1 Beh lah ma kalang ko ning bene wu muna sarri lumah a kau wu gir chi bissa yah a shen nda ya'a maam piwi. 2 Wu tongnung yah ai ka'amur yah ma shimai, wu tongnung yah wu mgbuchuk. 3 Beh wu mgbuchuk sarri a kau mu gir chik bissa param i muru. 4 Beh wu sarri ba ai shima da'amur yah a kau wu gir chik bissa i wu mpus muru. 5 Beh ba burapiwi bah i ya'a beh bamaam do ka'a yo sa, tolong bolya a nong tolong bong yah. 6 Bah ciciri duhu yoh, a ngya kunu ne beh bahbura yuama, a la'ahun she yi'i, 7 Beh wu muna sarri mbwaang a la'ahun nda chik bisa ku gir chik bissai yah. 8 Beh wu mgbuchuk sarri mweh beh wu sarri bah ai ka'amur yah ma shimai ne a pawa mur bissa yah, ma'a yah imu wuh chew param muru. 9 Beh wu sarri ba ka'a mur yah shima a chew wa ne beh mur bissa ko do ji su iwun sah, wu shen bau bah kuruh ne wu kur beh muru wun. 10 Ba a la'ahun shen nda kur beh muru, beh ba burah yoh, wu ba awo ho bani a kwa nshere iyi mashen bana lilih i noh nuh ma ya'a maam piwi a yoh gir beh kun ka'ana. 11 Yo ning ne beh wu mguchuk sarri ma a yo kikang yo a ngya kun ka'ana ne a fahwa. 12 Ka yerwa chew ya ne, 'Ma ngichewe mu chew wun, do shi'ila wun sa.' 13 Wu ning leleh, chew ma wu do shi'ila duk ke ban sa. 14 "I bene bah bwara wo yo nda shen shene. ka chu'ulu wu korom yi ka pawa murum yi. 15 Ku ba mo'oni pii talenti tongnung, ka pi magina baring, ka basa panai mo'on talanti mo'ona. bwang ya a ya'a beh murum ku mur ngyarngya ba ai yi, yi bah beh bajeh yah yo kwa nshere. 16 Beh bah ya'ana ban so'o tongnung ma shen pa'a tumu iya ba yo warri, ma muri talanti tongnung. 17 Ku nshere mo'on, ba ya'ana talanti baring ma sheneshe pa'a tumu iya ka yo kum baring kpa ku muri 18 Beh korom bah ya'ana talanti mo'ona ma kwa nsherei, she gha mpuhu ku nzah ka sormo beh ngya'abolo ma bwajeh yi. 19 Bah yo ningna mgbang, beh bwajeh yah bunyere yo ka mwe yah ne a war beh wu ngya'abolo ba wo pawa ma wuna. 20 Beh korom ba wo ya'a talanti tongnung ma yo war talenti tongnung yo iyi. Ka chew yi, 'bwajeh ne, a wo panayam talanti tongnung. Sunu, pirwa muri kuma talanti tongnung. 21 Beh bwajeh ka chew yi ne, mu za'aro, we korom ma ngichewe! A pa'ana ngichewe ku mur gir chige'ei, mo me'eu ku mur gir ma mwarai. Bor ku bong nchimu ma bwajeu. 22 Beh korom bah ya'ana talanti baring yo ka chew ne, 'Bwajeh, a panam talanti baring, Sunu, mi pirwa muri kuma talanti baring.' 23 Beh bwajeh ka chew yi ne, mu za'aro, we korom ma ngichewe! A pa'ana ngichewe ku mur gir ma chige'ei, mo me'eu ku mur gir ma mwarai. bor ku bong nchimu ma bwajeu. 24 Yi ma beh korom bah ya'ana talanti mo'ona ma ka yo chew ne, 'Bwajeh, shi'ila ne weh bapina ma ngyarngyai nchimu wei chene ku ban ba we do billa sah, wei yumu ku ban bah we do missah sa. 25 Ji'iri bwalam, yi ba shen sormo beh ngya'abolo yo ku nzah, Sunu, wei yi ha ni gir ba ningya moo. 26 Beh bwajeh yeryi ka chewai ne, weh korom ma biwai, a shi'ila ne mii chene ku ban bah do billa sa, mii yumu ku ban ba do missa sa. 27 A woi pana ngya'abolo yam wa ba chi ngya'abolo, ngha yo ya'a ngya'abolo yam i wu ma muri. 28 Na ningna na, wu ya'a beh talanti mo'on ku bii ne wu pii bah talanti lum. 29 Bwara bah na iyi bwana, a pii bwana, ne i ningyi bwanai. A yo bah bwara bah ido'o iyi sah, beh mu gir bah iyi ma a ya'a ku bii. 30 Wu buk beh korom ma biwai ku nzah ku pinai ban bah ko ningyi nda zolo i she'e ngyirngyiu.' 31 Beh mun bapina na yu'ana ku lemmi i beh wu muna tumu Baku ai yi, yi bah ko yo ning ku gir ningyai ma jeh. 32 Ku duwi a kam mur wu rammuan mbwang, yi ba ko yo fa'aha beh wu bapina langya langya bene ba ning lele wu nzur i fa'aha wu nzhur i wu mpili. 33 Ko chik beh wu nzur ku babuhi malih, wu mpili ku babuhi ma musum. 34 Be Gom ka chew wa bah aku kang buhi ma lih, wu yo, wun bah Dă lo'ara wun, wu kum beh mpuru ba a wo girsa wun ku you chikta'a ramman. 35 Nsalla wo mur wallam, wi pam billa, was mu'uru wo mur wallam, wu pam mu'uru, wo ningya bah biri, wu ya'am ku lahwun. 36 Wo ningna danggbirimgbi yam, wu yo yisam twan, wo kwa'anga yiram, wu yo gishi sunam, wo ko lah nengye, wo shen sunam. 37 Yi ma wu ba Puhu nchimu a yere chew ne, Tarsu, su suna we ba'ayewe bah nsalla mur wolo su panau billa? ke was mu'uru wala we su panau mu'uru? 38 Su wo suno ku he bah biri sa ye'eu ku lahsu ke su wo suno ku he danggbirigbeu su poh twana? 39 Su suna we a kwa'anga yiro, ke ku lah nengye sa shen boh? 40 Beh Gom ko yo yerwa ka chene, ngichewe mu chew wun, beh gir bah wu pa'ana ku ciri wu beh swana ma chige'ei mani, wo pa'am. 41 Ko chew wa bah aku buhi ma musum ne, wu la'ahun ku gingyam wu bah a suha wun i kunu mashen bissa ma hueng ba a pa'ana yi ba lere i wu muna tumui. 42 Nzalla wo mur wallam, wu be'ene pam billa, was mu'uru wo mur wallam, wu be'ene pam mu'uru nuh. 43 Wo ningya bah biri, wu be'ene ya'am, wo ningya dang gbiribing yam, wu be'ene yisam twan, wo kwa'anga yiram i wo ku lah nengye, wu bene sunam. 44 A yere a chew ne. 'Tarsu, su suna we i nsalla ku he, ke i was mu'uru,ke bah biri, ke dang gbirigbing, ke a kwa'anga yiro, ke we ku lah nengye, sa do gishi suna we sah? 45 Yi ko yer wa ka chene, ngichewe yima mu chew wunu, beh gir bah wo do pa'a i beh mu chige'ei mani sa, wo pa'am. 46 Wu warri a shen mashen melem ma hueng, wu bah ngichewe i Puhu nchimu a shen mashen nchimu ma hueng.