¹ Tun ndhi shinzen fun den wuret nkaa mu, mun khi tongshakhap nder Naan ndhi ni a nbut yarkaam mhi ndah mu Jesu Kristi. ² Khi yarkaam khimuk (Jesu Kristi) bhi mu kaat pe del, khi shinzen, nbut baam khi Naan ndhi mun khi del fee sih, yakkal mu kwarang npee kat saam nder Naan. ³ A mhisih det ma, ama munpe kwarang khi shu jeel fun. Mu man dhi shujeel khi ji khi mokhor. ⁴ Mokhor phi shin mohok, yakkal mohok phi shin leng mhi mangye, ⁵ yakkal shaco npee mebi ni phi ji khi kakul ma npee ndhi Riin wuret khi dok den dem khi Naan nbhizung mu gwe. ⁶ Pe ndhi mu kudi phi shin shikbiss, pe wa rhi ndhi Jesu Kristi muut npe nyen ndhi mu man Naan ma. ⁷ Pe ndhi megwo har khi makpe muut npe ngu shinret ma, ko khi ndhi pak bhi mugwo khi kam tih kashim npe gurum wuret. ⁸ Ama Naan nin dem fini nmun, sar ndhi har mu kudi phi shin shikbis, bhi Jesu Kristi muut npe mu. ⁹ Ndhi mut a sih bhi khidetsih ndhi tihkim khimuk lih wuret mun, ni npe lih eska mu de nmun npe tukhurnung khi Nda Naan. ¹⁰ Pe ndhi, lokaci ndhi mu dem Naan ma, bhi muut khi Laa Nda Naan lih mun mu shahar Ndah Naan, yakkal wukwa, khidangkong ndhi mu lat shahar Nda Naan, bhi pe shin khimuk khi lih eska mu put. ¹¹ Amhi sih det ma, Ndah mu Jesu Kristi ni pee lih mun shin ret nyit nder Naan, ndhi ani (Jesu Kristi) ani lih mun mu kat pe shaar khi Naan. ¹² Pe ndhi yad ndhi gwo a khime wul khi shin shikbis khiyil, asih duk bhi muut shin shikbis wul khi muut khi yil. Yakkal muut kaat pe duk duk khi del gurum mu, sar ndhi duk duk fun mu shin shikbis. ¹³ De she warr di, bhi get shin shikbis di gwe, ama kam shikbis di ma, in kat baa warr. ¹⁴ Duk khi ndhi asih, bhi get shin shikbiss yakkal a khider yit Adamu har Musa, har khi ka nyen ndhi get mu shin shikbiss shii khilingkom khipe ndamu, ndhi ani de khipe gwo ndhi ni pe wul sih. ¹⁵ Ama zukhum fee a khipe shikbis sih ma. Ama in kat npe shin shikbiss khi gurum khi me fee bhi gurum mu bwer mu dwam, bhi baam khi Naan makaa fee, yakkal khi zukhum khimuk mhi gurum mu bwer mu kat khi yarkaam baam gurum mu khime, Jesu Kristi. ¹⁶ Npe ndhi zukhum sih khidangkong shikbiss wu khime sih, bhi a gapdyel ndhi naa "Taa lhik nghi", ama khidangkong shikbiss mu bwer, bhi mu lep kih ni nnih zukhum ndhi yee kot khi kat ma, ani a "Dyel ya ghi ma!" ¹⁷ A zen ndhi npee shikbiss khi gurum khime, bhi muut tong long nsar gurum wu khime sih. Ama put kaa fee adang npe shiit ndhi gurum wu khime sih, Jesu Kristi, shin eh! Duk duk fun ndhi mu kat baam khi Naan bwer yakkal mu dak yarkaam fun nder muk bhi mu npe tong long khi yil sih mhi yarkaam Jesu Kristi. ¹⁸ Pe ndhi asih, yad ndhi shikbis khime bhi yaa gurum mu duk duk, bhi asih shin ret wu khime khi fon gurum mu yakkal shin petong wuret khiyil nmu. ¹⁹ Asih bhi yad ndhi gurum mu bwer mu tong pe tong shikbis nsar shim kihling kom mu gurum khime bhi asih duk ndhi gurum mu bwer mu npe tong pe tong wuret khi Ndah Naan npee nohok wuret ndhi gurum wu khime sih ni khini. ²⁰ Mu pwat khi warr ape de shin shikbiss yon di; ama in kat shin shikbiss yon, bhibaam khi Naan yon met nni. ²¹ Pe ndhi asih, yad ndhi shin shikbiss shin yon akih muut, bhi baam khi Naan shin yon akhi petong zeen, ndhi khi mwan khi mun khipetong wuret ndhi ni a yarkaam mhi Jesu Kristi, Nda mu.