¹ Amaro ti gogoro ti giya Paul deke Athens enze ma ka Corinth. ² Ara agemme ze ma gurna nan u Jew se a gusan me Aquila, ono Puntus, ono ogome se ma dan na dakano nan ura əsuru a Italy nan uwai o home Priscilla, baka se Claudius ma ŋuna ti Jews zale a ti suri a Rome. Paul wa wame a ŋe ³ konzen baka ma wuza isana ituma evento ijamane, mə cikə nan ŋe ma wuza ituma, baka ŋaze ano u pizə ti gura ti uja ŋa rəsi. ⁴ Enze Paule bǝnu a Synagogue kuyyə tiyə a o vonke. Ma wunki iruwa i ti Jews nan ti Greeks. ⁵ Uca ogome se Silas nan Timothy ŋa rai ə suru a Macedonia. Uvunu wa ŋuna Paul da ma bii a ti Jews se Yeso waze Ono U kasa. ⁶ Se ti Jews ta nyamene konzen ti tinza me, Paule wa zərwi udii o home a ŋe ma goŋ ŋe, "mənyi ə məŋi mə cikə aza ate ə həŋi; tə mənyi a man ne. Əsuru a Kane, ra wame a ano əpən". ⁷ Enze ma deke ara agemme ma wame ətitəu a Titius Justus. Ono ogeme se mə gurwəzənə Ədəshəri. Ətitəu a hame waze voto waze voto nan Synagogue. ⁸ Crispus, Ono u əji a Synagogue, ma yiya birwa Aco, nan ano ageme se ŋa ra cikǝ ətitəu a hame; ti Corinthians cebete se ta kone nane se ŋa gare enze a zoro ŋe. ⁹ Aco wa buki a Paul nan ətittiyə, aza tero, "tago u kuna iwi ni, bənu tago o go wete ne. ¹⁰ Baka se nze nan ŋo, konzen owe dame a date ma we iyabo ne, ka se nze nan ano cebete ənyimi ape me." ¹¹ Paul wa cikǝ a gemme riwai nan ti bərmə tase, a bezezze o hoŋe nlen mǝ Ədəshəri. ¹² Uca ogome se Gallio wa cikǝ ugomina u Achaia, ti Jews ta gura ate nze ŋa nya aza Paul nze ŋa ra nan me ara u biyǝn nlen; ¹³ Ŋa go, "Ono ugiya wuza ano a ŋa gurwəzənə Ədəshəri aza egeme se eze ken nan makiri". ¹⁴ Taken nane Paul wa ra a nara ubukǝnu, Gallio goŋ ti Jews teme, "nŋi ti Jews, ta a go nlen ma macara nan iburi zi, ita ze kima a wuza ŋi. ¹⁵ Wagiya se igiya u saŋara ze aza amelo nan siji sa ano nan makiri əməŋi, mammara ni nan ate ǝhǝŋi. Min dama nara u cikǝ ono u biyǝn nlen ma yiya ne". ¹⁶ Gallio wa wuna ŋe ŋa deke ara u cikə a biyən nlen. ¹⁷ Enze ŋa me Sosthenes, ono u məntə Synagogue, enze ŋa təri mi əji Ano u biyǝn nlen. Konzen Gallios ta ŋuna birwa eme geme se ŋa na wuza ne. ¹⁸ Paule amaro u cikǝ a regemme ətittiyə cebete, ma deke reno enze ma wuza tano okoŋgo u manyi a wame a Syria nan Priscilla nan Aquila. Ma a kazo deŋe ara o tore ti koŋgo ti manyi, Cenchrea, ma ŋuna a turki mi sete baka otono ogeme se ma yete. ¹⁹ Se ŋa rai a Ephesus, Paule deke Prescila nan Aquila a regemme, enze emme nan rete a reme ma pete ənyimi Synagogue mə bǝnu nan ti Jews teme. ²⁰ Se ŋa saŋare a Paul vəti timuru ənu, enze ma nyamene. ²¹ Se ma ra deke o hoŋe, enze ma go, "ngase Ədəshəri gare rə kuru iŋi." Enze ma goro, ma yere ma pete o koŋgo manyi ma deke Ephesus. ²² Se Paul wa deŋe a Caesarea, enze ma wame a kura Ədəshəri ma goŋ ŋe koo a church u Jeruselem enze ma tu a Anthioch. ²³ Amaro u ŋuna ti muru a regemme, Paul ma yere ma wame an nyaŋa ma Galantia nan Phrygia enze ma piyǝ atuma Yeso nan nlen kusun. ²⁴ Wagiya uyu Jew se a gose nan me Apollos, oyo u Alexandrian ma rai a Ephesus. Mə ru ubənu konzen mə ru non mə Ədǝshǝri geten. ²⁵ Apollos ma a mura umasa ənyimi o bezezze uwa Aco. Maze nan birwa bi u wuza iyabo u vunu, mə bǝnu konzen ma bezezze tegogoro kima aza Yeso, ma ru o zoro o Jone ze base. ²⁶ Apollos ma me u bənu təndəsi ənyimi Synagogue, Se Priscilla nan Aquila ŋa kuna me, ŋa waŋ nan me a re kero nze ŋa beze me uruna uwə Ədəshəri geten. ²⁷ Se ma ŋuna birwa bi uwaka a Achaia, enze reno ri piyə mi nan nlen Konzen ŋa darse ere a ka atuma Ədəshəri a Achaia da ŋa kai me. Se ma deŋe, ma male ano ageme se ŋa yiya birwa baka ogwene gaŋka. ²⁸ Apollos wa wushi duli aza magita ma maŋe nan ti Jews əji ano o bezezze ǝsuru an nlen mǝ Ədəshəri se Yeso ze Ukase.