¹ Khi sihm Jesu an phi sat a zen. An phi sat dung ma, yakkal bhizung mhi khi shin langthing fhun khi sihm Riin wuret. ² Kat a mann bhi an khi bhizung tokkok yakkal shwal bhizung mhi sosai. ³ Pe ndhi an phi sha bhiye mu khi langpoo khikaa nhi yakkal mu fohon an nder Jesu npee emnhihin nhi mu, wuni mhi mu ndhi wuni a khi yarkaam fun gurum. ⁴ Mu a Isra'ilawa. Naan den mu a khipe jepni mu sih, yakkal nin wuret wuyon fini nmu; shin twanshini a wukhime khi mu yakkal shin warr fee mu; mu khi wap Naan wuzenzen; mu lap bii mu ndhi kwakhal den; ⁵ mu a bhikaam bhikaam khi nyen ndhi Jesu tong put di mhi yarkaam mun gurum - Ni ndhi a Ndah Naan nkaa mu duk duk. Mangye mu saam ni tai tai. Asih wai. ⁶ Ama yak ba ndee a khipe ndhi Bhilip khi Naan muut sih. Pe ndhi ba a kowane gurum ndhi ni Isra'ila ndhi ni a ngu Isra'ila ma. ⁷ Yakkal baa kowane jep kop Ibrahim a jep muk mu duk duk ma. "Ama a kaan khi Ishaku ndhi mu npe man jep fuk mu". ⁸ Npee asih, jep ndhi a mun gurum khi mu a jep mhi Naan ma. Ama jep ndhi mu bee mu a khi yarkaam ndhi Naan dem bhi mu a jep wuzen zen. ⁹ Pe ndhi sih a Bhilip ndhi kwahal den: "Nbit mhisih bhi a wul, yakkal Sarah ni npee kat Laa wumiss". ¹⁰ Amhi sih det ma, ama khidangkong ndhi Rifkatu khi kat gam khi gwo wukhime, ndah mu Isshaku - ¹¹ pe ndhi mu bak jep fee mu gwe ma yakkal mu shin mebii gwo ndhi a wuret khi wubis ma, npe de nbii ndhi Ndah Naan den yakkal dem bhi khi da'ar asih ama apee bii ndhi mu phi shin ma, ama apee muk ndhi yong pe - ¹² Naan sat mu, "Gwo wuyon khi shin am ngwo wu lee". ¹³ Mhisih, a khipe ndhi mu ran den gwe sih, "A dem Yakubu, ama ndhi a Isuwa, an phi dem ni ma". ¹⁴ Bhi mu sat ame? Kat mu nyang shin wuret di nder Naan wo? Mangye asih ma. ¹⁵ Pe ndhi sat Musa, "Ama jel nkaa gwo ndhi a na jel nkaa muk, yakkal a khiling wal khi gwo ndhi a khiling wal khimuk." ¹⁶ Pe ndhi asih, apee bii ndhi gwo fee phi dem ma, ko a npee gwo ndhi sih na sih ma, ama a npee Ndah Naan ndhi ni phi naa jel. ¹⁷ Npe ndhi bhilip Naan sat nwa Fir'auna (Pharoah), "Npe bii ndhi sih bhi a epp ghi, npe dee nan a kam baal fhin nsihsak di, yakkal npee dee nsihm nhi wal di duk duk khi yil." ¹⁸ Pe ndhi asih, Ndah Naan phi man jel nkaa gwo ndhi ni phi dem, yakkal nkaa gwo wukwa ndhi ni phi dem bhi shin shikhiling kam nni. ¹⁹ Bhi yakkal gu sat nan gu lih, "Ame lih de ni phi naa gurum khi wubis di ye? Pe ndhi awe sham makaa bii ndhi ni phi dem fe ye? ²⁰ Wukwang kwa, ghi Laa gurum, ghi awe ndhi ghi lap bhilip mhi nyang Naan he? Kot bii ndhi mu byat ni khi makpe sat ngu byat fee sihma, "Ame lih de ghi byat an asih diye?" ²¹ Kot ngu byat wang khi baal nkaa waan fee de ni dak khi ghit wan fee me wang npee shiit khi ni ma wa yakkal me wang wukwa npee shiit wubaan ma a? ²² Ndhi sih a bii wu khime khi bii ndhi ni Naan shin. Pe ndhi ni phi dem nin tukhurnung fini yakkal nin baal fini. Ama nin mangmokhor fini khi kaa nyen shin tukhurnung fee nni, ndhi mu dhiden npee thikohok khi mu. ²³ Yakkal dok ni phi dem nin wuyon khi wuret fini, ndhi khi dhik nkaa mu ndhi khi naa jel fun, mun ndhi khi dak mun den npe lap wuret fini. ²⁴ Ame in kat ni shin bhi sih a pee mun, ndhi yongpe mu shin pwat a khinar Yahudawa mu det ma, ama khinaar jentiils mu duk. ²⁵ Ga bii ndhi sat nbut ran Bhilip Naan khi Yusha'u (Hosea) "Nyen ndhi mu a maan ma, bhi a yong mu a 'Gurum fhin mu'. Yill ndhi an phi dem ni ma, bhi a yong ni a 'An phi dem yi'. ²⁶ Yakkal khipe fee ndhi mu sat mu sih ma, 'Gun a gurum fhin ma', a khipe fee bhi mu khi yong mu a jep khi Naan ndhi khi muut muut ma" ²⁷ Ishaya epdhihil ni npe Israila sih na, "Duk khi ndhi yon khi jep Isra'ila mu a khipe ess kong sih, khi kot a shang fee ndhi khi de, ²⁸ npe ndhi Ndah Naan npe shin shiit khi bhilip fini kyiyil duk duk yakkal la la." ²⁹ Khipe ndhi Ishaya khi riga sat, bii ndhi khi del gwe, na, "In kat a sar ndhi Ndah Naan khi yit nyen sih kop mu ma, bhi yee kot mu dee a khipe nyen Sadum (Sodom) mu sih, yakkal mu dee a khipee nyen Gwamrata (Gomorrah) mu sih." ³⁰ Bhi mun npee sat a me eh? A ndhi Jentiils, ndhi mu phi bong petong wuret ma, bhi mu kat petong wuret, petong wuret ndhi a mhi shin zeen. ³¹ Ama Isra'ila, ndhi bong yarkaam warr mhi petong wuret, bhi kat warr fee ma a? ³² Ame lih a sih ye? Nsar ndhi mu bong ni khi shinzeen ma, ama akhipe ndhi shiit fun npe shin ndun sih, mu gap kwak khi deel pang gap kwak, ³³ khipe yad ndhi khi mu ran, "Gu naa, an pee den n'Siyona pang mhi gap kwak yakkal khi pang mhi kon gurum. Gwo ndhi shinzeen nni bhi khi shuu kakul ma."