NGI 9

1 A ho, kaa chu'ulu bee wu sooh ma, kahm murya mban mo'ona, ka, pawa nghat-ngha i renghe ku mur wu kila, i wu'whu nghaa ko'ongho langha so'otoh i ya. 2 Ka chum ya ne a sa kikang paa wa'azi cheu lah ma kalang ma Baku, i zus ko'ongho kau ku yir wu bapina. 3 Ka cheu wa ne, " Wu ma toh ka'agima cheu shen shene mani sa, ke gahrah, ko ka'a-zagba, ke fo'ofo, ke nghaa-bwalo, ke wu twan ma yirwun. 4 Lah baa wuna bwara ho, wu ning ho mbanai mashen juk missai baa wo la'ahu nzinghi. 5 Mbana baa a na bina wun, wu naa ku la,ahu nzinghi bee ram, wu ye'eshe puh-chun ma ngba'a wun so'o su'ula ne i ning pa-ashe'ele ku murya." 6 A la'ahu shen mashen wu muna-ram, a mur paa wa'azi bishara, i zus ko'ogho kau ku yir wu bapina ko he. 7 A wu ho, Hirudus Makaddas wo'oh gir baa i mur shen shens, chimi suhu bwana-bwana cheu baa wu gamurring wu bapina amur lo'oh ne, Yohanna ba baptisma wuh bunuyere tah ma. 8 Wu gamuring a ne, mo'on ku yochiri wu baa sun-dwa ma kirei yi wuh tahna. 9 Hirusdus ka cheu ne, "Mini yer ka'amur Yohanna twala; yan yi bee mini baa mu mur wo'oh wu gir ku muri.?" Ka njel ne ku suni. 10 Bee wu mangzani aa bunuyere yo balyi Yeso gir baa a paana bwang. Ka war ya la'ahu i ya ku swarmai shen mashen ram baa ai chu'ulu ne Baitsaida. 11 Bee zam wu bapina woo cheu gir muni, aa la'ahu war chi'i, Yeso ya'ahwu bee bapina, ka lo'oh wa ku mur lah ma kalang ma Baku. Wu baa a wu njel ne yirya bong wa, i wo w'uhu bee koongho yirya kau bwang sootoh i ya. 12 Missa wu su'ulu yua kur wa, wu bee sooh ma yo mbi cheu, chur wu zam mani la'ahu i ya ne a sa kum mban nongho i billa ku wu muna ram baa a ha pwer mbari su ku chiri to'oh." 13 Ka cheu wa ne "Wu pawa gima ne a li." A cheu ne, su doo i gima sa, gir ba yirai ha mbasu yi fo'ofo bwomi tong-nung i nghaa nshih baring-shee su sa kur wa billa. 14 (Wu bapina a wu sa njina bene lum gba'a lum gba'a lum gba'a tong nung.) Ka cheu wa wu muna ye'ele-yeelei ne, "wu ma'a ya ne ninhir kahm murya gba'a tong nung ku mban mo'ona." 15 A paa bene bili, aa ma'a bee wu bapina ninghir su'ula ho nsah. 16 Yeso ka tol bee fo'ofo tong nung i ngha'a nshih baring ma, ka tam kalang dong, ka, so'o nsa pi Baku, ka bongho fo'ofo i ngha'a nshih ma pawa wu nung yeele-yeelei ne a gau wa bee zam wu bapina ma. 17 Wu zamm wu bapina ma aa li rutsu bum ya; gamuring baa yerii a kawa rutsu wu koso sooh mo'ona. 18 A wu hoo Yeos wo mur nere Baku yi loi, wu muna yeele-yeelei a wu ho i yi, ka mwe ya ne, wu bee zam ane mi yam?" 19 A yer yi ne, Yohanna baa paa baptisma. Wu gamuring ne, we Iliya, wu gamuring ne we mo'on ku yoo chiri wu baa sun-dwa ma kirei yi wuh tah na" 20 Ka cheu wa'a ne, wun wune mi yan? Bitrus yer yi ne, "We Kristi ma Baku." 21 Ka sung bumurya ne a mi cheu yi bwara sa. 22 Ne, "Mun- bapina ko ning yi kper nr, i li lulu, i wu gir bwana; wu njeh, i wu baa nsa-sah, i wu baa nghyo'olo- nghyo'olo a ho beni, a ho buhu yere la'ahu i chimi" 23 Ka cheu wa bwang-ya ne, "Baa naa njila war-ta'am, i ningha kper ne i beneh ka'a muri toh nyun-ta'am. 24 Bwara baa na ne i ra'atsa chimi, ko doo kum bee sa, baa na ne i pa chimi cheu mi i mur ra'atsa bee chimi. 25 Ta'ari man, bapina ko kumu naa kuma tah rsmuan bwang, ka pee chimi bwara, ke doo kuma chimi wara. 26 Ba na mur pa'a nzoon yahm i looh ma mbau, bee mun-bapina ko paa nzoon yi na yua i rung chung bonghoi i rung chung bonho ma Tari, i wu maleka ma shima ya. 27 Mu mur cheu wunu ma ngichewe, wu magina chila ha neni ku chiri wun, a ho doo she'ele wuh sa, shee a na shi suna lah ma kalang ma Baku. 28 Wu bene nongho ya'agah, wu puru bwa'alama Yeso ka cheu lo'oh mani, ka war Bitrus, i Yohanna, i Yakubu shen mashen mur gboo nda nere Baku. 29 Bene ba'a wo ho mur nere Baku, mishi pirwi, wu twan ma yiri bunu-yere ning puhui pyak bene muhu labo. 30 Wu bapina baring a wu mur looh i yi, Musa ai Iliya, 31 A wo saa puru i rung chung bongho, a looh cheu, missa wuh-yi baa ka dji (rutsu) ku Urushelima. 32 Bitrus i wu baa a wu ho i yi, mis-ya wo lu'ura i tolong, a ta'aha yo tolong sun rung chung bonghoi, i wu bapina baring chila iyi. 33 A la'ahu ku mur kwanshere-ya ku yo mbaa Yeso, Bitrus ka cheu yi ne, "Baanjeh, koo bong ne su ning ha mbari mani. Su tah ka'anyiling tarung, moon ma bwo, moon ma musa, i moon ma Iliya." (Wu do shi'ila gir ba wo mur chewe sa.) 34 I shi wu ho mur looh gir mani, rung-chung ka yo kusu murya, aa bang nzi'iri baa a bor ku bee chiri rung-chung a mur shene. 35 Zinghi pur i yo ho bee bum rung-chung, i mur cheu ne, "Mini yi munam, bee ba a twalai, wu wo'o kuni." 36 Bee zinghu baa lo'oh ma, a sa kum Yeso wo loi. A ning kiring, a doo cheu yi bwara cheu girba a suna ku juk wu missa bili sa. 37 Mban puru fah, a la'ahu su'sulu i yo ho mur gboo, zam wu bapina a yo pari. 38 Mbura magina i yo ho chiri wu zam ma, kaa nzolo cheu ne, Ba nsa-nsah, mu mur niroh ne, e, sun munam mini, yi munam moona ba mi yi. 39 Mbilar magina ii boli, naa bwolai ii saa puru nghaha kuni, ka ning yi nda mirwi yiri, wu chitar ai to'o pur i yo kuni. Yi ning gbang ka ku ma'a buhi, shee na toli luaha ngha yiri pura penghe ka i nzinghi. 40 Wu nere muna yeele-yeeleu ne a wuk bee mbilar pur i yi, ma kiri i yo bee yir mbamun, a doo ghi pa'a sa." 41 Yeso ka yere, cheu ne, " ka'a wu nze'eh ma biwa, wui doo pa'a ngichewe sa, mba'a yewe ninghi kur chimam i wun? War bee muno wuno nini." 42 Bee bamun wo shi sa'ana, biwi mbilar ma kami, toh buh su'ula ku nsah, ka'a nghaha yiri'i wu chitar a mur to'o pur i yo kuni. Yeso ka she'eh chewe mur wu mbilar ma biai ma, ka pir ya bwang ku yo yir bamun, ka wari buhuyer pi yi tari. 43 Bwanya a ninghi faha ka'a kun ya ku mur mwaragir ma Baku. Wu bapina bwang a mur renghe ku mur wu gir ba Yeso pa'ana, ka cheu wa, wu muna yeele-yeelei ne. 44 Wu gishi woo looh mani shima; A hoo bol mun-bapina pawa wu bapina baa paa girbiwa. 45 A do she'ele bee gir mani sa. A swarma wa'a, ba a ho do ghi she'ele sa, a wo mur bang nzi'iri ma mwi ku mur wu gir mani. 46 Lihnan ka la'ahu i yirya ku mur yan ku chiri-ya ba ko ning yi ba'anjeh. 47 Yeso, sheele girba i wu mur shen-shere ku chim ya, ka to bamun ma chige chihi hoo ku kanghi. 48 Ka cheu wa ne, "Baa naa ya'ana mun mani ku lu'ulam, i ya'ana mi, baa naa yaana mi, i ya'ana baa chuma mi. Baa na shiwa ku chiri wun bwang, yi ni baanjeh." 49 Yohanna ka yer ne, " baanjeh, su sung sano magina i maa wu yung pur i ya ku chiri lu'ulo, su pirai cheu baa, i doo mur war taa su sa. 50 "Wu ma piri sa," Yeso cheu ne, "ba'a naa doo bina wun sa," baa naa doo bina wun sa, yi ma mba wun." 51 Bee juk massai wu ta'a pwer ku dji baa ayi ku kalang, ka du dwi ku shen-mashen Urushalima. 52 Yeso ka chur wu magina ku dwa i yi, aa sa bor ku mu-ram moon ma samariya nda girshi wu gir yi hoo mbanai. 53 Bee wu bapina ma mu-ram bili bene ma y cheu ba wu chiha dwi ma shen-mashen Ushalima. 54 Wu muna yeele-yeelei Yakubu i Yohanna sun gir mani, a cheu ne "Bajeh, a yira ne su ma'a bissa i yo kalang gas wu mani?" 55 Yeso ka pirwi she'eh chewe murya. 56 A bwo'olo shen mashen mu-ram magina. 57 A wu hoo ku mur shene ku chiri ngi-shere, magina cheu yi ne, "Mi mu war ta'a wun mashen mbana baa wuna shene." 58 Yeso ka cheu yi ne, "Wu fah swa ai puh-lahya, wu nghiling ma kalang ai lah ya bwa, yi mun-bapina i doo i mban baa i maa ka'amuri sa." 59 Ka cheu yi magina ne, "War t'am." sono ma ka cheune, "Baanjeh, yer yahm ne, mu shene sa lishi dah." 60 Yeso ka cheu yi ne, "Zinghi wu baa a wa'aha a lishi wu baa wa'a ha ma mbaya. Ma bwo, shene sa ma'a kuno ku pim, i wang mban, wa bapina cheu lah ma kalang ma Baku." 61 Magina gba'ai cheu ne, "Mi mu war ta'a wun,"Ba'ajeh, yer yahm ne mu shene sa cheu wa wu baa a ku lahm ne shee juk mo'on." 62 Yeso ka yer yi ne, bapina baa naa bwala keke sor-komo, naa mur bunuyere sun swi, i doo dji na baa ku bor lah ma kalang ma Baku sa.