¹ Burah Farisiyawa magina lu'uli Nikodemus, yi mo'on ku ciri wu bah reng chewe mau Yahudawa. ² Ka yo par Yeso i ciri duhu ne, "Rabbi, su shi'ila ne wu bah nsahsah i yo bah Baku. Bwara ko do ngi pa'a wu gir bene bah wu mur pa'a sa. shee Baku naa kusah zum chii." ³ Yeso ka yer yi ne, "Mu mur chew wo ngichewe, a na do bila bapina i yo kalang sa ko do kum nshere ma bor kah Baku sa. ⁴ Nikodimus ka chew yi ne, ko pa'alan a bunyere bil bapina ma i pa'a ka'ajeh? ko bunyere bor bum ngyi ne a bassa bili kpah? ⁵ Yeso ka chew yi ne, mu mur chew wo ngichewem bwara ko do ngi bor lah Baku sa, shee a na bila bapina iyo mu'uru i mpilar. ⁶ Gir bah a na bila i yo ngyam yiru, i ningna ngyam yiru; gir ba a na bilai iyo mpilar, i ningna mpilar. ⁷ A mi fah kuno bah chiwau ne, i ningya gba'a ne a bil wun i yo kalang. ⁸ Gung ii bo'olo shen mashen ban bah i njila. wo wo'o kurui, ma wo do she'ele ban bah ui pura yo ham sa, ke, ban bah ku shen mashen ham sa. I naa i wu bah a bila i yo mpilar." ⁹ I lan gir mani ka ning naa?" Nikodemus ka mwe. ¹⁰ We bah sahsah mau Yahudawa," Yeso ka chew yi ne, a do shi'ila wu gir mani sa? ¹¹ Mu mur chew wo ngichewe, sui lo'o gir ba su shi'ila, sui pa she'ele ku mur gir ba su suna, a ma'a wu do ya'ana pa she'ele su sa. ¹² Na luana wunu chew taraman, wu do mur pa ngichewe sa, i pa'alan wa pa ngichewe na luana ku mur gir ma kalang? ¹³ Bwara do ngi yiwa mashen kalang sa, she'e yi bah yuana i yo kalang beh mun bapina, bah wu ho kalang. ¹⁴ Bene bah Musa wu toh yo'o yiwa ku ciri to'i, ko ning mgba'a ne a ho toh mun bapina yiwa kpana. ¹⁵ Bwara bah na ana ngichewe ko kum nchimi ma wueng. ¹⁶ Yi Baku ka njel taraman, ika pa muni ne, bah a pana ngichewe ku muri, ko do wuh sa, ko kum nchimu ma wueng. ¹⁷ Baku wo tum muni ma yo taraman, do ne i yo rengchewe wa taraman sa, wo tumai ne, taraman kum nshere ta'a puru ku yo buhi. ¹⁸ Ba na pana ngichewe i yi, a do rengyi chewe sa, ba naa do pa'an ngichewe sa a renge rengyei chewe ne, do pana ngichewe ku lu'ulu beh mun mo'ona mun Baku sa. ¹⁹ Mani yi beh reng chewe; bungban yuana ha ku ciri taraman, wu bapina njel duhu gan bungban chew bah ai pa'a gir biwa. ²⁰ Bah nai pa'a gir biwa ii bene sun bungban, ko do yer i bungban sa, i mur bang nji'iri ne ko fah chii. ²¹ Bah nai pa'a ngichewe i njel bungban, ne wu bapina sun ku nsah gir bah pa'na, i mur pii i yere Baku." ²² Yeso i wu muna ye'ele a la'ahun shen mashen Yahudiya, ka sa ning gbang ho i ya, i mur pa'a wa baptisma. ²³ Yohana wi mur pa'a baptima kpa yi ku Ainon pwer i salim, chew ba mu'uru wu ho banai bwana, wu bapina a mur shene gbeng gbi gbeng ne a pa'awa baptisma. ²⁴ A wo do shi bwoli ma'a ku nengye sa. ²⁵ Li nan ka la'ahun ku chiri be wu muna ye'ele ma Yohana i mur bura Yahudawa magina ku ta'a ningya param i pa'a gir biwa. ²⁶ A la'ahun she bah Yohana a chew yi ne, Bah sahsah bura bah wu ho iyi ku bwaah Urdun ba a wu panshere ku uri, i ho mur pa'a baptisma; wu bapina a mur shen mashen ho bii. ²⁷ Yohana ka yer wa ne, "bapina do jina ku ya'a gir sa, shee a na panai i yo kalang. ²⁸ Wu i ka'amurwun, wo panshele ku ka'amuram, chiwa ne, mi do Kristi sa, a chima mi ku dwi. ²⁹ Bah yini nai maampiwi, yi ni milim maampiwi; mwan milim maampiwi, ko chele wo beh mwani. ko bwong nchimi shima na wa'a beh milim maampiwi i mur lo'o; beh bwong chimu yam rutsa ma. ³⁰ I ningya gba'a ne yi bwan, i ningya gba'a ne mu wos chige'e. ³¹ Bah na pura i yo kalang, yi ku kalang ku mur wu bapina; bah na pura i yo nsah, i ku nsah, i lo'o lo'o ma nsah; bah pura i yo kalang, gana ko yen bwang. ³² Gir bah yi suna, ka wa'ana, yi bah i mur pa she'ele, bah bwara bah ya'a bee pah she'elei. ³³ Bwara bah na ya'ana pa she'elei, yinama ne Baku yi bah ngi chewe. ³⁴ Beh bah Baku tumai, i mur lo'o ngya'a lo'o ma Baku; yi do mahna be mpilar sa. ³⁵ Tari njila muni, ka panai gir bwang ku buhi. ³⁶ Bah nah pana ngichewe yi muni, ko kum nchimu ma hueng bah na do pana ka'amuri yi bee muni sa, ko do kum nchimi sa, suhu nchim Baku ko ning ku muri.