NGI 16

1 Yeso mbassa cheu wa muna yeele ye'elei ne, "Bwarah magina baa nghaa-bolo ii bb tammur lili yi, aa war chewe yo bi ne, baa tam-mur lili i mur yaa bee lili suhu. 2 Bee bah ngyaa-bolo ka chu'uli mwi ne, " man yi-bili baa mu mur woo ku muro? Pam lissafi bee chumu baa wu mur paa, mo doo mbassa ning bah tam-mur lili yam. 3 Bee baa tam-mur lili ma lo'oi i ka'amuri ne, "man baa mu paa, baa lahm njila rat,atsu (yaa chumam? Mi doi nghyarngyha mamu komo sa, gir nzo'on baa mu nere) 4 Shi'ila girba mu paa naa wuha mi ku yoo kun chumu yam, wu bapina a wo yaam buya baring, baring ku lahya. 5 K chu'ulu wu baa a kwapa gir ku yo bee Baalih, ka mwe ma mo'on ne, "shi'ihe baa a kwapa iyo ba baalahm? 6 Ka cheu ne, mudu lum ngba'a lum ma muru; ka cheu yi ne, ning su'ula mwas-mwas, yy mbunze me ngo'olo. 7 Ka mwe ma baring ne, " we a wara che'eu shile?" Ka cheu ne, madu lum ngba'a lum ma alkama." Ka cheu yi ne, "yaa mbunzeme, ngo'olo lum ngbaa ya'angyha." 8 Bee baa lih kas ne, we baa paa girbiwa, mani a paa gir shima i nzor. Wu muna nsah (Duniya) ai nzor ma shen-shene i wu bapina ya ghana wu muna baa paa ngichewe. 9 Mu mur cheu wunu, wu paa chumu i nya'a bolo (lili) baa wu kuma, ku shere ma biwai ne wu kum wu mwan bwana, gir na yo paa param a wo yaa wun ku mban ningngyha ma wueng. 10 Baa nai paa ngichewe ku gir ma chigeh ko paa ngichewe ku gir magana, ba ii paa girbiwa ku gir ma muarai. 11 A na doi paa ngichewe ku paa chumu i nya'a bolo baa a kumai ku shere ma biwai sa, yan ko yer nei paa wun nghya'abolo (lili) ma shimai? 12 A na doo paana ngi chewe ku paa chumu i nghya'abolo ma bwara sa, yam ko poo nghya'abolo ma ka'amuro? 13 Ka doo bwong ne korom ning ning i wu njeh ma lili baring sa, ko ghi beene mo'on ku njel mo'on, ku tah kiri i mo'on. woo doo ghi paa chumu yi Baku i nghya'abolo sa." 14 Wu Farisawa baa ai njel ngya'abolo wo bee gir mani, a ning nyi nda nzo'oso kunya yi. 15 Ka cheu waa ne, "Wui ning wu baa ngi-chewe ku dum wu bapina, Yi Baku shi'ila chim wun. Ba a na twalai yiwa ku mbau bapina, ku ba'a Baku yi wassa ruwa gir. 16 Bee Attaurat, i wu baa sun-dwa mashen nze'eh ma Yohanna a ham a mur nda lo'oh cheu lah kalang ma Baku, wu bapina a mur ma'ah ka'amurya mashen mbwi. 17 Ko ning bene mu'uru puala, wu nsah i kalang paa param, i baa ngya'a ngo'olo mo'on ku yo Attaura i kwa. 18 Bwara baa na to ta'ah mani pira, ka bunuyira ya'ana gba'ai bahmam, i mur paa girbiwa (zina); ba na wara bee mam baa a to chi'i pirah, yi ma i mur paa girbiwa (zina). 19 Mbura magani baa lili ii muarah lah ma shimai, i li billa ma shimai, ii yiishi wu twan ma shimaya juhi. 20 Ku bee kun lih, a war ba nere magina chihai woo baa tamburi mo'oro mala yiri, lu'uli la'azarus. 21 Ii ningyi ta'arah kum ghamuring billa baa a mur kwaha iyo mban li-billa ma baa lili ma li. Wu fah ai yo leshe bee penye ma yiri. 22 Missai mo'on bee baa nere ma wuh, wu muna chumu Baku (malaiku) ta toli wara saa chiri ku ngeng Ibrahim. Ba lili ma ka wuh kpana a sa lishi. 23 Ku chiri bissa ma wueng ka to nya'a mishi yiwa sun Ibrahim wara La'azarus ku kum nku'ui. 24 Ka fah kuni chu'ulu ne, A dah Ibrahim, sun-chili yam, chur La'azarus ne i yi mun buhi ku mu'uru yo jik lassam i yi, mu mur li lulu ha ku chiri bissa. 25 Ibrahim ka cheu yi ne, "Munam, re'eshe missa baa a wuni nchimo, wei kum gir ma shimaya, La'azaru wui kum girbiwaya. Ha ninih La'azarus ningngyh i mur soo polo yiri, we wu mur li chiri. 26 Ku chi'chirisu i wun a kwa'ara mwara puhu ne, wu baa yo ha mbassu a wo bwarra yo mbawun ku tah-lu'uru moya ha mbasu." 27 Ka cheu ne, mu mur niro ne, we dah, kabuk chum la'azarus mashen lah Dah baa bila mi. 28 Mii wu suanah tongnung. Naa ma i sung mbumurya ne ya maa a doo yo ha mban baa mu mur li chiri sa. 29 Ibrahim bunuyere cheu yi ne, Musa wo mbawun, wu baa sun-dwa wo bwaah, nama a pa bumurya i girba a mur cheu wa. 30 "Wii Dah Ibrahim," Ka cheu ne, bwara baa wuhnah na shina mbaya awo woo kuni nzinyi paa girbiwa. 31 Ka cheu yi ne, "A naa paa wa'ana kun Musa, i wu kun wu baa sun-dwa sa, a wo doo pah ngichewe i bwara baa wuh-luana yo puhu sa."