¹ Nane ze Saul, a biyə agaŋgaŋ a buru epe u wuza atuma Aco, ma wame aa u priest u sǝru ² enze ma saŋare me aa ma nyame u takarda u wame a ti church ti Damascus, baka nga se ma mura owe se mara tarse me, uga ono rome nee uwai, ma rai nan ŋe aa Jerusalem. ³ Se ma meshe uruna, mme a tano, maa ra voto nan Damascus, enze i sansan aa suru Ədəshəri i gubəri mi kusun; ⁴ konzen ma gara a nyaŋa enze ma kone remelo a gusa, "Saul, baka iya ze ŋo ra riza o hoŋ?" ⁵ Saul tare, "ŋo ze ǝvi, Aco?" Aco go, "Mi zi Yeso ono ogeme se ŋo ra a rizo ohoŋ; ⁶ konzen yira, pete ǝnyimi ape konzen ara buku mi a ŋo eme geme se ŋo raa wuza me." ⁷ Ano ageme se ŋa ra a tano nan Saul ŋa a tore ŋa ta a ru imu buku ni, a kunuza remolo, ŋa ta a nǝrǝ owe ne. ⁸ Saul yere a nyaŋa me, konzen se ma pǝni ǝji a hame, ma ta ni iyabo ne; nze ŋa me me u ware ŋa pete nan me ǝnyimi Damascus. ⁹ Ti muru ti taro cip ma a ta a ni ara ne, konzen ma ta a wushu nee ma shi ni. ¹⁰ Eze se owe wə rənu se a gosemme Ananiya. Enze Aco buka ame uga a tero, "Ananiya!" He said, "Nərə, Min giya a rigiya, Aco." ¹¹ Enze Aco gomme, "Yira, konzen waŋ u runa ogeme se a gusa CAs, konzen a titǝu a Judas, o deŋe u saŋara epe Oyono u suru a Tarsus se a gusamme Saul, ma geme a beremmo. ¹² Ma a ni uga tero ono se a gosemme Ananiya mana a ra ma pete konzen ma tare u ware aza hame, baka da ma ni ara konzen." ¹³ Enze Ananiya ma gare, "Aco, Mina kunuza a suri aa no cebete aza ono u giya, nane se ma naa wuna nan ano a sansaŋa haiy a Jeruselem. ¹⁴ Ma kai ri barje reme a suru aa ogomo ti priest da ma meshe kuwǝvi a rigiya baka ono ogeme se ma tisa riji a re." ¹⁵ Enze Aco gomme, "Waŋ, manze in wa zake da ma wuzan ituma, da a ma waŋ maka yisu riji a ron aano ǝpəŋ konzen nan a gomo a gura a biya a Israel; ¹⁶ daa Mmi in beze me nane se ma nin shə kpai baka riji a ron." ¹⁷ Baka nane Ananiya dura, enze ma pete ǝnyimi ətitəu. Mme aa tara tara reme aza a hame, ma go, "Uwanon Saul, Yeso, Aco, ogeme se ma ti yonke rete a reme aa ŋo aza u runa u uca ogeme se ŋo ti ra a ra, manaa tuman da ŋo kai u niya a ra konzen ma binjaiy nan uvunu u sansan." ¹⁸ A regemme iyabo gəti Saul əǝji uga tevokolo, enze ǝji a hame a me u niya a ra; ma yere enze a ka zoro me; ¹⁹ konzen ma wushu imu wushu enze ma dutana. Maa cikǝ nan atuma a Yeso ənyimi Damascus, ti muru calala. ²⁰ A regemme ma wa me u yisun nlen ənyimi te church, a gusa manze vanə Ədəshəri. ²¹ Zale ono ogeme se ma kuna me ma a kuna iwi enze ŋa go, "Dan manze ono ogeme se ma a wuza ano u tisiza riji rigiya ənyimi Jerusalem ne? Mana ra da ma tuna ŋe ma wan nan ŋe oo gomo ti priest." ²² Enze agata a Saul ǝ vərənu gaŋka, enze ma me o pese nan betoi ənyimi ti Jews te geme se ti ze nan u cikǝ ənyimi Damascus a biyə mi a ŋe se Yeso ze u kase. ²³ A maro ti muru cebete, ti Jews ti gura ate a nara u wuno me. ²⁴ Ŋa kazu wuna nane Saul na kuna Kweren. Ŋe a wuma rinyaŋana ri ti rəkəi nan onmwe nan ətittiyə da ŋa woo me. ²⁵ Nze atuma a hame ŋa zuzi mi aza u piŋəri, ŋa duti mi ənyimi o pozo aa maro me enze ma dura ene heme. ²⁶ Se ma ra a Jeruselem,Saul nara u gura rete nan atuma,bata zale ŋa ra kuna iwiye me, ŋa taa gara se mme utuma zene. ²⁷ Enze Barnabas yete me ma ra nan me a atuma me, enze ma buka aŋe nane se Saul wa nii Aco u runa konzen nane se Aco wa bənu nan me, konzen nan nane se Saul wa bənu tandasi a Damascus nan riji re Yeso. ²⁸ Maa gurna nan ŋe uca ogeme se ŋa ra pese nan usuru a Jeruselem. Mə bənu tandasi ənyimi riji ri Yeso, Aco ²⁹ enze ŋa meshe magita nan ti Jews ti Grecian; taken nane ŋa nare u wuna o home. ³⁰ Se a yeno kuna nane, nze ŋa tu nan me a Caesarea enze ŋa wuna me u runa a ka Tarsus. ³¹ Enze, zale ti Church a Judea, Galilee, nan Samaria ŋaa cikə gayan konzen ŋa a bare; aa ta ano nan iwi iwa Aco nan urusu birwa uuvunu u sansan, church me ə vərə nu a baro. ³² Wagiya i wa rawa nane, se Peter maa liŋəri nnyaŋa ma me zale, maa tunu konzen a ano u yiya birwa a geme se ŋa ze nan u cikǝ ənyimi ape a Lydda. ³³ Aregemme ze ma mura owe se a gusan me Aeneas, ono ogeme se ma ra luta ara o tete si wai uru, ripun a reme ra wuna shammo. ³⁴ Peter gomme, "Aeneas, Yeso, Ono u Kasa ma wuna u wamo. Yira poto opeŋe o hoi," enze a regemme ma yere ma tore. ³⁵ Zale ano a geme se ŋa ze nan u cikǝ a Lydda nan a Sharon ŋa nəri ono me enze ŋa kuri a Aco. ³⁶ Owe wa rǝnu a Joppa u tuma ze se a gusa me Tabitha, manze awa waŋare, se gusamme "Dorcas." Uwai ogome awa rumi nan ribiu ri wuma nan u wuza ano tiyan ogwene. ³⁷ Iwa cikǝ nane ənyimi ti muru te geme ma ta ze gayan ne nze ma wi; se ŋa mase o zoro o home, ŋa luta me u gura uwa aza. ³⁸ Baka Lydda waze voto nan Joppa, nze atuma se ŋa kuna Peter maa ra ara a me, ŋa tome an ka repo a me, a wuza avale, "Rawa woro dan nan itəpu ni." ³⁹ Nze Peter ma yere ma wame nan ŋe. Se ma deŋe, ŋa pete nan me u gura uwa aza, enze əshii mi zale ŋa tore izama, a bezezze tommo te geme se Dorcas wa ŋiza ŋe se maa da nan ruma. ⁴⁰ Nze Peter zuzi ŋi zale əkǝi, ma gurwənə, nze ma remmo; ma waŋare e keze me, ma go, "Tabitha, yira." Enze ma pəni əji, se ma nari se ma yera ma cikǝ. ⁴¹ Enze Peter nyame u ware ma veke me; se maa tisa ano u yisa birwa nan ə shii mi, nze ma nyaka me nan ruma. ⁴² Aa kuna nlen ma giya zale ənyimi Joppa, ano cebete ŋa wuna birwa a Aco. ⁴³ Baka nane ze Peter wa wuna timuru cebete a Joppa nan Ono ogeme se a gusa me Simon, ono u duwərə si kasa.