NGI 12

1 A ho juhi maganizam wu bapina bwana kahm murya, a mur ndangngar yirya. cheu zam ya, ka cheu wa muna ye'ele-ye'elei dwa ne, wu ghi shi sun mban i yeast mau farisawa baa ninghyha, looh lilim. 2 Bagir baa a naa kusai, a ho doo ghi fii wara; ke girba naa ku swarmai a ho doo ghi she'ele wara. 3 Girba a naa luana ku Jim-juhu a ho woo ku chiri missa, i gir ba a naa luana ku bumuru ku chiri bum ka'ana a ho ma'a kunu yoo mur ka'ana. 4 Mu mur cheu munu wu mwanam, wu ma bang nzi'iri wu baa ai wol yiru sa, i yoo dwa, ai doo ghi paa gima sa. 5 Moo rum wun i baa wo bang nzi'iri yi; wu bang nzi'iri baa, na wala yirus, ii ngyhar ngha ba ko tolo buho ku bissa ma mueng. Ii, mu mur cheu wunu, wu bang nzhi'iri yi. 6 Mine ai kur i wu gigi (sparrows) tongnung ku mur naira baring sa? mo'on ku chiri ya, ii doo wuh sum Baku sa. 7 sheele ne, wu ngong- muru baa a ku ka'amuro a mba,alaya bwang. A mi bang nzi'iri sa, anjii gana wu gigi bwana. 8 Mu mur cheu wun ne,baa na luanah ma shimai ku muram waa bapina, bee mun-bapina ko lo'oh mashimai ku muri wa muna-chumu (Malaiku) Baku. 9 Baa na bina mi ku dum wu bapina, a ho beeni ku dum wu muna chumu (Malaiku) Baku. 10 Baa na luanah cheu biwa ku mur mun bapina a ho zussu so'oi toh, a ma baa na yi'ira chewe ku mur puhu-mbilar a ho doo zussu soo yi toh sa. 11 A naa war wun shima mbau njeh ma ka'ana nere, i wu baa reng chewe ma nsah, wu doo suhu njim wun ku mur girba wu yer-wu ke wu cheu wa sa. 12 Yi puhu-Mbilar ko chewe. 13 Magina i yo chiri wu zam, ka cheu yi Yeso ne, Ba nsa-nsah, cheu yi, swanah ne, i gau (gado) pahm ma mbam." 14 Yeso ka yer yi ne, "Yan yi twala mi baa reng-chewe, ke baa chiri wun?" 15 Ka cheu waa ne, " wu sun bang! Wu tam ka'amur wun ku yoo, njel muru; chim bapina ai doo beni i lili baa bapina ii yi sa. 16 Ka cheu wa beee masali ne, mbura magina baa ya'abolo kum ya'a billa bwana ku yoo swai. 17 ka re'eshe ku chimi ne, "Man baa mo paa? mi doi mban baa mu so'o bee ya'a billa yahm wara. 18 Ka cheu ne, " Gir ba mu paa yi mani. mo she'ele wu jurung yahm bunuyere ba'ah muara ya, ka mu so'oh wu ya'a billa yahm, i wu gir ba kuma ku yo swam. 19 Ka, mo cheu yi ka'amuram ne, "Wei gir ma shimaya bwana ku jurung ba wo ningnyi li ma mba'ah gbeh. Ning su'ula, nos, li, nuh a ningnyi purfing. 20 Baku ka cheu yi ne kaa gbuchuk, lina i juhu a ho toh njimo; Bee wu gir ba a girshi chiha ko ning ma yan? 21 koo ning naa i bwara ba, kau wu gir (lili)chiha yi ka'amuri, yi, doo ningngyha ba lili ku dum Baku wara." 22 Yeso ka cheu wa wu muna yeele-yeelei ne, Na ningngyha naa, mu cheu wun ne, njim wun doo suhu ku mur gir ba wu li,ke, man baa wo yishi ku yirwun. yishi. 23 Njimu gana billa, bee yiru gana wu twan. 24 Wu shi sun wua-wua, ai doo bele ke yumu sa a doo i ka'ana ma billa, ke, jurung sa, Baku ii pawa billa. Daraja wun gana wu nyihing gba'a gbe'e. 25 Yan ku chiri wun baa na suhu njimi ko ma'a missa mo'on ku mur njimi? 26 Wu na do'o i ngyhar-ngyha ba wu paa gir ba njina naa sa, wu ya'a mur suhu. njimwun ku mur gamuring ne man? 27 Wu ningnyi sun por nguni ba ai la'ahu guhu, ai doo li chiri sa, yi ai doo ber sa. Mu mur cheu wunu ne, yi Solomon ku bongo yi doo ghi na yis twan ba njina i ma mo'on ya wara. 28 Yi Baku nai yis wa pumpuhu ma tooh twan ku yir ya, ya'a baa wo sun ya lina, mban naa puru. fa, a ho wuhu tolo ma'a ku bissa, ka'a ne ko doo yis wunu twan ma shimai sa; wu ningngyha wu baa ngichewe ya shima. 29 Wu doo maa njim wun ku gir ba wo kumu li, ke gir ba wu nuh, wu ma suhu njimwun ku murya sa. 30 Wu gir mani bwang wu baa paa girbiwa ma tah ramuan ai mbanya bee, yi Tar-wun ma kalang shi'ila ne wu njila ya kpana. 31 Wu pee lah Baku ma kalang, wo kum wu gir bwang. 32 Wu ma doo bang nzi'iri sa; wu munazur, "Tar wun i mur bwong yiri ne ko yo nda pawun li ma kalang. 33 Nama wu kur i lili baa wui yi ne, wu pawa ba'a gul-buya shiwa. Wu kum sa. Wu chiklili wun ku kalang mbana baa ko doo malla sa, ke wu i baa- shiwi a ho doo taa pwer i yi sa, ke wu mbura ku li pa'a biwa. 34 Mbana baa lili wo na ho, yi mbana ma njimo ho kpana. 35 Wu gir shi yir wun ningnyi ta'ara cheu chumu, wu chik bissa ne i ningnyi nda bolo. 36 Wu ning bene wu bapina baa, a ninghyi ta'ara baa lah ya, i mur bunuyere ku yo mbana chik mam-piwi; na yo nyah kun-ka'ana, muni-muni wo la'ahu yo fah yi. 37 Ko ning gir-shima korom baa. Tarya ma lah koyo kum ya a ningnyi ta'arai. Mu mur cheu wun ngichewe ne, ko girshi yiri, ma'a ya ne, a ningnyi kar ya'a mban li billa, ka, ku ningnyi paa wa chumu. 38 Ko ning gir shimai wa korom baa Tarya ma lah ko kum ya a gir sa yir ya ningnya; na yuana polo baring, ke pola tarung ma juhu. 39 Wu sheele gir mani. Bee baa lah na shi'ila missa ba baashiwi ko yo li, ko doo yer ne, i bor bee li sa. 40 Wun bwaa wu gir shi yir wun ningnyi ta'ara, bee mun-bapina ko yo ku missa baa wu doo ma'ana njimwun ne, ko yo wara." 41 Bitrus ka mwe ne, "Baanjeh, bee (misali), ma yo mbaa su, ke mashen mbau bapina bwang? 42 Yi Yeso yer wa ne, yan yi baa ngichewe, i re'eshe gir, i yi baanjeh ma lah ko mii baa tam-mur-gir ku li ko ba'a ghi gau billa wa korom yi, missa na nda ma? 43 Ko bwong yi korom, baa baanjeh ma li ko yo i mur paa gir mani. 44 Mu mur cheu wun ngichewe, ko mii ne i ning ba tam-mur-gir ku ka'alai bwang. 45 Ka ning bene yi korom ku cheu yi ka'a muri ne " Baa lahm ningnyha gbang ku shen-shene yi, koo doo bunuyere yo mwa sa, kaa bor nda nya'aha gamurins laya wu korom wu mbura, i wu ma ma'am, ka ning ku nda li, i nuh paa mbwah. 46 Bee baa lah korom ma ka bunuyere yo ku juk missai baa yi doo ma'an njimi wara, ku missa ba doo shi'ila sa ko ko'ori mbissa- mbissah, ko pi mi gbee-buhi kaakah i wu baa paa gir biwa. 47 Yi korom baa shi'ila njim ba li, ka doo gir sa yiri sa, ke, bina paa gir ba baa li njila, a ho nyaahi i gban-kuna gba'a gbe'e. 48 Yi ba'a doo shi'ila sa, naa paana gir ma biwai, a ho nya'ahi i gban-kuna gba'a chigee. Ku yo baa bwara baa a panai bwana, a ho pee bwana i yo bii i yoo baa bwara ba a yira i yi bwana, a ho mwe gir bwana i yoo bii. 49 Yuanah nda war bissa maa ku mur wu Tahramuan, gha ho njel ne bee bissa bwalama ko murya. 50 Mii baptisma ba a ho paam, i bwalla mi ne shee a naa paa yam. 51 Wu mur re'eshe ne, na war ningngyha shima yuana nsa'ah? Mu mur cheu wun ne, wi, yuana nda ygau ka'amuru. 52 I yoo mini mashen dwa, a ho kum wu bapina tongnung ku chiri lah mo'on, a ho gau yirya, wu tarung a wo gau yirya ko yo mbau baring, wu baring ku mbau tarung. 53 A ho ning ku gau yirya, Taru mashen mba bamun, bamun mashen mba Tari, Ngiu mashen mba muni bwasari, musari mashen mba ngi, yi ba-ambura mashen mba mam muni, yi mam muni mashen mba ngi milmi." 54 K a cheu wa wu zam ne, wu naa suna kuko pina mban i yo gahri magina, muni-muni wui cheu ne puhu wuna, bee puhu ii yo mina. 55 Wu na suna gung mur la'ahu i yo gahri magina wui cheu ne, mban ko berwe, bee mban ko lere! Wu ghina she'ele ya'a mis nsaah i ma kalang, I lam wa doo ghina sheele wu girma nzeeh mani sa? 57 I lan wo doo renye i ka'a mur wun gir baa i kakah sa? 58 A naa mur shene i baa doo njila we sa, mashen ka'ana reng chewe, pee nshere ba wu girshi yirwun ho ngi-shere, na na'asa, ko waro sa pawa baa reng chewe, yi baa reng chewe ko waro pi Forong, yi Forong ko waro sa ma'a ku nenye. 59 Mu mur cheu woo wo doo kum nshere ma puru sa, shee a naa talla ndangyhai ma marsai.