¹ Khidangkong bii ndhi sih mwo, bih a naa pee, bih a naa philih a fung khitingnaan. Dighil ndhi nshee ndhi a khiling nih phi lap khi an, a khipee fee, phi sat naa, "Ghi kaa npesih dee nnan a nin bii mwo ndhi mwo npee taa khidangkong bii sih mwo di nghi. ² Ba khi tankoo ma bih a wayaa nbut Riin, yaghal a naa mee peetong khitingnaan ndhi meegwo shi khitong khidel fe. ³ Gwo ndhi khitong khipeetong fee dee khipee jaspa khi kaneliyan. Nweeh neer peephitong fee shikhir kaat. Nweeh fee dee khibii meebii shi ndhi mwo khi yong a Emerald. ⁴ Dang bih mee - peephitong mulki mwo di zak yaa gurum khi feer, mwo neer peephitong mulki wuyon fe. Nyen - nan mwo yaa gurum khi feer khikaa pee-phitong mih mulki ndhi sih mwo, mwo juwal biikaa mih peetong wuyon (mulki) ndhi mwo dak mwo shi zinariya. ⁵ Khi pee-phitong fe, bih millap tong put khibii wus sih. Naan tong piram pee zak. Fitila mih wus mwo pokhovil phi shan ntighim pee tong wuyon fee, fitila mwo pokhovil sih a Riin khi Naan. ⁶ Ntihim pee phitong wuyon (mulki) bih a naa mee bii khipee am - nihin sih ndhi milap-milap khibii ghilas sih ndhi dong kyer-kyer. Mee bii shi mwo ndhi mwo khi seen mwo feer, mwo khi yit gam-gam (bwer) ntihim khin ndangkong zak. ⁷ Bii ndhi khi seen ndhi nshee fee a khibi Liit (Lion) sih, wu vil lapshak khi laa Randong. Wu kun ni khi yit khipee gurum sih, wu fee zak a khibii ngoro ndhi khi yakhal kaa khiting sih. ⁸ Bii ndhi khi seen mwo feer sih mwo khi shaap - khi shaap mwo peemee zak, mwo khi yit gam-gam shi buut-shibuut khi ndangkong zak. Ba mee lap nohok di ma, lihpar khi puus bih mwo phi tam det, dee tong mwo saam Naan mwo naa, "Gwo wubang, Gwo wubang, Gwo wubang' Nda Naan bal met mbii mwo duk-duk. A ni gyet bhi bhit, A nih khidet sih, A ni ntihim zak." ⁹ Bii ndhi mwo fee ndhi mwo khi seen sih mwo dihk yil nNaan, mwo shin wuyon nih khi plang, npee gwo ndhi khi seen tai-tai. ¹⁰ Nyen nan mwo yaagurum khi feer mwo kurum ntihim gwo ndhi khi tong khikaa pee tong wuyon (mulki) fe, mwo dihk yil ni, npee ndhi ni khi seen wu tai-tai. Nyennan sih mwo shuwat nbiikaa fut mwo ntihim khimuk, mwo phi sat naa, ¹¹ 'Nda Naan - fumu, a ghi, ghi mak lap wuyon, nda Naan, khi dihk yil khi bal. A ghi ghi lih bii mwo duk-duk. A shi leng fihk bih ghi lih mwo di zak. A ghi, ghi shin seen nmwo.