Wu ye'ele i bam bene bah mu mur ye'ele ku bah Yeso Almasihu. 2 Mu mur lem wun chew bah wu mur re'eshe imi duhi duhi ku wu tumu wun, chew kpane wu wara kahkah gir bah sahna wun. 3 Ne wu she'ele ne Kristi yi beh beh bwajeh ma mur wu bura,ne wu bura ya bwajeh ma mur wu maam, ne Baku yi beh Bwajeh ma mur Kristi. 4 Ne wu bura bah ana nira Baku ke da lu'ana chew sun duwa aa kussa ma'amurya a shisa ka'amur ya. 5 Bah maam ba na nira Baku ke lu'ana chew su duwa i ka'amuri hong, shisa ka'amuri i bene a suaha ngyong ka'amuri. 6 Ba maam na do kussa ka'amurio sa, i ma'a ne a sohai ngyong ka'amuri, i ning gir nzoon a yum ngyong mur Bamaam ke a soho ngyong muri. I kusu ka'amuri. 7 Do bwangna ne baburah i kusu ka'amuri sa, yi ningya lilim i gir lem ma Baku, beh Bamaam yi gir lem maa baku, beh Bamaam yi gir lem baburah. 8 Baburah do pura ku yo ba ma'am sa, Bamaam yi pura ku yir Baburah. 9 Ke a wo do pa'a Baburah chew Bamaam sa, a wo do pa'a Baburah chew Bamaam. Yi bah ningya ne Bamaam i ning i gir sunu ma ngyarngya ku ka'a muri chew wu mpilar ma Baku. 11 Ku chiri Tarsu, Banana do ningya ma ka'amuri ku bah Baburah sa, ke Baburah i do ningya ma ka'amuri sa ku ba Bamaam. 12 Bene bah Bamaam pura iyo yir Baburah, Baburah ma Bamaam yi bilai.wu gir mbwang a pura iyo bah Baku. 13 Wu rengye sunu i ka'amur wun, i bwangya ne Bamaam i kussu mishi nere Baku i ka'amuri hong? 14 Beh ningya wu gir do saana wun ne Baburah naa ningya i gul ngyong muri, ningyai gir nzo'on. 15 Ne Bamaam na i gul ngyong muri ningyai gir lemi? A pa'ana gul ngyong muru i Bamaam chew kussu. 16 Bwara na njila ne i li naan ku mur beh lo'o mani, su doi i gir pa'a su sa, ke beh mau ba war ta'a Baku. 17 Ku beh gir bah wara ta'a mani do tuala buk wun yiwa sa, beh yo beh mur wun do ningya ma shimai sa, 18 Ma mo'on wa'ana ne wuna yo ka'ama murwun bene wu bah war ta'a Baku, wui ning langya langya, mi yo pahna ngichewe i beh lo'o mani. 19 Wo do li naan sa ne langya langya param ku ciri wun bah ko rum ne mayewe wun ba Baku njila. 20 Wuna yo bina ka'amurwun ban mo'ona, do billa ma re'eshei Baku wii li sa? 21 Bene bah wui li, wii do ta'ara yir wun sa, mo'on i ningyi i nzalla, mo'on i ka'a li russu ka ningyi pa'a mpuah. 22 Wu do i lah sa ba wo li ho ke wu nuh ho? ke wui sheshe beh lah Baku ka wu chik chiri wa bah a doi i buk ya sa? man bah mu chew wun? mu lem wun chew beh gir bah mu mur pa'a mani? wih, wih! 23 Mi ya'ana ku bah Baku yi bah mii sah wun. Beh Tarsu Yeso ku duk bah a lih chi'i, toh fo'ofo, 24 Bah yo bwata Baku, ka bunu ka chewne, "Mani yi beh yiram bah ningya chew wun, wu pa'a na chew ne wu ning nda re'eshe i mi." 25 Ku nshere mo'on ku nzum billa ma kurwa, toh beh girfeng i mu chew ne "Beh girfeng mani yi ma kur ngari ma shilaam, wu pa'ana wuna munai, wu mu re'eshe i mi." 26 Wuna mu lih beh fo'ofo mani, wa'a mu nuh ku beh girfeng mani, wu mu re'eshe i beh wuh ma mun Baku mashen duk bah ko yo'o yo. 27 Yi bah ningya ne bwara na lina beh fo'ofo ke nuna ku beh girfeng Baku ku nshere bah do bwangya sa, ko ning ne pa'a na gir biwa yi beh yir i shila Tarsu. 28 Ningya ne bapina i mah ka'amuri sunu ka lih beh fo'ofo, ka nuh ku beh girfeng. 29 Bwara bah na lihna ka nuna do zusa gir biwai su'ana to'o iyi sa, lih nuna ku rengchewei. 30 Yi ma'ana wu gina wun a doi i ngyarngya sa, a mur pa'a ko'ongo, i bwana wun a wa'aha. 31 Suna ma na ka'amur su ka su lihna sa nuna so pur ku beh chiri rengchewe ma Baku. 32 Baku na ringya su chewe, i mur ma'a su ku nginshere ma shimai ne su do kping i wu gamur wu bapina sa. 33 Yi bah ne wu swana, wu na yu'ana nda lih billa, wu ta'ara yirwun. 34 Nzallah na mu wol bwara i lih billa ku liih ne wuna yuana nda kam murwun, ko do ningyi gir rengchewe sa, na yuana, mo pa wun gamur lo'o.