1 Duk missai mo'on Yeso i mur bo'olo ku swa i duk Asabar, nsalah wol wu muna ye'elei, a ning ku nda wo'oro ngya'a billa ma she'e! 2 Wu be Farisawa sun girmani, a chew yi ne, sunu girmani, a chew yi ne, "sunu! wu muna ye'ele wo amur pa'a girbiwa duk missa Asabar. 3 Yeso ka chew wa ne, wu do balla girba Dauda i wu bapina pa'a na missa ba nsalah wo wolya sa? 4 Wu bor lah Baku, i wu bapina a li billa ba do bwangna ne a li sa, billah bah wu ba sahsah yanai li lo'oya. 5 Ke wu do mbala be mpuknsheme rengchewe sa? Ne wu ba sahsah ku lah nere Baku, ai tol ya ne a do pa'ana girbiwa sa? 6 Mu mur chew wun ne, ba gana be lah nere i ham. 7 Wa shi'ila be ngya'a lo'o mani, "mi njila sun chiri, do chew ton ngyam sa, wa do ghassa wu ba pa'a gir shima sa. 8 Beh mun bapina yi bah jeh ma Duk Asabar. 9 Yima Yeso ka ji'ingi banai, shen ma shen ka'ana nere Baku. 10 Bura magina wo ho bana nere, bah buhi zwasa. Wu Farisawa a mwe Yeso ne, I bwangna ne a wuk ko'ongoi toloi duk Asabar? A mur pe'e ma a chew ne pa'ana girbiwa. 11 Yeso ka chew wa ne, yen ku ciri wun, ba i nzur, mo'ona, be nzur ka kwana ku mpuhu duk Asabar, ko do sung-wosoi boro pur i yi sa? 12 Bapina bongyo gana nzur! Na ningna na i bwangna ne a pa'a gir ma shimai duk Asabar? 13 Yeso ka chew yi sonoh ma ne, "Nara buho." ka na'ara buhi, beh buhi ma biwai bunyere ning bene buhi ma shimai ma. 14 Wu be Farisawa a pur mashen nzah a ningyi re'enge i yirya, a mur pe'e nshere ba a wol yi Yeso. 15 Yeso sun girmani, ka la'ahun nji'ingiya. Wu bapina bwana puru war chi'i, ka zus wa ko'ongo ya so'oto'o iyi. 16 Ka pa wa kunu ne, a mi pa'a ne wu bapina a she'ele ne yi sa. 17 Ne mani i ning nah (rutsu) ngichewe bene bah a chiwa ku yo kun Ishaya ba sun duwa. 18 Sun korom yam bah twalai; bah njilai, chimam i bwangna yiram iyi. moh ma'a mpilar yam ku muri ko ngya kuni i reng chewa wa gamur wu bapina. 19 Ko do ngyarngya yiri ke i nzo'olo i ngyarngyai sa, ne bwara mi wo'o jimi ku nginshere sa. 20 Kika'a bah na gugwa'ana ko do buni sa; ko do wol bissa bah i mur tah lele sa; ko war rengchewe mashen ba a ho kum ngichewe. 21 Ku ciri lu'uli gamur wu bapina a wo ma'a nchimya." 22 A war magina bah tahwah, i wu bah mgbing yi, ba wu gung bwalai, yo ba Yeso. Yeso ka wu'uhu be ko'ongo so'oto'oh iya bwang. Bura ma ka ngi lo'o i sun ban bwa'a. 23 Wu bapina bwang a fa'aha kunya a chew ne, beh bura mani yi mun Dauda?" 24 Wu beh Farisawa wo'o chew gir mani, a chew ne, "bura mani ko do ngi pur i wu kila sa, shee Beelzebul, mun Gom wu kila," 25 Yi Yeso she'ele gir bah a mur re'eshe ku chimya, ka chew wa ne, "Ram ba a na gawa ka'a murya, ku duwa a ho ning bene ka'alah, ke lah lah ba ana gawa yirya a ho do ngi chele sa. 26 Shetan na tota'a shetan pira, ningya ne i gawa ka'a muri. I lan ka ho ngi chele? 27 Na tota'a wu kila pura iya, i ngyarngya ma ba'alazabula, i yo ngyarngya ma yen wu mun wun a wui pur i wu kila? A ho ning wu ba reng wunu chewe. 28 Kpah ma na tota'a wu kila pura iya i mpilar Baku, (Mulki) Baku yo ningna ku murwun. 29 Ko pa'alan ba bwara ku bor lah bah ngyarngya kau ka'alai do shi boli kurama sa? Na boli kurama ka ku ngi kau ka'alai yo wo lih. 30 Bah na do i mi sa, i bina mi, bah na do mur kam mur gir i mi sa, yi ba Kpasang so'oto'o. 31 Na ningna nah mumur chew wun ne, wu girbiwa, i lo'oh lilim a ho zusu so'oto'o wa bapina, lo'o lilim ku mur mpilar bili a ho do zusu so'oto'o yi bapina sa. 32 Bwara bah na lo'o chew gir biwa ku mur mun bapina a ho zusu so'oto'o yi. Bwara ba na lu'ana biwai ku mur Puhu Mpilar, bili a ho do zusu so'oto'o yi sa, ko i yo ha njilu mani ke, njilu ba wuna. 33 Bil nguni ma shimai, ko bil wu muni ma shimai, yi bil guni ma biwai ko bil wu muni ma biwai, a shi'ila nguni i bilih. 34 Wu muna wasang, wu bah pa'a girbiwa, i lan wah mur chew gir ma shimai? I yo gir bwana ba ku nchimu mur kunu i lo'o. 35 Bapina ma shimai ku yo shima durung ma nchimi a kum gir shima, bapina ma biwai ku yo biwa durung nchimi ka pa'a gir ma biwai. 36 Mu mur chew wun ne i duk rengchewe bapina a pa girma a pa'ana ku yo gir ba lu'ana. 37 Ku yo ngya'a lo'o ma kuno a wo tah buho, ku yo ngya'a lo'o ma kunu a wo'o pa'a biwa iyi. 38 Bah ngyo'olo i wu Farisawa a yer yi Yeso ne, "bah sahsah, su njila sun gir, mom chii sai yo bwo." 39 Yeso ka yer wah ne, wu zhee bah pa'a girbiwa, i wu ba po'ongo wu maah bapina yenai war ta'a gir mom chii sai. Bah gir mom chii sai ba a ho pah, shee gir mom chii sai ma ba sun duwa Jonah. 40 Bene ba Jonah nong missai tarung i duhu tarug ku bum mwara nshi, ko ning na ne mun bapina ka nong missa tarung i duhu tarung ku chiri nzah. 41 Wu bura ma Nineveh a ho la'ahu chele i mgba'aya missa reng chewe i wu zhee mani suhu yas gas chew ba a ya'ana Baku i lo'o ba Yunana wo lo'o wa. wu sunu, ba gana Yunana yuama. 42 Maam Gom iyo ma mansah rengchewe i wu nzhee mani, ko suhu ya gas ne i yuana iyo ram ma pim-pim ne wo nzur ma Solomon, wu sunu, bah gana Solomon yuama. 43 Mpilar ma biwai na purai yo yir bapina, i war bah na bah mu'uru param ne ku kum ban nos, i pe'e ban boro; 44 Ka chiwa ne, "Mo shi bunyere mashen lahm bana bah purai yo ham." Na bunyira ma ku kum be lah a ye'eshe girsa. 45 Ko bunyere sa war wu biwa mpilar tangsa baring ba a pa gir biwa ganai, a ho boro sa ning wo. marsa ningna bapina ko pa'a biwa gan ma kirei. ko ning na i wu nzhe'e ma biwai." 46 Yeso wo mur lo'o i zam wu bapina, wu ngi i wu mu'uri a wo chele ta'arai ku nzah. A wo njila lo'o i yi. 47 Bwara ka chew yi ne, "Sunu, wu ngo i so'ongo a chila ta'ara we ku nsah a njila lo'o i we." 49 Ka nnara buhi mashen ba wu muna ye'ele ka chew ne, "Sunu, wu mani ya wu nno i wu suana! 50 Ba na pa'ana gir ba Dah ma njila, yana ningna wu swana, i wu sa'ana, i Nno."