1 Ghi khikder mu dhe nmu mu sam khi kaa du ntighim daskagham mu khi petong khi mu, mu shin yon nmu, mu den kaa du nbut shiit wuret mu khiding. 2 Khikder mu yak mu khi fhilip meh gwo si, mu nok gagharshik, mu moghor yit ngurum mu kat peh dhi, yaghal mu nin sam khi kaa ngurunm mu duk-duk. 3 Gyet mun khi leng bwer ma shin mun khi loghot ma. Bih demshik khi gyet mu mang en mu. Mu tong nbut shikbis khi thilik. Mu ret ndhi meh gwo khi ji kus khi mun ma shin mu nyang shak. 4 Ndhi mu naa najel khi Nda Naan ngu bar mun khi righit khi muk nphe gurum mu khi dighinyil khiding, 5 bhi a shiit nmu bang fun deh mu shin dhi ma, a nphe najel khimuk deh bar mun dih. Bar mun a khi yar vwang mu laa-la wupo khi dak mun wupo khi Riin Wubang si. 6 Naan shin shiit khi ngu bar Jesu Kristi nphe dhik Riin Wubang khi kaa mu. 7 Shin ndhi si a nphe deh khi ka ndhi dak mun khi wuret finin, bhi mu bor a jep ir kop khi muk nbut tughurkagham nmu sen tai-tai. 8 Lep si a bih lap-yaa. An phi dem nghi ghi lap bhilip khi tughurkagham nkaa bih si mu, nphe deh nyen ndhi mu shinzeen nNaan mu khi daar shin shiit wuret ndhi yit nsar mu dih. Bih si mu a wuret shin mu a bih shin baam ngurum mu. 9 Gu tap gagharshik yoghor khi tang sen kop mu khi jighir khi jaghar nkaa waar. Bih wuni fe nnot phishi shin khi meh baam ma. 10 Ghi nyang meh gwo ndhi phi teh-peh nnaar ngu, khi dangkong dhil kom muk yit khime ma vhil, 11 yaghal gu man ndhi gwo wuni viling yit yar wuret shin nih phi shikbis yaghal tokdiyel nkashin. 12 Kat a lep Artimas ma bhi Tiki nder ghi, bhi mwan la-la ghi wul nder nih khi yil Nikafolis, peh ndhi a mang n'en nphe tong dih nlughun si. 13 Ghi lep khi Zinas ngu man nkaa waar la-la, khi Afolos, shin yak meh bih khi nwen mu. 14 A tiit deh ngurum fun mu kam shin shiit wuret ndhi khi bes shin baam yak mu khi ndeh nnot den shirem. 15 Duk-duk nyyen ndhi mu nder nhi mu phi tal gun. Ghi tal nyen ndhi mu phi dem mun nbut shinzeen. Wuretkhinaan tong nder gu duk-duk.