¹ Mu sat mu lih ame wu kwa he? Mun pe wet tong a nbut shikbiss de mbaam khi Naan yon dya? ² Mangye kot asih ma. Mun ndhi mu dwam a nbutmshikbiss, shinmang mu wet ntong nbut fe ye? ³ Gu man ndhi yad ndhi gurum mu bwer mu lap baptisma a khi sihm Jesu Kristi; bhi mu lap baptisma a nbut muut khimuk ha? ⁴ Npe baptisma fun, bhi mu wuum mun a wukhime khini yakkal pak muut khimuk bhim mun. Mhisi taa a npe dee yad ndhi mu yakkal khi Jesu Kristi ntukhun khi baal mhi Ndah Naan, bhi mun ma npe kat petong wupoo ndhi ni a wuret. ⁵ Npee tun ndhi mu dee a wukhime khini npee muut khimuk, bhi aish mun npe de a wukhime khi ni in kat mun na mu yikkil khimun nlat khi yil. ⁶ Mu man ndhi petong fun wu sihhir khi riga muut gwe a wu khime khi Jesu Kristi khi del giciye khimuk, npe dee nbaal shikbiss fun tep yak shin mu ndee a kwaram khi shikbiss fee ma. ⁷ Pe ndhi kat gurum mu dwam, bhi mu fohon baal shikbiss shin baa nshisuut. ⁸ Tun ndhi mu dwam a wukhime khi Jesu Kristi, mu shinzen a ndhi mu pee kat petong wuret khi ni. ⁹ Pe ndhi mu man ndhi khi mu yakkal khi Jesu Kristi ntukhun yakkal khi makpe muut wukwa ma - muut kuddi npe tong long khidel muk ma. ¹⁰ Pe ndhi asih, sar ndhi muut, bhi shikbiss kudi khi baal khi kaa muk ma; yakkal khidetsih bhi ni phi tong pe tong fini a wukhime khi Ndah Naan. ¹¹ Asih duk, gun ma gu mang kaasuk a khipe ndhi gu dwam sih yad ndhi shikbiss mang di, ama gun phi tong a wu khime khi Nda Naan ndhi a khi yarkaam Jesu Kristi. ¹² Pe ndhi asih, tap bhi gu yit shikbiss tong long khi kaa sihsuk sih, sar ndhi gun pe bii abii ndhi shisuk gurum dem. ¹³ Ko gu yit shisuk nbut shikbiss de mu kat ni abii shin buddet khi ni. Kat asih bhi gu shin kasuk n'Naan, de ngun gu dee a kihpe nyen ndhi mu yikhil nbut muut mu wakya khi petong wuret mhi Naan, yakkal gu shin kasuk khidhing Nda Naan de nni shin shiit khi gun npe bii wuret mu. ¹⁴ Tap bhi gu nyit shikbiss tong long khi kaa gu ma, npe ndhi gun phi tong pe tong warr ma, gun phi tong pe tong a khi baam khi Naan. ¹⁵ A me wukwa ye? Mun pee tong phi shikbis nsar ndhi mun phi shin shiit khi warr ma ama mun a khi sarr Naan wo? Mangye asih ma. ¹⁶ Gu man ndhi kat gu shin kasuk a khipe kwaram sih, mhi gun a kwaram ngwo ndhi gun phi shin yon mu sih? Gun npe tong a kwaram ntukhim shikbis sih, ndhi khi mwan khi ghi har muut, ko kwaram mhi lokhot, ndhi khi mwan khi ghi khi yarkaam petong wuret. ¹⁷ Ama gu plang Naan! Npe ndhi get gun a kwaram khi shikbiss, ama gu bii khi bhizung gu yarkaam ndhi mu niin ngun nbut kam kam bhilip Naan. ¹⁸ Mu bot gun shinput nbut yarkaam shikbiss yakkal mu den gun a kwarram khi petong wuret. ¹⁹ A lap bhilip a khipe miss sih nsar ndhi bhizung gu baal ma. Khipe yad ndhi gu den nyen fuk mu a khipe kwaraam khi rap khi nyang bii warr, har ndhi shin nyang bii warr ni a phi yon det, akhipe mhisih fee bhi, khi det sih bhi gu den nyen fuk mu a khipe kwaram mhi petong wuret npe shiit Naan. ²⁰ Npe yad ndhi dok gu tong pe tong kwaram khi shikbiss, bhi get gun khi yarkaam petong ret ma. ²¹ Gu kat a delthihim ndhi ne nbut bii ndhi gu shin ndhi kaa gu baa khi kuul diye? Npe ndhi nlat fee bhi gu khat a dwam. ²² Ama khidetsih ndhi gu khat pwat nbut shikbiss yakkal gu tong a kwaram mhi Naan, bhi put kaa fuk khi detsih bhi ndhi gu shin kaasuk NNaan, ndhi khi mwan khi gun but petong wuret nder muk. ²³ Npee ndhi kwat khi shikbiss bhi a muut, ama zukhum khi Naan bhi a petong wuret nder Jesu Kristi, Ndah mu.