¹ Ni dee de nkowane gurum shin yon wunan ndhi mu khiting, npe mdhi baal khi gwo me yon a Naan phi shin fee. Nyen wunan fee ndhi mu di bhi a Naan den mu di. ² Pe ndhi asih, gwo ndhi put mermeng khi nyen wuyon fee mu bhi khiling Naan ma, yakkal nyen ndhi mu nyang khiling fee bhi mu khi lap dyel wubis nkaa du. ³ Npe ndhi Long mu a wu shin lukhut gurum npe shiit wuret ma, sei dai a npe shiit wubis. Ghi phi dem lukhut gwo ndhi yon ghi mhing wo? Ghi shin bii ndhi ret, bhi ghi kat saam khi muk. ⁴ Pe ndhi ni a ngu shiit Naan nder ghi ndhi a wuret. Ama kat ba ghi shin bii wubis, bhi ghi lukhut, pe ndhi ni phi yaa shuk fee a npee bann det ma. Npe ndhi ni a ngu shiit Naan, gwo dhi khi yafom khi kaa gwo ndhi shin wubis. ⁵ Npe ndhi asih ghi lap yon, ba npee tukhurnung khi gwo det ma, ama bhi a npee bhizung wuret fhik. ⁶ Npe bii ndhi sih bhi ghi kwat wap duk. Npe ndhi a wunan mhi a phi shiit Naan, ndhi mu wet phi shin shiit bhisih. ⁷ Ghi kwat gurum mu duk duk kahat khimu; wap mmu ndhi ghi phi kwat wap, shakal mhi del phi tih ndhi mu phi bii ghi, ghi lukhut gwo ndhi ghi phi shin yon nni, ghi shin yon ngwo ndhi yon a mhi muk. ⁸ Tap bhi mu khi bii ghi nkahat ma, sei dai gu dem shak. Npe ndhi gwo ndhi dem thinglih fini, bhi gam phi warr warhi. ⁹ Warr ndhi na, "Tap bhi ghi ndee a thilet ma, tap bhi ghi ntih gurum, tap bhi ghi mwan wat, tap bhi ghi dwan mebii megwo ma," yakkal in kat me warr wukwa di bhi mu bam mu shi ndhisih duk duk. "Ghi dem thinglih fhik khipee ndhi ghi dem kaa sak sih." ¹⁰ Dem gurum khi thikok khi mebi nthinglih fhik ma. Npe ndhi asih, dem gurum, ani a gam phi warr fee. ¹¹ Npe bii ndhi sih, bhi ghi man lokaci, npe ndhi a lokaci ndhi ghi mii nsaam. Pe wu khidetsih, barr fun wulkus met ndhi mu she mu shinzen sih. ¹² Ndhi a lihpar jong gwe, yakkal bit wulkus. Npe ndhi asih bhi mu bwak khi shiit ndhi a wubis mu konsih, yakkal mu rukhun leeh ndhi amhi shiit wu ret. ¹³ Mu mwan shi mwan ndhi yaa, khi pe ndhi a mhi puus sih, ba a khipe ndhi mu shuwa mos sih ma; yakkal tap bhi mu mwan shi mwan ndhi nin amhi tang teher khi miss/mat sih ko ndhi mu makpe yaa kaa sun sih ma, yakkal a mhi jakhar ko mhi thilik sih ma. ¹⁴ Ama ghi rukhun nsihsak Jesu Kristi, yakkal tap bhi ghi shinpe nsihsak dee ni shin bii ndhi ni phi dem fee ma.