¹ Bura magina lu'uli Lazarus wo nwangna ko'ongo i u yo Baitanya,mu ram wu Maryamu i sa'angi Marta. ² Yi Maryamu bah so'ongi yi beh Lazarus bah nwangna ko'ongo, yi ba wo so'o muru ma dwana shimai ku mur i Tarsu ka ye'eshe mgbi'i i ngong muri ³ Beh wu so'ongi a tum mashen ba Yeso, a chewne, Tarsu, sun, ba a njilai bwana ma kwa'anga yiri." ⁴ Bah Yeso wo'o na, chew ne, beh ko'ongo mani ko do woli sa, wi, mini ma toh lu'ulu Baku yiwa ne muni kum toh lu'uli ku yo muri." ⁵ Yeso wo njila Marta i sa'angi i lazaru, ⁶ Bah wo'o ne lazarus kwa'anga yiri , gishi ning ho ban ba i wo ham ma nongwo baring kpa. ⁷ Ka chew wa wu muna ye'ele tumu, "Subunyere shen mashen Yahudiya." ⁸ Wu muna ye'ele tumui a chew yine "Rabbi," "Do ningya gbang sa ba wu bunuyere mashen banai?" ⁹ Yeso yere ka chew ne, "mine bolo lum kuni baring ku duk misai mo'on?" Bapina na mur kikang i misa, ko do ngya mgbi'i sa chew bah i mur sun bungya ban ma taraman. ¹⁰ Na mur kikang i duhu ko ngya mgbi'i chew bah bungban param. ¹¹ Wu chew wa wu gir mani, ka basa lo'owa ne mwan su Lazarus nwangna tolong, mi sona nda lo'oshi." ¹² Wu muna ye'ele tumui a chew ne, Bahjeh, na mur nong tolong, yiri ko bwongyi." ¹³ Yeso wu mur lo'o chew wuyi wu muna ye'ele tumui a wu sun ne i mur lo'o chew nos ku nong tolong. ¹⁴ Ka puru chew wa ne "Lazarus wuama' ¹⁵ Chew wun, bwangya bwam ne mi wo do ho banai sa, ne wo pa ngichewe. su shan mashen ho bii" ¹⁶ Yi Toma bah a lu'anai ne yi mun pwasa chew wa wu gamur wu muna ye'ele tumu ne, "su shen kpayasu ne su sa wu i yi." ¹⁷ Bay Yeso yo, yo sun ma a ma'a Lazaru ku puk shi'ila ma nongyo yinung. ¹⁸ Batanya do jina mel baring ku yo Urishalima sa, ¹⁹ I wo Yahudawa bwana ba a yuana bau Marta i Maryamu nda za'ara ya chew beh wuh so'ongi ya. ²⁰ Marta ka wo'o ne Yeso wuna, ka puru mashen nda pari, yi Maryamu ning ma bi ho lah. ²¹ Marta ka chew yi Yeso ne, Dah wa au ha swana ka do wuna sa. ²² I mani, shi'ila ne gir ba ana muna Baku, ko poh." ²³ Yeso chewai ne so'ongo ko bunyere la'ahun kpa." ²⁴ Marta ka yer ne, mi shi'ila ne ko bunyere la'ahun kpa ku duk misa wuh la'ahun ma marsai. ²⁵ Yeso ka chew yi ne, mu yi wuh la'ahun, i nchimu. bah na pana ngichewe imi, ka pana ngichewe i mi ho kum nchimi, ko do wu sa. ²⁶ Yi bwar ba nai nchimi, ka pana ngichewe i mi ko do wu sa, A pana ngichewe i gir mani? ²⁷ K chewyi ne, i, Taram, mi pana ngichewe ne we yi be kristi, mun Baku a wo ne ko yo ha ku ciri taraman." ²⁸ Marta chew beh wu girmani ka bunuyere sa tu'ulu sa'angi Maryamu ku kangyi. "Ba sahsah ha nini," i mur mwe banau. ²⁹ Mary wo'o girmani ka la'ahun yiwa chichik ka shen ho bi. ³⁰ Yeso wo do shi bwara beh mu ram sa, i wu shi bana ba Marta wu sa pari. ³¹ Wu Yahudawa ba a wo ho ba Maryamu ku ciri lah, ku mur za'ara, a suni ba kuru la'ahun yiwa chichik shen mashen nzah, a la'ahun waar chi'i, a mur sun bene i shen mashen be mur shi'ila nda zolo ho ku banai. ³² Yi Maryamu sa ji bana ba Yeso wu ho sa suni, ka kwasu'ula ho dwi chew ne, "Dah, a wo ha bari swana ka do wuhna sa." ³³ Ning ba Yeso suni i mur zolo kpana, mpilar yi la'ahun, jimi ka su'uri. ³⁴ Wu lisai ku he? ka mwe, Dah yo sun banai a chew yi. ³⁵ Yeso zolo. ³⁶ Be wu Yahudawa a chew ne, "wu sun ma njilai!" ³⁷ Wu gamur ya chew ne, "Mine yi bah wo fah ngya'amis bura ba tawa i do'o i ngyarngya ba i pir bura mani i wu sa?" ³⁸ Yeso kpa, i su'uru nchimi, yo ho bana mur shi'ula I wo puk tah ba a gira mun beh mpuk shi'ula iyi. ³⁹ Yeso ka chew ya ne, wu toh be tah la'ahun iyi.Marta beh sa'angi Lazarus bah wuna, chewei Yeso ne, Dah, imani beh yiri ko rumu, chew bah a lisai i nongyo yinung ba bwa'alama." ⁴⁰ Yeso chew ne, "Do chiwa wunu ne wuna pana ngichewe, wo sun be rungjung bongyo Baku sa? ⁴¹ A to be ta'a ma la'aun i yi, Yeso ka to mishi yiwa ka chew ne, Dah, so'o nzah panau chew ba a wa'ami. ⁴² Mi shi'ila ne we wa'am gbeng gbi gbeng, mu mur chew gir mani chew wu bapina bah a chilla ha nini, ne a pa ngichewe wuni a tuma mi. ⁴³ Ning ba lu'ana, Yeso tu'ulu i mwara jimi Lazarus, pur wuna!" ⁴⁴ Beh bura ba wo pur mayo nah, wu bwihi i mgbi'i a wangya i wu nguri, i wu ka'a twan kusa mishi Yeso chew ne, "wu wu'uhui beh ka'a twan mau bah wuh ne wu ji'ingi ne i kwa nsherei." ⁴⁵ Wu ning naa wu Yahudawa bwana ba a wu yuana nda za'ara Maryamu, a sun gir bah Yeso pa'ama a pa ngichewe ku muri. ⁴⁶ Wu gamur ya shen mashen bawu Farisawa sa chew wa gir ba Yeso pa'ana. ⁴⁷ Wu mwa'ara bah sahsah, i wu Farisawa a tu'ulu kam murya i yirya "Man ba su mur pa'a? a mwe. Bura mani i mur pa'a wu gir sunu. ⁴⁸ Suna yeri ji'ingya na, wu bapina a ho pangichewe iyi, kasa ma wu Romawa a ho yo ya'a nzah su wu bapina su." ⁴⁹ Mo'on ku ciriya, ba lu'uli Kayafas yi wu mwara bah sahsah ku ba'a bili chew ne, wu do shi'ila gima sa!" ⁵⁰ Wu do shi'ila ne i bwongyo gana wunu ne bura mo'ona wu chew wu bapina bah ne ram bwang ku kpingya. ⁵¹ Wu do chew gir mani ma ka'amuri sa, chew ba yi wo ba sahsah ba'a bili pa'a tum bah sun duwa ku mur Yeso ne ko wu makun wu Yahudawa, ⁵² do makunya loya sa, makun wu muna Baku ba a yara mala ban ne a warya kam murya ban mo'ona. ⁵³ I yo duhi bili, a ning ku nda pe'e nshere ba a ku to jimi. ⁵⁴ Wu ning na Yeo do basa puru kikang ku ciri be wu Yahudawa sa. Pi'iri pur mashen ba magina pwer i mgba'a to'o, ku mu ram magina ba ai tu'uli ne Ifrayimu ka sa ning ho banai i wu muna ye'ele tumui. ⁵⁵ I wu tah pwer i duk misa Paska mau Yahudawa, wu bapina bwana a la'aun iyo wu ram mashen Urushalima chew girshi yir ya mashen duk missa Paska. ⁵⁶ A ningyi nda pe'e bana Yeso a wo chila ho ku para bum ka'ana nere Baku, a mwe yirya ne, "wu suna lan? ko do yo be bana li Paska sa? ⁵⁷ Ya beh wu bah sahsah i wu Fariswawa a pana kunu ne bweara ba na shi'ila bana ba Yeso ham, i yo chewe ne a sa bolo.