¹ Bhi a sat a lih, get Naan nyang nyen fini mu mhi? Mangye asih ma, pe ndhi an ma a gurum Isra'ila duk, a nkaan khi Ibrahim, ndhi a gurum Biliyaminu (Benjamin) mu. ² Naan get nyang furum fini mu ma, ndhi khi man mu gwe dangsih. Gu khi man khi bii ndhi Bhilip Naan sat khi kaa Iliya ma a, khi yad ndhi dang phi Naan khi kaa Isra'ila? ³ "Nda Naan, nyen fee mu tyo nyen jakhan fhik mu, mu tarap pe dang Naan fhik shinsam. De a an det khime, yakkal shin mu phi tang npe tih an." ⁴ Ama Naan lap ame ni ye? "A terr a den npe kaasan nyar lyak (sojoji) mu dubu pokhovel ndhi mu sham kurum nthihim Baa'al ma." ⁵ Duk khi ndhi asih, bhi khipe ndhi khidetsih bhi shang fee mu di npe baam khi Naan. ⁶ Ama ape baam khi Naan, ape mhi shiit zak ma. Inkat a sih ma, bhi baam khi Naan bhi khi kot kudi a baam mhi Naan zak ma. ⁷ Ame wukwa eh? Bii ndhi Isra'ila dok phi tang fee, khi kat ma, ama gurum ndhi Naan den mu mu kaat, yakkal gokkoshi fee mu baal bhizung du. ⁸ Asih khi pee ndhi mu ran: "Naan khi shin enn mhi yokhor mu, assyit yakmu khi naape, yakkal kom yakmu khi nkhiling pee, har warhi nbit wushini." ⁹ Bhi yakkal Dauda sat na a, "Yit de tebur khimu dee a teng khi gwak, mhi daar khimu yakkal mhi delkom mmu. ¹⁰ Yit dee assyit mu kwo yak mu khi naa pee, yakkal dangkong mu khi wet a phi gorong det." ¹¹ Yaakkal a sat asih, "Mu kwap napar ape de mu pwalap dyaa?" Mangye tong asih ma. Npe mhisih fee, a npe del khi kaa khimu fee, de Jentiils mu kar ban di, npe de mu ni yakkal khi thilhik nbut mu di. ¹² Khidetsih, in kat del khi kaa khi mu a mhi delthihim khiyil duk duk, yakkal lang bii khimu a mhi delthihim khi Jentiils mu, bhi wuret khi mu nder Naan khi mu khi warhi a dang? ¹³ Ama khidetsih an phi sat bhilip ngun Jentiils mu, in kat a dee a ngu shiit Naan khi Jentiils mu wai, bhi an phi kwarang khi shiit Naan fhin. ¹⁴ Pak bhi a thilik nyen ndhi mu a gurum khipe an sih. Pakbhi mu lih npak mu bhirhip. ¹⁵ Pe ndhi in kat nyang mu fee a mhi dak khinar yil duk duk, bhi awe kot a lap eh khimu sai petong wuret khidangkong muut. ¹⁶ In kat laah thing wusheshe a mhi Naan, bhi ghill fee duk. In kat sen thing a mhi Naan, bhi song thing fee mu duk. ¹⁷ Ama in kat pak song thing fee mu tarap, yakkal in kat dee song thing paat mu den khinar mu, yakkal in kat ghi kat pak wuret khi sen thing paat fee, ¹⁸ Bhi tap bhi ghi shai khi kaa song fee mu ma, ama a sen fee mu phi dhik gun. ¹⁹ Yakkal bhi ghi sat ghi lih, "Song fee mu tarap a pee de mu del an den khinar mu di. ²⁰ Asih a zen. Npeh nyang shinzen khimu, bhi mu tarap mu, ama ghi dar bal bal npe shinzen fhik. Tap bhi ghi mang kaa sak khiting ma, ama ghi den lukhut. ²¹ Pe ndhi katye Naan mokhor yit song fee khipe ndhi mu yikhil but di, bhi ye ni npe yit gun ma duk. ²² Gu naa dak nkan bii ndhi Naan shin khi yit wuret yakkal ndhi bhi khi shuwal: wu shuwal fee ji nkaa Yahudawa mu ndhi mu pwalap, ama zukhum khi Naan khi ji ngun inkat gu delthihim khi nkaan zukhum khimuk. In kat a sih ma bhi khi gap gun kon sih. ²³ Ko mu ma, in kat mu delthihim khi nyang shinzen fut, bhi mu khi del mu shinji nbuut fee. Pe ndhi Naan ni awu del mu shinkam nbut wukwa. ²⁴ Pe ndhi in kat khi mu gap gun shin pwat nbut thing paat ndhi kaa bhit a ndem, yakkal baa mu bi bii ndhi a wu sihir ma bhi mu del gun shin kam nbut thing paat ndhi a wuret, bhi shinang song wu sihir fee bhi mu khi del mu shin waji nbut thing paat ndhi a mhi mu ma ye? ²⁵ Pe ndhi an phi dem ngun gu tong nohot man ma, emnhihin nhi mu, khi bii peta sih, npe de yah ba gu nsen nbut leng muk: Me pak tukhur baal ta nka Isra'ila mu sei duk duk khi Jentiils mu ro ndhihin. ²⁶ Pe ndhi asih duk duk khi Isra'ila mu npe bhirip khipe ndhi mu ran sih: "Ngu baam kaa mu khi tong put nbut Sihiyona. Khi shang nyang mwan nder Naan shin put nbut Yakubu, ²⁷ yakkal mhisih kot a twarshik man khi mu, par ndhi a kon khi shikbis khi mu." ²⁸ Npe yad ndhi Bhilip Naan ni di, bhi mu a nyen nyang yit gurum npe gun. Ama kat a npe mhi kon kuriya, bhi mu dem mu npe bhikam bhikam khi mu. ²⁹ Npe ndhi zukhum khi yong pe khi Naan mu maka villing. ³⁰ Khipe yad ndhi get gu khiling nNaan ma sih, khidetsih bhi gu kat najeel npe shii khiling kom khimu. ³¹ A khipe mhisih fee, khidetsih Yahudawa fee mu shi khiling kom. Bi ndhi den fee bhi a ndhi npe najeel ndhi mu nin ngun bhi mu ma mu kat najeel. ³² Npe ndhi Naan bal mu duk duk den nbut shii khiling kom npe de ni nin najel fini mu duk duk di. ³³ Wayo, sihmgpe khi sen khi man npe Naan! Gab dyel khi muk khipe man ma, yakkal yarkaam khimuk khipe naa fee ma! ³⁴ Pe ndhi awe man nohok Naan eh, kot awe tong a ngu kaar khimuk eh? ³⁵ Kot awe she shin mebi nNaan he, yakkal a ndhi Naan khi kwa ni ye? ³⁶ Npe ndhi bii mu duk duk, a ni khi mu, mu khi pet a khisar muk, yakkal a mhi muk. Sam sihm a mhi muk tai tai. Asih wai.