1 Bhi ghi, ghi sat bih ndhi nkhit khi kar nmhi shinzeen. 2 A tiit dhe aaas ndhi mu dwan mu kot khi en ndhi nyang-nyang ma, a nyen sim mu, nyen en mu, dhi mu khi shinzeen wuret, nbut demshak khi moghor. 3 Asiduk, ret ndhi shirop ndhi mu wu dwan mu nin kasut a nyen wu bang mu, nnot deh a nyen rhim mu si. Mu nok den kaa du nshu mwos bwer si. Ret deh mu kam bih ndhi a wuret 4 nphe deh mu kam nshirop wu diyen mu nphe dem daas du khi jep du mu khi en du. 5 Mu kam dhe nmu mu bor a nyen en wuret, wubang, shirop wuret mphe yaa-lih mu, yaghal mu deh a nyen loghot ndaas du mu. Mu khi shin bih si mu yak nbhilip Naan khi deh a bih fhilip. 6 Shin asi duk, ghi kar daas wu pan diyen mu nphe deh a nyen en mu. 7 Nbut bih mu khidding bhi ghi den kasak a gurum ndhi mu kam bih wuret nkaa ghi; shin kat ghi phi kam, bhi ghi nin en wuret khi yon. 8 Ghi lap a bhilip ndhi a wuret shin nnot wubis nbut fe, dhe meh gwo ndhi phi jighir bih khi bor ngwu kakul, nphe ndhi khi kot nih khi meh bih wubis ndhi khi sat nkaa mu. 9 Kwerem mu loghot nyen lih fut mu nbut bih mu duk-duk. Mu khi shin bih wuret nmu yaghal mu nok gagharshi khi mu si. 10 Mu nok lingshighin si. Mu khi kot a nyen nin shinzeen wuret, nphe deh nbut bih mu du-duk bhi mu nin ret nmu kam fun nkaa Naan ndhi bar mun. 11 Nphe ndhi gurum mu duk-duk mu naa wuret khi Naan. 12 Nih phi kam yet ndhi mu nyang bih tihkok khi Naan khi dem bih dighinyil. Nih phi kam petong khi en nmun, nbut bang, khi petong lughutnaan nteer ndhi mun dih si 13 yaghal mun phi langyit nphe lap wuret khi den bhizung fun, ndhi a naa ram nmu Naan fun wu yon khi Jesu Kristi, ngu bar mun. 14 Jesu shin kashin nphe mu deh nnih bar nbut wen khi shiit khi waar yaghal dak mun bor a wubang, nphe shin, nyen ndhi mu bun mu ndhi retyit mu nphe shin shiit wuret. 15 Ghi lap bhilip nkaa fe yaghal ghi shin kar nphe bih si mu. Ghi shin dak khi man. Tap meh gwo khi biyas ghi ma.