¹ Ghi ran shin mwan ngulep khi Naan ndhi ni phi tap khi Ekkilisiya ndhi khiyil nSardi sihnaa lep ndhi put a phi gwo ndhi ni Riin khi Naan mwo pokhovil, khi zar pokhovil zak. A man shiit shin fik, ghi lih dee gurum mwo shin leng naa ghi di khi seen, dangbih ghi a wu mumuut. ² Ghi yaghal khiting ghi dak gokshii bi ndhi kudi khi seen yakba khi nsihit muut, nfee ndhi a kat shiit shin fik ret duk-duk nyit Nda Naan ma. ³ Ghi khikder sak, khi bii ndhi ghi ten ghi lap khi ndhi ghi khiling. Ghi lap lohot, ghi tihwap. Kat ghi yaghal nsam ma, bih annpee wul/ji akhipee wat sih, ba ghi npee man bii ndhi an khini nder ghi ma. ⁴ Pak gurum mwo di nyil nSardis ndhi mwo khi ten vwang lee fut mwo bang - bang, mwo wuni fe npee mwan-mwan awukhime khi an, mwo khi lep lee wupiya-piya saksak, npee ndhi mwo mak. ⁵ Nyen ndhi mwo sih kokhorong, a mwo khi lep lee wu piya-piya sih. A tih sim khi mwo nbut dikarda ndhi ni khi sim nyen seen mwo ma, a yong sim muk ntihin Nda Naan khi jep lep khimuk mwo. ⁶ Gwo ndhi ni khi kom, bih khiling bi ndhi Riin phi sat nEkkilisiya mwo. ⁷ Gwo fe sat nan naa, "Ghi ran lep shinmwan nder ngulep khi Nda Naan ndhi nih phi tap khi LihNaan (Ekkilisiya) ndhi khi yil Filadelfiya. Lep ndhi sih a bilip ndhi put npih gwo wubang khi ngu satzeen. A gwo wuni fe khi mulki mih nda Dauda (David), kat epp philih bih ba mee ngu mak okhot fee, kat bal philih bih ba ngu epp fe zak. ⁸ A an a man shiitshin fhik mwo. Ghi naa deel. A den philih nghi a fung ndhi ba me ngu mak bal fe. A man ndhi bal fhik kat, dau khin ndhi asih bih ghi shin lohot khi bilip finih, ba ghi nyang sim finih ma. ⁹ Ghi khiling ah, an npee lih nyen lihnaan mih sheetan mwo - ndhi mwo naa dun a Yahudawa, dang bih a sihnna, a dung et-yet. An npee lih dee mwo ji kurum ntihin ghi, bih yaghal mwo man ndhi a wal nghi. ¹⁰ Mpee ndhi ghi tap khi war khi mohor, an zak a tap khi ghi nsar yakba mebii bhim/tung ghi ndighin teer mih jeel ndhi khi waji khikaa yil fe, mpee ndhi jeel fe npee sham gurum mwo duk-duk khi yil sih. ¹¹ Dee di lee ma bih an npee wawul, ghi yaa bii ndhi ghi khi nih bal-bal, yak ba mee gurum khin duwan biizughum mih kokrong fe. ¹² Duk-duk nyen ndhi mwo sih kokrong bih mwo khi dee a tukus lih khi Naan fihnih. Gwo fe khi sham put nlih eh mak, dangbih a ran sim Nda Naan nkaa muk, sim yil wuyon mih Naan (Urushalima wu pwo, ndhi tong sam khiting Naan nder Naan finih), khi sihm finih wu pwo. ¹³ Gwo ndhi ni khi kom npee khiling pee, bih khiling bii ndhi Riin khi Naan phi sat nyen mwan nder Naan mwo (Ekkilisiya). ¹⁴ Gwo fee sat naa, "Ghi ran lep ghi shin ngulep khi Naan ndhi nih phi tap khi Ekkilisiya ndhi khi yil Ladisiya. "Lep ndhisih put a nsar gwo ndhi sim muk a Asihwai (Amin) ngu zeen-zeen, ngu langting, wuyon khikaa bii ndhi Naan dak duk-duk. ¹⁵ "A man shiit shin fhik, ba ghi ban ma, ba ghi zuhum ma, ¹⁶ Npee ndhi ghi a khinaar - khinaar det bih an npee fuut ghi shin put nphinih. ¹⁷ Ghi sat ghi lih, "An a ngu biilong, an khi biilong mwo bwer gwe, an zak phi dem mee bii ma". Dang bih ghi man ma, ghi a ngu jeel, ye khi ret dee ngurum mwo naa jeel fhik khi yit mih bam ma. Ghi a khipee nyen wu vuham mwo. Ghi a khipe nyen jeel mwo ndhi mwo khi mwan ngurum. ¹⁸ An phi sat bhilip nghi, "Ghi seet zinariya nder nih, zinariya wuret-ret dee nghi dee a ngu biilong di. Ghi seet lee piya mwo nder nih, dee nghi oghot/paa guum fhik di. Ghi ji ghi seet enyit zak, dee nghi ghi lih nyit fhik mwo npee naapee di. ¹⁹ An phi gwakshik yaghal a shin kar nyen ndhi a wal mwo. Mpee wuni, bih ghi tih-wp mih zeen zeen. ²⁰ A daar sih khi philih, phi kwak philih bizung. Kat mee gurum khiling dighil nih dee epp philih, bih a dhel ndighin lih khimuk dee a sihsih khi ni, ni zak sih sih a wukhime khi an. ²¹ Nyen ndhi mwo kat kokhorong bih a shin pee mwo dee mu tong khikaa peephjitong wukhimee khi mwo nmulki khi Naan. ²² Gwo ndhi nih khi kom mpee khilingpe, bih khiling bii ndhi Riin khi Naan nih phi sat fe nyen mwan nder Naan mwo."