1 1 Bah duduhu pa'a be wu mo'oro beh Prist i wu jeh mau bapina a ben kunya ne awo i Yeso. 2 A kuri, a toli kwanshere a shen wari pii Bilatus beh mor bah sun nzaah.' 3 Bah Judas ba li chihi sun ne Yeso tah nzaah, bun yere zuss ka'amuri ka bunyerwa i beh ngya'abolo ma puhu ngya'a tah lum tarung wa wu beh mo'oro wu bah sun lah Baku i beh wu jeh mau bapina. 4 Chew wa ne, "A bunyere chiwai ne masu man ku chiri? "suni ka'a muro giro" 5 Beh Judas so'o su'ula i beh ngya'abolo ku beh ka'ana Baku ka kwanshere shen ge'er ka'amuri. 6 Beh mor beh Prist Kau beh ngya'abolo ma puhu ngya'a tah ka chew ne, "do bwangna a bunyere so'o beh ngya'abolo mani ku ban so'o sah.Chew ma ningna kuru Shila. 7 A lo'oi i yirya be chew ngya'abolo billi. A yere a kur nzaah ma ba'a kwere ne ayo lishi wu wee ho bwanai. 8 Chew bili, a chu'ula beh banii ne "nzaahban ma shilla. 9 Yo rusu gir ba a wo chiwa ku kun Irmiya ne, "A wo ya'a beh ngya'a tah Puhu lum tarung be kuru muri ku bau Israila, 10 Yi bah a pa chew Che'e ba'a Kwere, bene bah Baku chiwam." 11 Yeso yo chele ku dum bah sun nzaah ka muii ne, "Weh be Gom Yahudawa?" Yeso yerai ne, "Weh a chiwa na'a." 12 Bah wu mo'oro bapina i beh wu jeh wu jeh mau bapina a sa buhu iyi, do'o yer wa ne gima sah. 13 Bilatus chew ne, "A wa'ana wu gir bah amu sa bukya iwe ku mur yah?" 14 Yeso do fa kuni lo'oi ne gima sa, beh bah sun nzaah sun gir bah mii sayai. 15 Ku ban beh li bila, wo ningna gir ba ai pi'i ba ai ne a purui bwara mo'on bah wu bapina ya njila. 16 A woi bah biwa bah nshiwi magina ho bah a woi chu'uli ne Banabas bah wo ku be lah nengye. 17 Bah ayo kam mur ya, Bilatus mweh ya ne, "Mu ma'a wun buk yen? Barabas, ke Yeso bah ai chu'uli ne Kristi?" 18 Bilatus shi'ila ne a war Yeso yuana bii chew amur pa'a mishiw iyi. 19 Bah yo yewe ning ku mur ban renchewei, maami chum lo'o mashen bii ne, "Do pa'a gima i beh bapina mani bah do pa'ana gima sah, linah chiri kuma mi ku loro ku mur beh bapina mani. 20 Beh mo'oro wu Prist i beh wu jeh mau bapina a ma'a wu bapina ne a chewne a ma'a buk Barabas ne a wol Yeso. 21 Bilatus mweh yah ne, "Ma yewe yah bah wu njila ne mu ma'a buhi wun?" A chew ne, "Barabas." 22 Bilatus chew wa ne, "Mu pa'a mani Yeso bah ai chu'uli Kristi?" A yer bwang yah "Kpangyi ku ghanna ngo'oro." 23 Yi bah chew ne, "man, pa'an mani billi?" A ngyarngya yiryah a mu chew ne, "Kpangyi." 24 Bah Bilatus sunne ko do'o ngyi pa'a gima sah, bene ba beh wu bapina a wo yoh nda ya'ara ban, ka toh mu'uru ka zuss buhi ku dum beh wu bapina, ka chewne, "Purai i buham ku beh shilla bapina mani bah do pa'ana gimasah. Wu sun i ka'a mur wun." 25 Beh wu bapina mbwang chew ne, "Ne shillai ning ku mursu iwu munsu." 26 Yi bah Bilatus ma'a buk Barabas waah,ka ma'a ngya Yeso a wari mashen nda kpang ku ghanna ngo'oro. 27 Wu bah sun ning leleh ma bah mur nzaah a toh Yeso mashen beh mor ban ma ningna mau bah nzaah ai shen kau wu gamur be bah ning leleh nzaah, 28 A wu'uhai ka'ala ku yiri bwang yi ma a yishii mba'a twan ku yiri. 29 A bah kahra ma zuwe a yishii ku ka'amuri a pii ghara ku buhi ma lih. A ku'uru ku dui amu peh kuni amu chew ne, "Ning shima, gom mau Yahudawa!" 30 A tai titar ku yiri, a ya'a beh ghara ku buhi a ngya'ahi iyi ku ka'amuri. 31 Bah a mala peh kuni, a wuhii be ba'a twan a bunyere yishii mabhii, a wari mashen nda kpangyi. 32 Ba a pur pura, a kum bapina magina ba lu'uli Siman, a mi'i ma kiri ne i sheni yah ne i toh be ghanna ngo'oro bah a she kpang Yeso ho. 33 A shen ji bana magina bah ai chu'uli ne Golgota, ba yini, "Bhana mo'oho ka'amuru." 34 A pii mu'uru bil nguni bai ai lih billi a binai i yangna mu'uru ne i noh. Bah Yeso jihi sunu, be'ene noh. 35 Bah a yo Kpanyai, a sa'anga twanyi a kusu bukya ne bah na linah ka kumu. 36 A ning ho bani a mur ning lelei. 37 Kalang i muri, a chi beh sah bukya ho, bah bal ne, "Mani yi Yeso, Gom wu Yahudawa." 38 Wu bah nshiwi baring a wo kpangnai iya, mo'on ku buhi malli, mo'on ku buhi ma musum. 39 Wu bah amu bo'olo ku ngishere a peh muni a mur nzhi'iri ka'a murya. 40 A mu chew ne,"Weh bah wene wo she'ele beh mor ka'ana Baku a yo bunu yere ba'a ku nongyo tarung, tah buk ka'amuro! ana ne weh mun Baku, su'ului iyo beh ganna ngo'oro." 41 Ku nshere mo'on beh wu mo'oro jeh ma ka'ana Baku a wo mu peh kuni, i wu bah she'ele mpuknsheme i wu jeh, a chew ne, 42 Yi tahna buk wu gina, do ngina tah buk ka'amuri sah. Yi beh Gom mau Israila.I su'ulu iyo ho beh ghanna ngo'oro kah su pa ngichewe iyi. 43 Pa na ngichewe I Baku, beh Baku shi tah buhi imani, ne beh Baku na yira i bassshi. Yi chiwa ne, "mi mun Baku." 44 Ku nshere mo'on beh wu bah nshiwi ba awo kpangna ya iyi a peh kuni kpanna. 45 Ku yo bolo tangzah mashen bolo tangshing pina ban kusu beh ram. 46 Ku bolo ma tanshing, Yeso zolo i mor zhimyu ka chew ne, "Baku yam, Baku yam, pa'ana lan a pirwi nsho'o panam?" 47 Wu bah wo chiila ho bani wo'o na'a a chene, "Imu chu'ulu Iliya." 48 Hoh bani mo'on yah bangya shen toh sosoh ka yis ku ya'angya mu'uru bil nguni, yis ku gahara zuwe ka pi'i ne i nuh. 49 Wu gamur yah chew ne, "zhi'ingi lo'oi, su shio sun Iliya na yo tah buhi." 50 Yeso ka bassa zoloi i mor zhimyu ka ma'a buh nchimi. 51 Sunu, beh twan kusu ban ma ka'ana Baku yo gawa pur baring iyo kalang yi ma yo nzaai, beh nzaah zhi'iri, i wu ta'ah gan baring. 52 Wu mur sh'ilah a fa'aha, be yir wu bapina bah a wo wuna i ngichewe yah a la'ahun ninyii i nchimyah. 53 A yo purii beh mbhu shilla ku zhum bah la'ahun i nchimu iyo beh mbuhu, bor beh Puhu ram, ka pur wa bapina bwana. 54 Ɓeh wu mvorong i wu ɓah a wo ningna leleh Yeso sun ɓeh zhi'iri bol ya bah a chew ne, "Ngichewe mani woh mun Ɓaku," 55 Wu maam ɓwana ɓah a wo wara ta'ah Yeso iyo Galili ne a gishi suni awo chila ku pim a mu sunu. 56 Ku chiri yah wu Maryamu Magadaliya, Maryamu ngyi wu Yakubu i Yusufu, in ngyi wu muna Zabadi 57 ɓah kurwa pa'a, ɓah murum magina iyo Arimatia, lu'uli Yusufu, ɓah yi ma wo bah ye'ele chumu Yeso. 58 Yo par Bilatus ka mwe ne a pii ɓeh loh Yeso. Bilatus ma'a ne a pii ɓeh yir Yeso. 59 Yusufu to ɓeh yir Yeso, wangyii ku piwi twan, 60 Ka mi'i ku piwi mpuk shi'ila mabii ba a kwa,arai ku yir taah. ka chur mor taah gir ɓeh kun mpuhu iyi ka yo kwansherei. 61 Maryamu Magadaliya i ɓeh wu gamur maryamu a wo hoh, a ningna ku kanyieh mur shi'ilah. 62 Ban yo fah, bah wo ningna dukgirshi girshi ban, beh wu mo'oro Prist i wu Farisiyawa kam mur yah ku ba Bilatus. 63 A chew ne,"Bwaje, su ri'isa ne bah lere ma wo shii nchimi chew ne "ku zhum nongyo tarung moh la'ahun kpa.'' 64 Yi bah su nere ne ma a ning leleh be mur shi'ilai shima ne duk tarung na pa'ama, na do na sah wu muna ye'ele tumui ayo toli sormo a chew wa bapina ne "I luana ku chir wu bah wuh,'' beh lere ma zhum mani ko gan ma duwai. 65 Bilatus chew wa ne, "Wu toh ba ning leleh ne wu gishi ning beh lelei shima bene bah wu njila," 66 A la'ahun shen ning be leleh shima, a gishi sun beh taah ma kun beh mpuhu a chi bah lele hoh.