wa ra ŋa bǝnu əənu, baka kuwǝvi ono ageme se ma yiya birwa ame ara yita macara ma me ǝnyimi riji a reme." ⁴⁴ Se Peter ma dǝ əbiyǝ te goro ti giya, enze Uvunu u Sansan u gubǝri kusun ano a geme se ŋa raa kunuza ri tuma re me. ⁴⁵ Ano ageme se ŋa gare nan ano u tusu ti shoro—zale ano ageme se ŋa ra nan Peter—ŋaa kuna iwi, baka u nyaka u Vunu u Sansan wa gubəri ŋi Konzen nan ti Jews te geme se taa gare nan nlen ma me. ⁴⁶ Nane ze ŋa kuna ano əpən əbiyə eboze iwa daŋara me konzen a tuŋara Ədəshəri. Enze Peter goŋ ŋe, ⁴⁷ "owe nin date u tuna ano agiya mənyi tago ŋa zoro ne, ano a giya se ŋa na ka uvunu u sansan uga woro?" ⁴⁸ Enze ma buku a ŋe a zoro ŋe ǝnyimi riji re Yeso, Ukase. Bata ŋa saŋare me da a ma cikǝ nan ŋe ma wuna timuru.