NGYI 27

1 Ku nzum bah a yira ne a shen Italiya, a pana Bulus i wu bah a ku'ura ya ku buk bura mo'on lu'uli Yuliyas, ku yo zam wu sojoji ma Agustas. 2 Bwara gir sau mu'uru kuyo Adramatiya, bah kumur pa'a i la'ahun mashen pwer i kang sal Asiya. su shen sala. Aristakus bura Tasalonika i Makidoniya shina isu. 3 Banfana su su'ula ku ram sidon, bn bah Yuliyas pa'ana yi Bulus gir shima yira ne wu mwani shen iyi ne i shen chik tama ya. 4 Ku yo banai su wara sala su shina mashen Tsibirin Kubrus, chew biwa gung bah ma'anasu ku duwa. 5 Su tahlu'ura mu'uru mashen kang kilikiya i Bamfiliya, su yuana Miraram Lisiya. 6 Ku banai ka be bura soja kuma gir sau mu'uru kuyo iskandariya bah i ku shen Italiya, ma'ana su ku bwih. 7 Nongyo gbe'e sumur shen chee su suna chiri, ku marshi su su'ula pwer i sinidus, gung lila su shene, ka su gana wara ma Karita, pwer i Salmina. 8 I sun chiri ka su wara ma Makurda su yuana ban mo'on bah ai tu'uli ne ban sormo ma shimai bah i pwer i ram Lisiya. 9 Su bwala ban, sun ban kusu kunu wu Yahudawa bwala, beh shene ningna i pah ji'iri. Bulus luana wa. 10 Ka chew ne, wu bapina, suna be shenesu ko ning su biwai i sai wu gir bwana, doh chew ka'ala i be gir sau mu'uru sa, i nchimsu kpanah." 11 Be bura soja ma'ana nchimi ku lo'o bwajeh yi i bah gir sau mu'uru gana wu gir bah Bulus chiwa. 12 Ku chew bah ban chele ko do bong ban ningna i rungdung ku banai sa. Finikiya ban chele gir sau mu'uru ku Karita, imu sun mashen ban pur missa i ban bor missa. 13 Gung kuyo pur missa piwa kiring. a suna bene gir bah amu pishi a kuma. A ma'ana buk beh gir sau mu'uru a wara ma Karita pwer i beh kun mu'uru. 14 Bwala ban chige'e ka gung ma ngyarngyai bah a tu'ulu ne Yuroklidon, paha ngyasu ku yo mur gbo'o . 15 Beh gir sau mu'uru do ngina chik duwi i be gung sa, ka su wara ta'a be gung mashen ban bah wara. 16 Wu wara ban bah su kumu pwita pwer i mu gbo'o bah ai tu'uli ne kauda; su suna chiri bah su kura be gir sau mu'uru muzuhi ku yir mamori. 17 A twala ku kalang, ka a pa'ana tumu i wu nguri a kura be gir sau mu'uru ne i do shen kwa ku mur nzanshilah ma Sistis sa, a ji'ingna be gir sau mu'uru ku mur pir ta'aya. 18 Su nngna nda ta gbolo i be gung bwana, ban fana ka wu bah tumu ma be gir sau mu'uru paha so'o to'o i wu ka'ala ku be bum gir sau mu'uru. 19 ku duk ma tarung, ka wu bah tumu ma gir sau mu'uru paha so'o to'o i wu ka'ala ku be bum gir sau mu'uru i bukya. 20 Nongyo bwana su do suna bung missa ke wu lewer ku mursu sa, mwara gung ningna nda ngyasu, su pura i nchimsu mbwang ne so do pwer sa. 21 A bwala ban a do lina bila sa ka Bulus ku dum wu bah tum gir sau mu'uru ka chew ne, wu bapina bah wa'anami, ba suwushi do lwa'a ku Karita sa, ke suwu suna gir bah kuma su mani sa. 22 Ndila pawun ngyarngya ne wu ngyarngya nchimwun, bwara ko do sahi nchimi ku chiriwun sa, be gir sau mu'uru yina ma so sahai. 23 Ku duhi bah bwa'ala mun tumu (Malika )Baku bah mi mabi, bah mu mu lemi, mun tumui (Malaika) chila pwer imi. 24 Ne su do bang ji'iri sa, Bulus ningna gba'a wu chele ku dum Kaisar, sunu kpah, Baku ku ciri njeei panawo wu ba mu shen iwe. 25 Ku mur bili, wu bapina, wu ngyarngya nchimwun, pana ngichewe i Baku bene bah a chiwam gir bah ko pa'a. 26 Ningna gba'a ne a buksu ku mur gbo'o mo'on. 27 Ku duhi ma lum kuni yinung pa'ana, a mu tursu ni i no ku bum sal Adriyat ku ciri duhu, wu bah tumu ma gir sau mu'uru a suna bene a tana pwer i murzah. 28 A mahna nguri ka a suna bwala ngbu'uh lum baring; a bwala ban zuk, ka a basa mahna kumna a kumna bwala ngbu'u lum kuni tongnung. 29 Ji'iri bwala ya ane ke ko bukya ku mur wu tah, ka a buha nguri yinung ku yo marsa be gir sau mu'uru ka a kusa misya nir Baku ne Duduhu ka'a yo. 30 u bah tumu ma gir su mu'uru a mu pis njere bah puru ji'ingi be gir sau mu'uru ka a basa yere buk be gir sau mu'uru mazuhi ku mu'uru. A ka pa'a bene a yere so'o wu bah nguri ma dum be girsau mu'uru. 31 Bulus ka chew yi be bwajeh wu sojoji i wu bah gamur sojoji, ne wu bapina mani na ko do chele ku bum be gir sau mu'uru sa, wo do pwer sa. 32 Ka wu bah sojoji ka su'ungu ye'ere wu bah nguri gir sau mu'uru ka a ji'ingi ne i kwa 33 Ban tana pwer ma fah ka Bulus niraya ne ali bila, ka chewne, "Lina missa ma lum kuni yinung wu do lina gima sa. 34 Ku chew bili mirawun wuli bila, chew shima yirwun; ngyongmuru mo'on wo do sahai sa." 35 Luana nah ka twaka fo'ofoh nira Baku ku misya mbwang ka bu'unga be fo'ofoh paha li. 36 Ka mbwang ya a kuma ngyarngya a lina bila. 37 Su bapina 276 (Lumlum baring i lum tangza baring i kuni tangza.) Ku be bum gir sau mu'uru. 38 A li nuna a rusa ka a sha'ana toh i ngha'a wana ku bum mu'uru a yere swa'ana ne be gir sau mu'uru do lu'uru bwana sa. 39 Ban fana a do shi'ila be ramsa, a suna sa'a mo'on ku kangyi ka a lwa'ana i yirya ke a bi be gir sau mu'uru mashen be sa'a ban. 40 Ka a ye'ere wu bah nguri a ji'ingi ku bum mu'uru ku bolo mo'on a ka basa wu nguri bah yini pi'iri be gir sau mu'uru ka a twala dumya chiha mashen kang be sala. 41 A shen jina bana bah mu'uru baring twafna ka be gir sau mu'uru chila ku nzah. Be dum gir sau mu'uru shen so chila ku banai, so ngina zuk sa, wu Dumu ma mu'uru paha ma bu'ungu mgba'a be gir sau mu'uru. 42 Ndele wu bah sojoji yina a wol wubah muna nengye bah aiya ma ne a do ra'asa yirya bang sa. 43 Be bwajeh ya njila ne i ya buk Bulus, ka lel ya kumur gir bah andila pa'a, ka pa kun ne mbwang bah na ko ngi kwa tapur mashen kang be mu'uru i kwah ku beh mu'uru mashen kangyi. 44 Ka wu gamur wu bura war nzumya, wu gamurya ku mur wun ku mur wun ku mur bu'unga nguni, wu gamurwun kumur wu gir bah aku bum be gir sau mu'uru. Su pa'ana nah ka mbwang su su tapura mashen kangyi.