¹ Pe ndhi asih, khidetsih bhi me naa wubis di nnyen ndhi mu tong a wu khime khi Jesu Kristi ma. ² Npe warr ndhi ni a mhi riin wuret ndhi shin petong wuret mun nder Jesu Kristi, bhi khi bwot mun shinput nbut warr mhi shikbis yakkal muut. ³ Pe bii ndhi warr mak pe shin ma nsar ndhi shi shik gurum ni khi baal mhi shin fee ma, bhi Naan shin. Naan lep khi Laa ni ndhi naa wubis khi shikbiss, Laa fee wull a nshishik ndhi de a khipee shishik gurum wu shin shikbis sih npee de ni kon khi shikbiss fun di. ⁴ Shin mhisih apee de yarkaam wuret ndhi warr phi dem bhi put a wuret nsihsun nyen ndhi mu tong pe tong wuret khi yarkaam riin wuret, ba a khipe yarkaam fun gurum ma. ⁵ Nyen ndhi mu tong pe tong mhi bii ndhi shishik mu mang bhi mu den nohok du a khi kaa bii ndhi gurum phi dem, ama nyen ndhi mu tong khi yaar riin wuret bhi mu khi den nohok du a khika bii ndhi a mhi riin wuret. ⁶ Khat ghi yit nohok mun gurum tong khi kaa ghi bhi khi mwan khi ghi har ga muut, kat ghi tong pe tong khi yarkaam riin wuret, mhi khi mwan khi ghi khi petong wuret khi tong shakhap. ⁷ Kat ghi tong a petong nohok gurum bhi khi lih nghi dee a shaar fom khi Naan, pe ndhi khi shin yon nwarr mhi Naan ma, kuma mu a wu mak bii warr fee ma. ⁸ Nyen ndhi mu phi bii abi ndhi nohok gurum fun mang mu khi mak pe lih NNaan shin bii ndhi Naan phi dem fee ma. ⁹ Pe ndhi asih, ghi a nbut nohok khi gurum ma, ghi a nbut nohok mhi riin wuret, in kat a zen ndhi riin wuret khi Naan ni nder ghi. Ama gwo ndhi ni khi Riin wuret mhi Jesu Kristi ma, bhi ni a mhi muk ma. ¹⁰ In kaat Jesu Kristi ni nder ghi, bhi sihsak a wu mhi muut khi yarkaam shikbis, ama riin wuret ni di ndhi yarkaam shin wuret. ¹¹ In kat Riin khi Naan ndhi yakkal khi Jesu ntukhun ni nder ghi, bhi Ni ndhi yakkal khi Jesu ntukhun ni npe shin petong wuret nshishik ghi ndhi kot ni khi yarkaam mhi Riin khimuk ndhi ni nder ghi. ¹² Pe ndhi asih, emnhikin nhi mu, mun khi shiit, ama ndhi mu tong pe tong ndhi nohot fun gurum phi dem ma. ¹³ Pe ndhi in kat ghi tong pe tong nohot gurum mang, bhi ghi npe muut, ama in kat khi Riin wuret bhi ghi tih shishik wubis fhik mu shinbaa, bhi ghi npe muut ma. ¹⁴ Pe ndhi nyen ndhi Riin khi Naan phi shin shiit khimu, bhi mu a jep Naan. ¹⁵ Ba dok gu lap a riin mhi kwaram de ngun gu tong khi lukhut wukwa di ma; ama gu lap a Riin ndhi gu tong a jep Naan, yakkal Riin fee khi lih mun mu yong pe NNaan, "Nda Naan! Nda Naan fhin." ¹⁶ Riin fee shi kashin khi shin langthing khi riin fun ndhi mun a jep khi Naan. ¹⁷ In kat mun a jep khimuk, bhi mun a nyen sih kop, nyen sih kop Naan. Yakkal mu sih kop a wu khime khi Jesu Kristi, in kat har mu shujel a wukhime khi ni npe de mun mu kat petong wuret a wukhime khi ni di. ¹⁸ Pe ndhi a naa shujel ndhi khidetsih bhi mak pe ndhi mu khi kam ni khi petong wuret ndhi mu npe nin fee mun ma. ¹⁹ Bii mu duk duk ndhi Naan den bhi mu phi tap khi rihhit de Naan nin khaa jep ni mu di. ²⁰ Npe bii ndhi Naan khom bhi khi mu gap dyel andhi khi kon yarkaam ndhi lih de mu khon ni di, ama baa a khidem khimuk ma, a khi dem khi Naan. Duk khi ndhi asih, bhi den en di ²¹ a ndhi par me bit bhi khiyil fee mu npe bot ni shinput nbut kwaram khimuk de ni wam di yakkal khi kat pak petong mhi kasat ndhi a wuret khipe jep Naan mu sih. ²² Npe ndhi mu man har wa khidetsih bhi duk duk khi bii khi yil sih mu phi gwar khi shuwal, khipe shuwal mat lala sih. ²³ Ani fee det ma, ko mun shikasun ndhi mun khi Riin mhi Naan ndhi ani a wushe kat mhi zuhum fun bhi mun phi gwarr nbut mu, yakkal mu tap phi Naan de nni den mun a jep fini yakkaal shin pe mun mu bet khasun. ²⁴ Npe a nbut shaa mhisih ndhi mu kat pwat di khi detsih, shaa ndhi a mu phi naa fee a shaa ma. Pe ndhi awe khi shaa npee bii ndhi jin phi naa fee? ²⁵ Ama kat mu shaa mpee bii ndhi mu makpe kat fee ma, bhi mu tong mu tap phi muk khi mokhor. ²⁶ Khipe ndhi a sih, Riin wuret khi ji khi lang sar nmun nbut takat fun. Pe ndhi mu man pe dang Naan ma, ama Riin wuret shikasat phi lang sar mun nbut taakat fun khi gwar ndhi khi put khini ma. ²⁷ Yakkal Naan, ndhi ni phi naa bhizung mu, khi man bii ndhi Riin phi leng leng khi kaa fee; npee ndhi Riin wuret fee ni phi dang phi Naan shi phimu yakkal a khi yarkaam bii ni phi dem fee. ²⁸ Mu man ndhi nbut bii mu duk duk, Naan ni phi shin bii ndhi ret a wukhime khi nyen ndhi mu phi dem ni, nyen ndhi khi yongpe mu ndhi kot khi yarkaam nohok khimuk. ²⁹ Nyen ndhi Naan khi takkat mu bhi shin den mu de mu de a khipe Laa ni sih di, npee de Laa fee khikat ni a wushe she ndhihim lih ndhi khi jep mu bwer. ³⁰ Pe ndhi asih, bhi nyen ndhi Naan khi takkat mu duk, bhi yongpee mu; yakkal nyen ndhi yong pee mu, bhi den mu khi yarkaam wuret fini, yakkal shinpak wuret fini mu. ³¹ Bhi mu sat ame npee bii sih mu ye? In kat Naan ni nder mu, bhi awe khi makpe nyang yit mu he? ³² Gwo (Naan) ndhi naa yit Laa (Jesu) ni ma har yakkal shin ni npe tih khi kop mu bhi shinnang a wukhime khi ni (Jesu) bhi khi shin bii mu mun baa sei mu tal ma e? ³³ Awe khi makpe naa biss khi nyen ndhi Ndah Naan khi takkat mu ye? A Ndah Naan khi man bii ndhi a wuret. ³⁴ Awe ndhi khi naa lat khi wubis he? Baa a Jesu Kristi ndhi mu tih ni - met ndhi asih, bhi mu yikkhil khini ntukhn - muhi khi tong bi ni khisar see mhi Ndah Naan, yakkal shin ni phi dang phi Ndah Naan npee mun. ³⁵ Awe makpe gap khinar mu khi den ndhi mun phi nin Jesu Kristi he? A tangshik ha, kot a shujel, kot a neen, kot a biwen, kot a bi tyo mun, kot a muut ye? ³⁶ Akhipe ndhi mu ran muna, "Npee fuk bhi mun phi naa muut bit shi bit mu mang mun a khipe thim npe thi sih? ³⁷ Duk duk nbut bii sih mu, bhi mu met nnyen sih kokorong mu ndhi khi yarkaam Ni (Jesu) ndhi ni phi dem mun. ³⁸ Npe ndhi a lap a yaa ndhi kot a muut ma, khi kot a tong khiyil wuret ma, khi kot a nyen mwan lep khi Naan mu ma, khikot a gwapnati ma, khikot a bii wu khidetsih mu ma, khikot a bii wuji nthihim mu ma, khikot nin yon ma, ³⁹ khikot a fiyer ma, khikot asihng khi tukhul ma, khikot a mebi wukwa ndhi mu klom ni ma, ndhi khi gap khinar mu khi dem mhi Naan mmun, ndhi ni khi yarkaam Jesu Kristi, Ndah wuyon funu.