¹ Yeso chew wu gir mani, ka toh mishi yiwa mashen kalang chew ne, "A Dah, missai yuama, tol muno yiwa ne yi beh muno ku tolo yiwa kpayi. ² Bene bah wu pahnai rengye, ku mur wu bapina bwang, ne ko pah nchimu ma hueng wa bah a pahna yi. ³ Mani yi nchimu ma hueng, ne a ho shi'ilo ne, we Baku ma ngichewe, i yi bah a tumai, Yeso Kristi. ⁴ Twala we yiwa ha ku Taraman. mala beh tumu bah a pana yam ne mu pa'a. ⁵ A Dah toh lu'ulam yiwa i ka'amuro i beh rungdung bongyo bah su wo i yi ma a do shi pa'a Taraman sa. ⁶ Ma kunam chew lu'ulu wa bapina bah a pahna yam i yo ha Taraman. ya ma bwo, a pahna yam, a ningyi wara lo'o wo gbang gbang ⁷ I mani a shi'ila ma ne, wu gir ba a pa'ana yam bwnag, a pura i yo bo. ⁸ Pa'ana wa bwang beh nya'a lo'o bah a pahnayam. A ya'ana ya, a shi'ila ma ne ngichewe yuana i yo bwo, a pahna ngihewe bwa na wuni a tuma mi. ⁹ Mii nere nere ku mur ya. mii do nere yi Taraman sa, mi nere wa wu bah a wu pa'ana yam, yanaa ma bwoo. ¹⁰ Wu gir bwang bah nama bam wasa ma bwo, na ma bwo wasa ma mabam, a twala lu'ulam yiwa ku ciri wun. ¹¹ ku dwa, mi do ha ku Taraman sa, wu wani a ha ciri Taraman, ma bam mi wuna bwo. A Dah ma shimai, war ya ku ciri lu'ulo bah a pahna yam ne a ning mo'ona i yirya bene bah mi i we su mo'ona. ¹² Bah wu shi i ya, wu i warya ban mo'ona ku ciri lu'ulo , bah a wo pahna yam. Ningya lele ya, mo'on ku ciri ya do pa'ana biwa sa, she mun a biwa; chew ne.lo'o bah a wo chewe ku mpuknssheme yo rutsa. ¹³ Mi wuna ba wun i mani, mu mur chew wun wu gir mani ha ku chiri Taraman ne wu kum bong bwam bwana ku nchimwun. ¹⁴ Pa'ana wa lo'o wo, yi taraman bi'ina ya, chew ne, beh ngya'a lo'o do ma Taraman sa, bene mi mah mi do ma Taraman sa. ¹⁵ Do nira we ne, toh ya la'ahun iyo ha Taraman sa. mu mur nere ne, ning lele ya ku yo wu bah pa'a girbiwa. ¹⁶ Ya do ma Taraman sa, bene mi ma mi do ma Taraman sa. ¹⁷ Kau ya ji'ingi ku gigeng i ngichewe. Lo'o wo yi ngichewe. ¹⁸ Bene bah a tumami mayo ha ciri taraman, mi ma karma tuma ya ha ciri taraman. ¹⁹ chew ya war ka'amuram ji'inga shima ku kangyi ne, ya ma a ning ku gigeng i ngichewe. ²⁰ Mi do mur nere Baku chew wu wari i loyah sa, mu mur nere Baku bwa wa bah a hopah ngichewe i mi ku yo lo'o ya. ²¹ Ne bwangya a ning mo'ona bene we, Dah, we ha i mi, mi kpanaa i we. Mu mur nere bwa ne, a ho ning ha i su ne, yi Taraman ku pah ngichewe ne wuni a tuma mi. ²² Beh rungdung bongyo bah a pa'ana yam, pa wa kpana, ne a ning mo'on bene bah su mo'ona i we. ²³ Mi i yaa, we i mi, ne a ning mo'ona ma hueng, ne yi Taraman she'ele ne wuni a tuma mi, ne a njel ya bene bah a njila mi. ²⁴ A Dah, njila ne wu bah a wu pahna yam a ning i mi ku bana bah mi ham, ne a sun rungdung bongyo yam, beh rungdung bongyo bah a pahnayam chew bah a njila mi, mah a do shi chiha ta'a yi Taraman sa. ²⁵ Dah bah sun ciri, Taraman do shi'ila we sa, a ma mi shi'ila we, ya a shi'ila ne a tuma mi. ²⁶ Mi ma'ana a shi'ila lu'ulo, mo gishi ma'a ne a she'ele ne beh njelle bah a njila mi ko ning i ya, mi bwa mo ning iya."