1 Wu baa yaa nghya'a-bol nsah, i wu ghamuring bapina baa paa girbiwa a mur yo mbaa Yeso nda woo lo'oi. 2 Wu Farisawa i wu nah ngo'olo- ngo'olo a nzi-ghi i yirya ne, " Mburah mani i mur ya'ah wu baa paa girbiwa, i mur sa li billa i ya bwah." 3 Yeso kas wa to'oh magina, ka cheu wa ne. 4 Mahe ku chiri wun, baa nai wu nzur lum ngba'a lum ka mo'on ku chiri- ya borso, ko do nzinyi wu lum tangshing i kuni tangshing ku to'oh, sa pee ba. 5 Na sa kumai, ko toli ku gbarmeli i bwon-chimi. 6 Na yua lah, ko chu'ulu wu mwani i wu baa pwer i yi, cheu wa ne, "I bwan- yirwun kpana i mi, kuma nzur yam baa wu borsa." 7 Mu mur cheu wunu ne, ko ning naa ku kalang, ko ning gir bwon-yiru cheu bapina mo'ona ba ana zus girbiwa yi suanato iyi, ghan wu bapina baa paa ngi-chewe lum ngba'a lum i kuni tangshing ba ai doo paa girbiwa sa. 8 Bamam ba nai ta'ah ma shimai (Azurfa) lum, mo'on na borsa, ko doo moso ki kah pissa, pee bee mo'on ma i ngyhar-nghai shee na kumai sa? 9 Na kumama, ko chu'ulu wu mwani, i wu baa pwer iyi cheu wa ne, I bwon yirwun kpana i mi, kuma bee taah ma shimai (Azurfa) ba wu mbor sa ma. Inna, mu cheu wunu ne, bwonchimu ham ku dum wu wuna paa chumu (Malaiku) ma Baku ku mur ba paa girbiwa mo'ona ba ya'ana ngichewe. 11 Yeso cheu ne, " Mburah magina ii wu muni, wu muna sohno baring. 12 Ma nyeng ku chiri ya cheu yi Tarya ne, "Dah, pam girba i ningyha ma mbam ku lili ma mboo. ka gau wa bee lili ma ku chiri ya i so'ongi. 13 Do ning ngbang sa, muni ma nyeng ma ram ka'alai i girba wassa ma mbii la'ahu nzinyi lah shen mashen ram maginai i bee lili ma bii, wu ning-ningngyha 14 Ning nyi li bee lili yi malbwan, muara salla ka chu puru ku bee ram paanai, ka bor i pee shere ma i kum bila li. 15 Ka shene sa paa ka'amuri yi mburah ma ram magina; ka chumi mashen swah yi ne i sa paa bila wa njumuh. 16 Salla mii kah njel li billa mau njumuh ma, cheu ba doo kuma billa gima sa. 17 Musono ma chimi, ka bunuyere yo yiri, ka cheu ne, " ku lah Dah ii wu korom ba ai li billa, yer gamuring nzinyi, mi ha ninii, mur wuh cheu salla. 18 Mi shi la'ahu shen paa Dah, sa cheu yi ne, pa'ana girbiwa ku baa kalang i mashen mboo. 19 Doo njina ma a chu'ulam ne mi muno sa; twalam bene mo'on korom wo." 20 Musono ma la'ahu shen mashen baa Tahrih. I shi pim-pim Tahri kaa maa mishi suni, chimi laahu i sun-chiri, ka la'ahu banggyha sa boli ka'aghyi i nuh kuni bwaa. 21 Muni ka cheu yi ne, " A Dah, pa'ana girbiwa ku dum kalang i dooh bwaa, " Do njina ma a chu'ulam ne mi muno sa." 22 Bee Tahri ka cheu wa korom yi ne, wu toh twan ma shimai pur i yi ne wu yishii ku yiri, wu toh nyaa kpana yishi ku mun buli, wu toh nkuh ngbu'uh ma shimai yishi ku ngbi'i. 23 Wu sa bol mun nda'ah ma shimai yo yere, ne su sheeh, su kau yirsu. 24 Munam wu wa'amah, i bunuyere luaama, wu borsa, su bunuyira kumai. A bor i kau yirya. 25 Muni ma njeh wu shi ku swa. Yo ta'a pwer i lah, ka woo gang-gang i tah ngoom i mur la'ahu. 26 Ka chu'ulu mo'on korom mwi ne, man i maana a mur paa girmani? 27 Bee korom ka cheu yi ne, so'ongo ma nyng bunuyere yuama, yi baa Taro bol mu nda'ah mo'on yira ne su she'eh cheu baa i bunuyere yua lah shima. 28 Bee muni ma njel, chimi ka suhu, bene ma bor mashen chiri lah, Tari ka pur mayo nsa yo neri. 29 Bee muni ma njeh ka cheu yi Tari ne, "sunu mba'a-i-mba'a mu mur li chiri woo, doo biina ma woo kuno sa a doo paa yam mu pihi ne mu yere she'eh kau yram i wu mwanam sa. 30 Munno mani bunuyere yuama, baa kau lili sa paanawa barang zam a yo yirai ndaah ma shimai. 31 Tari ka cheu yi ne, " Munam, we hani i mi gbeng-gbi-gbeng, gir ba ma mambam ningngyha mo. 32 I mbwangyha ne su ki kau-yirsu, so'songo wu wa'amah, bunuyere luamah, wu borsa, su bunuyira kumai."