NGYI 19

1 Afolos i wu ku Korinti Bulus ka shina ram pura mamurgbo'o ram shina beh Afisa, ka kum wu bah ye'ele ho banai. 2 Bulus chew ya ne, Wu ya'ana puhu mpilar ka wu pana ngichewe? Wi, su do wu wa'a chew mpilar ma puhu sa. 3 Bulus ka chew ne, Dang ku mu'uru mahe ma a pa'ana wun? "A ka chew ne dang ku mu'uru ma Yahaya" 4 Bulus ka yere ka chewne, Yahaya dangna wu bapina ku mu'uru ne a ji'ingi gir biwa ya, ne a pah ngichewe i bah koyo kunzui. 5 Wu bapina wa'ana nah, a dangnaya ku mu'uru ku lu'ulu Tarsu Yeso. 6 Bulus ma'ana buhu ku murya ka Puhu Mpilar su'ula ku murya ka a pak lo'o iwu lasuh i sun duwa. 7 Ya wu bapina lum kunya baring. 8 Bulus bwara banlem Baku i mur sah i nhimi mo'on ma zungya tarung. I wu war iya ku lo'o Baku i mur ma'a wu bapina ne a pa ngihewe ku mur wu gir bah a ningna ma lah Baku. 9 Kpahma wu gamur wu Yahudawa a tana missa a bi'ina ma'a murya a paka ma suhu njere mun Baku ku dum wu zam bapina, ku hew bili Bulus ka sung yiri ku baya i wu bah pana ngihewe. Paka sah ku ban balkunu ma Taramus. 10 ningna nda pa'a nah ma ba'a baring wu muna ye'ele bah a ningna ku Asiya a wa'ana lo'o Baku, Yahudawa i wu Helenawa. 11 Baku pa'ana mwa'ara wu gir ku buk Bulus, 12 wu bah gana yirya a kuma shima, wu bah ai biwa mpilar a puru ji'ingna wu bah bapina, bah a ya'ana kun twani gir kusu ma yir Bulus. 13 Kpama wu bah gbomo wara banai a twala be kun twan ne a pa'a tumu iyi ku lu'ulu Yeso. Ane "sunu lo'owun ku iri lu'ulu Yeso bah Bulus luana ku muri, wu puru." 14 Wu bah pa'ana beh girmani a tangza baring, wu muna mwara bwajeh Yahudawa bah ai tu'uli Siba. 15 Mpilar ma biwai yira ka chewne,, "Shi'ila Yeso, Shi'ila Bulus yawun wuyen?" 16 Ka beh biwa mpilar bah iku bum beh bapina ka kwa ku mur beh bah gbomo ka gan ngyarngya ka ngya'aha ya. Ka a bang lah pur kube bum lah yirya gbira iwu ngo ku yirya. 17 Girmani ningna gir she'ele bawu bapina mbwang, wu Yahudawa i wu Helenawa bah a ningna ku Afisa, beh gir panawa ji'iri bwana, lu'ulu tarsu Yeso kumna lem. 18 Wu bah war ta'a Baku bwana yo chiwa mbwang gir biwa ba a pa'ana. 19 Wu bah gbomo wara wu mpuknsheme ya yo twana ku dum wu bapina. A kama mur gir bah ai yi bwala banchihi lum tongnung ma tah ngya'abolo.(Azurfa) 20 lo'o Baku ka yarban i ngyarngya ku njere bwana. 21 Bulus mala tumiima lo'o Baku ku Afisa, Mpilar ka ma'a ku nchimi ne i wara pur ku Makidoniya i Akiya, iku njere mashen Urushalima. Ka chewne, "Na shina gba'a mashen Roma." 22 Bulus tura wu muna tumui baring Timoti i Irastus mashen makidoniya, wu bah jina chi'i. yi gira ta'ara ku Asiya jingeh. 23 I wu duk bili mwara tamisa luana kube njere bili. 24 Bura mo'on bah tultulu lu'uli Damatrayus bah i tul wu ka'ala ma tah ngya'abolo ma "Dayana" yini dum buhi ban i waryi ngya'abolo bwana ne wu she'ele ne yini be tum tultulu mani ma sui kum ngya'a bolo bwana. 26 Wu suna wu wa'ana ne, do ku Afisa, iku mbwang ramma Afisa mani, beh Bulus lira wu bapina bwana. I mur chew ne Baku bah ai pa'a i buhu do ham sa. 27 Do tum buksu nah yini ko kwa sa, mbwang i banlem Bakusu, Dayana ma mori ko ning bene do gima sa. ku be bili a ko do basa so'onzah pih sa, yi bah wu ram ma Asiya i raman mbwang ai so'onzah pi." 28 A wa'ana nah ka suha nchimya bwana, ka a chu'ulu i ngyarngya amu chewne, "Dayana yini bwajeh ku Afisa." 29 Be ram mbwang tana Kpasang, wu bapina amu ka'ara mashen bah wu bah zam bapina. mayo duhi a bwala wu mwan tumuu ma Bulus. wu Gayus i Aristakas bah a yuana kuyo Makidoniya. 30 Bulus njila bor ku ciri wu zam bapina, wu muna tumui lilai. 31 Wu mwan Bulus bah yawujeh ku ciri wu bapina ma Asiya a tumayi i lo'o ma ngyarngyai a mu neri ne i do bor ciriya sa. 32 Wu bapina magina a mur lem gima, wu gamur ya amurlem gbai, chew bah nchim wu bapina tana kpasang a do shi'ila gir bah ma'ana a binaya sa. 33 Wu Yahudawa ka war Iskandari ka chele ku dum wuzam bapina. Iskandari katol buhi ku kalang ne i lo'o wawu bapina. 34 A yo shi'ila ne yi bura Yahudiya, kambwang ya a ngyarnya kunya mgba'a baring, ne bwajeh yi Dayana ma Afisa. 35 Beh bah ngwo'olo maram kumu nuna ka'amur wu bapina, ka chew ne, wu bapina ma Afisa, yeni do shi'ilane Afisa yini chikchi'i ma Baku mani Dayana ma mori I "Sifar" bah kwana kuyo kalang sa? 36 A do sagna kunu ku mur wu gir mani sa, bwangna ne wu ning cheche'e, wu do pa'a gir i ka'ara sa. 37 Wu wara wu bapina mani ku bam rengchewe do ne yawu bah njiwi ma lah lem sa ke wu bah tu'uho lu'ulu baku su sa. 38 Ku chew bili, Damatrayas i wu bah tultulu bah aiya ana i lo'o ku mur bwara, wu ban yirya. 39 Wu lo'o na ham ma sunu, ako girshi kuyo ban mashen ban. 40 Ku chew bili suku ciri chew ne kumur girbah pa'ana lina. Do suna gir bah ma'ana be lo'o mani sa chew bah su do i gir chewe ku murisa. 41 chiwa nah ka swa'ana buk wubah zam bapina.