¹ An phi sat ngun, emnhikin nhi mu, nbut baam mhi Naan, de ngun gu shin kaasuk a mhi Naan, yakkal ndhi Naan khi lap. Mhisih a shiit mhi zen zen. ² Tap bhi gu den kaa suk a mhi yil sih ma, ama gu villing en gu shin ya nyar wuret. Gu shin mhisih de ngun gu man bii ndhi ret, ni khi lap yakkal de abii wuret ndhi Naan khi lap. ³ Npe baam khi Naan ndhi ni shin nan bhi a sat nkowane gurum khinar gu: Tap bhi gu den kaa gu khiting khiting yad ndhi khi met nbii ndhi yee kot gun di. Gu naa bii mu khi leng wuret, kowane gurum, khi yad ndhi Naan shin yon khi shinzen fhik nghi di. ⁴ Npe ndhi mun khi gurum mu bwer nbut shishik mu khime, ama ba a gurum fee mu duk duk khi shiit wu khime ma. ⁵ Asih fee, mun ndhi bwer a shishik wu khime nbut Jesu Kristi, yakkal mun khime khime a gurum wu khime mu. ⁶ Mun khi sen fun dik dik yad ndhi baam khi Naan shin mun. In kat zukhum mhi megwo a mhi jakham, bhi ghi shin ni ko khi baal shinzen fhik. ⁷ In kat zukhum mhi megwo a mhi baam gurum mu, bhi shin baam fhik. In kat megwo ni khi zukhum mhi kam kam, bhi ni kam kam. ⁸ In kat zukhum mhi megwo a ndhi khi baal tukhur gurum, bhi shin ani. In kat zukhum mhi megwo a mhi shin zukhum mak a mhi ya gurum mu, mhi ghi shin ni khi dem shiit fee. In kat zukhum mak a mhi najeel, bhi shin ni khi ret nyit. ⁹ Yit de dem shak de nohot ntanan. Ghi nyang bii ndhi a wubis; ghi okhom bii ndhi a wuret. ¹⁰ Npe bii ndhi a mhi dem emnhihin, bhi gu nin demshak. Npe bii ndhi a mhi shin yon, gu shin yon nshak. ¹¹ Npe bii ndhi a mhi shin bii khi sen, tap bhi ghi nnyang ma. Npe bii ndhi a mhi Rin wuret; ghi nin dem fee. Npe bii ndhi a mhi shin shiit npe Naan, bhi ghi shin shiit nni. ¹² Ghi nin retyit mhi bhizung, ghi mokhor khi bii den wal, ghi dang Naan khi bhizung ghi. ¹³ Ghi lang kom ghi ghi khiling bii ndhi nyen Naan mu phi dem. Ghi bong yar mu bwer ndhi ghi nin dem gurum. ¹⁴ Ghi dang wuret npe nyen ndi mu phi shinjeel nghi; ghi dang wuret phi Naan nmu ama tap bhi nghi lang poo khi kaa mu ma. ¹⁵ Gbhi shin retyit nder nyen ndhi mu phi shin ret yit; gu wal nder nyen ndhi mu phi wal. ¹⁶ Gu lhi en gu khishak. Tap bhi gu leng leng khi shai ma, ama gu tap nyen shoor mu. Nbut leng fhik tap bhi ghio nin sen bwer ma. ¹⁷ Ghi kwat megwo khi bii wubis sar ndhi shin wubis nghi ma. Ghi shin bii wuret khider yit gurum mu duk duk. ¹⁸ In kat khi shin, yad ndhi ghi naa di, ghi tong shakhap khi gurum mu duk duk. ¹⁹ Tap bhi gu yak fohom khishak ma, gu shin pe n"Ndah Naan shin bini. Npe ndhi mu ran sih naa, "Ya fohom a man; A kwat gwo fee', Ndah Naan sat asih." ²⁰ Ama "in kat nsen laa nsharfohom fhik, ghi shin sih nni. In kat ni khi amtih, bhi ghi shin am nni. Pe ndhi in kat ghi shin mhisih, bhi ghi thil arap wus khi kaa muk." ²¹ Tap bhi wubis tong khi kaa ghi, ama ghi makaa bii wubiss khi shin ret.