¹ Kot gu man mhingwo, emnhihim nhi mu (nsar ndhi an phi lap bhilip a khi nyen ndhi mu man warr) ndhi warr phi tong long nkaa gurum har petong khimuk khi yil ha? ² Npe ndhi mat dik khi bii warr ndhi miss shin har petong khi yil khi muk, ama in kat baa miss fee muut, bhi mat fee kat put nbut warr mhi dik fee. ³ Npe ndhi asih, in kat miss muk kudi nkaham, yakkal khat petong khi megwo wudik, bhi mu khi yong ni a thillet. Ama in kat miss fee muut, bhi put nbut warr fee, yakkal mu khi yong ni a thillet ma in kat mwan dik wukwa. ⁴ Npee ndhi asih emnikhin nhi mu, yad ndhi warr fee di, gun ma a wudhidwan nsar ndhi gun ma a shishik Jesu Kristi yakkal khi detsih gun a mhi muk, ni ndhi mu yikkhil khi ni ntukhun pede mun mu pwat gurum nbut shiit mhi Naan di. ⁵ Pe ndhi yad ndhi mu tong pe tong fun gurum di, warr lhi msihsum shikbiss mhi shaa bii khi yil, yakkal duk duk bii ndhi mu shin khi yil fee mwan khi mun khi yarkaam muut. ⁶ Ama khidetsih, mu bet sun shinpwat nbal warr fee, nsar ndhi mu dwam a nbut bii ndhi sham yak mun bring kwaram khini. Khidetsih mun phi shinshiit a khi warr ndhi a wu rihran ma, ama a nbut yarkaam riin wuret. ⁷ Bhi mu sat a me dang ye? Warr fee shi kasat a shikbiss ha? Mangye kot asih ma. Duk khi ndaa asih, ye a mann shikbiss ma, in kat yee warr nin asih ma. Pe ndhi ye a man wat ma in kat baa a warr sat nnaa, "Tap bhi ghi mwan wat". ⁸ Ama shikbis yakkal katpe nder warr yakkal lih ngurum mwan wat. In kat warr di ma, bhi shikbiss muut. ⁹ Asham put gurum nnohot warr, ama ndhi warr put, bhi shikbiss bhirip , yakkal a muut. ¹⁰ Yakkal warr ndhi yee khi lih nghi ghi put gurum, ama nman wul akhi muut. ¹¹ shikbiss katpe nder warr yakkal gwam an. Kat yaar nder warr bhi tih an. ¹² Pe ndhi asih warr amhi Naan, yakkal warr ndhi Naan den a mhi Naan, yakkal shin shiit wurret. ¹³ Pe ndhi asih bhi, nin a ndhi bii wurret lih nan a muut ah? Mangye asih ma. Ama shikbiss, de ni nin ndhi ni a shikbiss di wai, bhi wull khi muut nnan khi yarkaam bii ndhi ni a wurret, yakkal nyarkaam khi warr ndhi Naan den, bhi shikbiss khi tong a shikbiss ndhi mu khi naa pe lang muk ma. ¹⁴ Pe ndhi mu mann ndhi warr a mhi yarkaam Naan, ama an a gurum. Mu seet khi an nbut shikbiss khi yarkaam kwaram. ¹⁵ Pe bii ndhi a shin, bhi a man khinaar fee a wuret ma. Npe bii ndhi an phi dem shin fee, bhi a shin ma, yakkal bii ndhi yit nhi phi naa fee ma, bhi a shin a ni. ¹⁶ Ama in kat a shin bii ndhi an phi dem fee ma, bhi nin ndhi a dem warr fee yakkal warr fee ret. ¹⁷ Pe ndhi asih, a an a ngu shin fee ma, a shikbiss ndhi msihsan phi shin fee. ¹⁸ Ama a man ndhi mu wurret kudi nsihsan ma. Npe ndhi dem pee shin bii wurret ni nsihsan, ama a mak pe shin fee ma. ¹⁹ Pe wurret ndhi an phi dem fee, bhi a shin ma, ama npe shikbiss ndhi an phi dem fee ma, bhi a shin a ni. ²⁰ khidetsih, in kat a shin bii ndhi an phi dem shin fee ma, bhi kudi a an phi shin fee ma, ama a shikbiss ndhi nsihsan phi shin fee. ²¹ Pe ndhi asih bhi a kat warr ndhi ma: In kat an phi dem shin bii wurret, bhi wubis ni nshisan. ²² Sihsan ni phi shin retyit khi warr mhi Naan. ²³ Ama a naa warr wudik nshoop san. Warr ndhi nshoopsan fee demshak khi warr wupoo ndhi nnohok mhi shin nan ma. Ni phi den an a kwaram ntihim warr mhi shikbiss ndhi ni phi shiit nshoopsan. ²⁴ An a gwo ndhi bii fee shang nnan ma! Awe khi put khi an nbut shishik mhi muut se eh? ²⁵ Ama plang abii Naan nder Jesu Kristi, Ndah mu! Pe ndhi asih, an shikasan ashin shiit nbut warr mhi Naan khi bhizung nhi. Ama, nbut shishik mhi gurum, bhi an phi shin shiit akhi warr mhi shikbiss.