¹ Yeso ka she'ele ne, wu Farisiyawa a wa'ana ne i mur ku wu bapina bwana pa'awa baptisma ba gana ma Yohana; ² (yi Yeso wo do mur pa'a beh baptisma i ka'amuri sa, wu muna ye'elei ya wo mur pa'a wa bapina. ³ Ka la'ahun nji'ingi Yahudiya, bunu yere mashen Galili. ⁴ Wu ningngyai gba'a ne i gana pur ku Samariya. ⁵ Ka yo i wu ram magina ku ciri Samariya ba ai chu'uli ne Sikar, i pwer i swa bah Yakubu pa'anai muni Yusufu. ⁶ Beh mpuhu mu'uru ma Yakubu ho banai. Yeso wos gana, ku yo shen shenai, ka kum ban ning ho beh kun mpuhu mu'uru ma, missa wu nsa ndaa bolo tanza ma kurwa. ⁷ Maam Samariya magina yo nda ta'a mu'uru, Yeso ka chew yi ne, yiu beh mu'uru pam mu nuh." ⁹ Beh maam Samariya ka chew yi ne, "I pa'a lan we, bura Yahudawa, a mur mwe, mi sah Samariya, gir ba wu nuh?" Ba gir bah bina su Samariyawa i wu Yahudawa. ¹⁰ Yeso ka yer yi ka chew yi ne, a'a shi'ila gir ma gbirai ma Baku, beh bah i mur mweu ne, "Yi wi pam ne mu nuh,' a nirai, ka ho po mu'uru ba i nchimi." ¹¹ Beh maam maa ka chew yi ne, "Bwajeh, we do i gir ta'a mu'uru sa, beh puk mu'uru lima. I yo he a kum beh mu'uru ba ii nchimi? ¹² A do gana tarsu Yakubu, bah pa'ana su beh puk mu'uru mani sa, yi bwa ta'a nuna, wu muni ta'a nuna i wu nta'ai bwa? ¹³ Yeso yer yi ka chew yi ne wu ba a wo nuh mu'uru mani, was mu'uru wo bunyere wol ya. ¹⁴ Bah na nuna i yo mu'uru ba mi mo pii, was mu'uru ko do bassa woli sa. Beh mu'uru bah moo pii ko ning puk mu'uru ku bwi, ko bili pur yiwa mashen nchimi ma hueng. ¹⁵ Yi maam ma ka chew yi ne, "Bwajeh, pam beh mu'uru bili ne was mu'uru do bassa walam sa, baa ko ma'am mu do bassa yo nda ta'a mu'uru sa." ¹⁶ Yeso chew yi ne, "shene, sa tu'ilu milmo ne wu yo bwa'awun." ¹⁷ Beh maam ma yere ka chew yi ne, "mi do io milmam sa." Yeso ka chew yi ne. "a chiwa ngichewe, "we do i milim sa." ¹⁸ We wo milim tongnung, be bah wui iyi do milmo sa. Be gir bah a chiwa ma ngichewe." Beh maam mahma chewai ne, "Ba njel, mu mur suno bene we bah sun duwa. ²⁰ Wu Tarsu a wo i so'onzah pi Baku ku mur gbo'o mani, wu wune Urushalima yi wasa bana bah wu bapina a sa so'onsa ku banai." ²¹ Yeso ka chew yi ne, Bamaam, pa ngichewe, missai wuna bah wo so'onsa pi Tarsu do ku mur gbo'o, ke, ku Urushalima sa. ²² Wun wui so'onzah pi girba wu do shi'ila, ne, ra'atsa buhu i yobau Yahudawa. ²³ I naa, missai wuna, i yuama, wu ba so'onsa ma ngichewe a ho so'onzah pi Tarsu ku mpilar i ngichewe, yi Tarsu i mur pee wu bapina ne a ning wu ba so'onzah pi. ²⁴ Baku yi mpilar, i ningna pwer ne, wu bah a na so'onsa pi, a so'onzah ku mpilar, i ngichewe." ²⁵ Beh maam ma ka chew yi ne, "Mi shi'ila ne, Almasihu i wuna ( ba ai tu'uli ne Kristi). Na yuana, ko yo bal su chii bwang." ²⁶ Yeso ka chew yi ne, "mi yi bah i mur lo'o i we mini. ²⁷ I yo banai wu muna ye'ele a wu bunyere yuama. A ningyai mom chi'i sahai ne, man na pa'ana ka mur lo'o i am ma, mo'on ya do ngi lo'o i yi ne, "A njila gima?" Ke, "Man i pa'ana a ur lo'o i yi?" ²⁸ Sari ma bangya ji'ingi lesheng mu'uru yi, ka buyere mashen ciri rm, sa chew wa bapina ne; ²⁹ Wu yo, sun bura ba chiwam bwang gir ba wo pa'ana ma kira'ai. ko pa'a ne yi beh Kristi ma, ke, wu suna lan?" ³⁰ A la'ahun ji'ingi ciri ram shen mashen bana bah Yeso wu ho. ³¹ Ku ciri missai, wu muna ye'elei a mur neri ne, "Bah sahsah, a shi li billa." ³² Ka chew wa ne, mi billa ma li bah wu do shi'ila banai sa. ³³ Wu muna ye'ele a chew yi yirya ne bwara do war billa gima yo pa'anai sa. Ke, bwara na yuana?" ³⁴ Yeso ka chew wa ne, Billa yam yi ni pa'a tumu yi ba tuma mi ne, mu yo mal yi tumui. ³⁵ Wu do chiwa ne, wasa zungya yinug bah bwo'o i pa'a sa? Mu mur chew wunu ne, wu sun ban yiwa, beh swa i nda ma yumu. ³⁶ Bah yum ngya'a billa ku sw ii kum bgee buhi, i kam mur ngya'a billa mashen nchimu ma huegn, ne, yi bah kwama i bah yuma, yirya ko bong lwaya. ³⁷ Beh chewe mani, ma ngi chewe, mo'on ya yi kwama, mo'on yi yuma. ³⁸ Tuma wun ne, wu sa yum gir ba wu do lina lulu ku muri sa, su magina lina luu ku muri a wu magina lina lulu, wun wu kumu bwara ho ciri tumu ya. ³⁹ I yo wo chiri ram wu Samariya wa bwana a pangichewe i Yeso chew, lo'o baha sari maa sa pa'ana wa pa she'ele ne, "I balla yam bwang gir ba wu pa'ana makira'ai." ⁴⁰ Wu Samariyawa a yo nji ho bii, a neri ne, i tama ning ho mbaya, kia nong nongyo baring ho baya. ⁴¹ Wu bapina bwana pah ngichewe chew ngya'a lo'o ba i mur pur iyo kuni. ⁴² A Chew yi maam ma ne, "Su do mur pah ngichewe ku mur gir ba a wu chewsu sa, su yo wa'ama, su shi'ilama ne yi bah ko ra'asa taramuan." ⁴³ Nong nongyo baring ho baya, ka la'ahun shen mashen Galili. ⁴⁴ Yeso i ka'amuri pah she'ele ne bah sunduwa ai do pi pah muru ku ram yi sa. ⁴⁵ Ka yo bor ciri Galili, wu bapina ma Galili a puru pa'a ya gbalba i yoi, A wo sun gir bah a pa'a ku Urushalima bana bah a wu hik maampiwi; wu zam ya a wo ho bii bana chik mammpiwi. ⁴⁶ Yeso bunyere mashen Kana ma Galili, bana bah wo pirwi mu'uru ning mu'uru bil Anab. bura magina bah reng chewe, muni wo kwa'anga yiri ku Kafarnahum. ⁴⁷ Ka wo'o ne Yeso yuana ku yo Yahudiya mashen Galili, ka shen ba Yeso neri ne, i shene sa zus ko'ongo ku yir muni so'oto'o i yi, beh muni wo tapwer ma i wuh. ⁴⁸ Yeso ka chew yi ne, shee wuna suna ngya'a gir i gir mom-chi'i sahai, wui do pangichewe sa." ⁴⁹ Beh bah reng chewe ka chew yi ne, "Bwajeh, ka'ara yo ne munam do wuh ku duwo sa." ⁵⁰ Yeso ka chew yi ne, "Kwan shere, muno ii nchimi." Bura ma pah ngichee i gir bah Yeso lo'o yi, ka la'ahun kwa nsherei. ⁵¹ Wo shi sa'ana ku ngishere , wu korom yi pari, chew yi ne, muno i ho i nchimi. ⁵² Ka mwe ya i missa bah beh yir muni bwanghai. A yer yi ne, mayunu bolo tangza baring beh yiri ka so'o yi polo." ⁵³ Beh Tar bamun ka re'eshe ne, yi beh missa bili bah Yeso chew yi ne, muno i nchimi." Yi i ka'amuri i wu bapina ma li bwang pa ngichewe. ⁵⁴ Mabni yi ngya'a gir ma baring bah Yeso pa'ana missa ba pura yo Yahudiya mashen chiri Galili.