NGYI 4

1 Wu gir a yo puru bo'olo nga chele sun ban, ku dduwam nga sun kun ka'ana ku kalang nwagna hong' Beh jimmu bah wo'o dwa i mur lo'o yam bene a mur tong nyeru chew ne, la'ahu yiwa yo nini, mu rumo i girba ningya mgba'a a ho yo pa'a, wu gir na yo puru bwa'alama." 2 Muni-muni Mpilar ka jihama nga sun ho ku duwam ban ningyi renghe ku kalang i bwara ningya ho. 3 Beh bah ningha ho muri i bene tah puhu, i tah ma ba'ai bah ai girshi nkuri miliu i yi. I mungah bah i bene tah bah ta'aha kelep mpulung- mpulung yi, ninghi karngya beh ban ningyi renghe. 4 Ho beh karngya ban bah. ban ningyi regnhe ma ham, wu muna ban ningyi renghe lum baring i kuni yinung a bassa puru ningir i wu jeh a ningira ho murya. A wu yi'isa puhu twan i wu kata ma ba'a tah (Zinariya) ku ka'amurya. 5 Ku yo beh ban ningyi renghe she'eme ningyi nda li pur i yo ho, wu jimmu i wu ngya mwarang ma kalang. Ku dum beh ban ningyi renghe, wu fitila tangnzah baring ho mur bwol bissa, Ya wu mpilar tangnzah baring ma Baku. 6 Ho kpa nah ku dum beh ban ningyi renghe gima ho bene teku ma gilas, i do i meng to'ongo sa. purai bene tah bah ai tu'uli ne kiristal. Ku chichiri beh ban ningyi renghe karangya ban, wu ngyam gima bah ai nchimya i wu ngya'a misya mala ban ku dum ya i nzum ya bwa. 7 Mo'on ku ciri beh gima ma i bene Yimma, ma baring yi i bene mun ndta'a, ma tarung yi i mishi bene ma bapina, ma yinung yi i bene buhul bah i lel yiwa. 8 Wu beh gima bah nchimya yinung ma, bwang ya ai kikauya tangnzah, ai wu ngya'a mishya mala ban ku yir ya, ku nzah i bwi bwa; i duhu i missa a doi noss sa, ai ninghi nda chew ne, "Ma shimai, ma shimai, ma shimai, yi bahjeh Baku ma shimai, yi wu ma dwai, yi ni mani, yini ku yo dwa bwa!" 9 Wu beh gir bah ai nchimya ma a ning nda pi bongyo, i toh lu'ulu yiwa, i so'o nzah pa, yi bah ningha ho ban ningyi renghe. yi bah ko ning i nchimi ma hueng i ma hueng. 10 Wu jeh lum baring i kuni yinung ma a kwa'aha ku'uru su'ula ho ku dum beh bah ningya ho ku ban ningyi renghe ma, a mur so'onzah pi, yini bah i nchimi ma hueng, a wu'uhu kata ma ka'a murya chi'ihi ho ku dum ban ninghi renghe, a mur ma'a she'ele, a mur chew ne; 11 " We a jina, bwajeh i Baku su, wu ya'a rungdung bongyo, i toh lu'ulo yiwa, i ngyarngya, wuni a pa'ana wu gir bwang, i yereu a pa'ana ya, a ningya ham bwa."