¹ Ame ndhi mu sat mu lih Ibrahim, bhikaam bhikaam fun mhi khiyil sih, kat eh? ² Pe ndhi kat get mu naa wuret nbut shiit khi muk, bhi ye khi kat me phishi npe kwarang, ama a tihhim Naan ma. ³ Ame ndhi Bhilip Naan sat eh? "Ibrahim shin zeen Naan, yakkal mu tang nni a shiit wuret" ⁴ Khidet sih npee gwo ndhi shin shiit, bhi kwat khi muk mu khi kun ni a zukhum ma, ama akhi pe kaat ndhi mu khi kwat ni. ⁵ Ama npe gwo ndhi shin shiit ma bhi yakkal npe wuni bhi shinzen ngwo ndhi naa wuret khi gwo ndhi nyang Naan, shinzen khi muk a wu tihtang nbut wuret sih. ⁶ Dauda ma sat wuret nkaa gwo ndhi Naan tang shin wuret khi muk baa a khi shiit ma. ⁷ Sat naa, "wuret khi Naan a nkaa nyen ndhi shinshik wubis khimu a wukon, yakkal shinshik biss khimu a wu sihsok. ⁸ "wuret khi Naan a nkaa gwo ndhi Naan tang shikbiss khi muk ma." ⁹ Bhi yakkal wuret khi Naan sih mu khi sat ni a khi kaa nyen ndhi mu gap dhip mu det a, kot a khi kaa nyen ndhi mu gap dhip mu ma ye? Pe ndhi mu sat mu lih, "Mu tang shinzen khi Ibrahim a khipe shin wuret sih." ¹⁰ Mu tang mni a nang ye? A dye she ba kot a khidangkong ndhi mu gap dhip ni ye? A khidangkong ma, a dye she di! ¹¹ Ibrahim lap yar gap dhip a mhi bam sar khi kaa shinret ndhi get ni khi ni mhi shinzen khi muk bhi kat mu gap dhip ni gwe ma. Bii ndhi lih bhi ape dee mu den ni a nda gurum mu duk duk ndhi mu shinzen ama mu gap dhip mu gwe ma, npe de mu tang shinret khi mu di. ¹² Ni yakkal shin a ndah nyen ndhi mu gap dhip mu ndhi ban ndhi mu gap dhip mu bhi mu bii amhi shinzen ndhi get ndah mu Ibrahim ni khji ni de she mu gap dhip ni di. ¹³ Pe daat ndhi mu shin Ibrahim yakkal jep muk mu ndhi gwar khi de long mhi khiyil bhi ji a khi yarkaam warr ma amaa akhi yarkaam tongret mu shinzen. ¹⁴ Pe nyen ndhi mu tong pe tong a khi yarkaam warr bhi a mu pe tong pe tong Long, pe shinzen de nfii, yakkal daat fee bwar. ¹⁵ Pe ndhi warr fee ji khi tukhurnung, ama pe ndhi warr di ma, bhi nyang bii khi warr di ma. ¹⁶ Pe ndhi asih a khi shinzen, pe dee ndaat fee kat bal shi baam khi Naan yakkal dee a wu dhiden ndhi amhi nkaan Ibrahim mu duk duk - baa a mhi nyen ndhi mu phi bii warr det ma, ama khi nyen ndhi mu bii pak shinzen khi Ibrahim. Ni Ibrahim a ndah fun duk duk, ¹⁷ Khipee ndhi a wu rihran gwe sih, "A den aghi a ndah gurum mu kyiyil duk duk" Ibrahim ni di khi deryit muk ndhi ni Ibrahim shinzen ni, ndhi a Ndah Naan kyenan, ndhi ni (Ndah Naan) phi shin pe nohok nyen wudihdwam mu, yakkal khi makpe den bii ndhi mu de khi yil ma mu kat pe tong khi yil fee. ¹⁸ Nbut nohok mhi mangye bhi shinzen npe mangye,dejinji tong a ndah gurum mu duk duk khiyil, akhipe bii ndhi khi sat ni gwe sih, "Nyen nkaan fhik mu khikot asih duk." ¹⁹ Ba shinzen khi muk zukhum ma, bhi naa kaashin a khipe wu mhimuut gwe sih (pe ndhi yii laa khimuk warih yagurum ka paat sih), yakkal khi ndhi Saratu gyaa awu ndhi khi lala ma. ²⁰ Ama npe bii ndhi Naan khi den, bhi Ibrahim tankoo khi shinzen ma. Kat asih bhi zen khimuk shinbaal ni bhi yakkal saam Naan. ²¹ Ibrahim yakkal shin zen a ndhi bii ndhi Naan khi sat, bhi ji makpe shin fee. ²² Pe ndhi asih, bii sih ma bhi "Naan den bimuk ni a mee khinar shiit wuret mhi Ibrahim." ²³ Ama sihm bhilip ndhi maa, "den bimuk ni a mee khinar", bhi mu ran ni apee muk det ma. ²⁴ Mu ran ni apee mun duk, yakkal mu npe kun ni mun ndhi mu shinzen ni a khi ndhi yakkal khi Jesu ndah mu ntukhun. ²⁵ Ani fee ndhi mu shin ni npe shikbiss fun bhi khidangkong bhi mu yakkal khi ni ntukhun npe dee ieska mu dee di.