¹ Khimbe nnaar jep lep feh mwo ndhe yeh nih phi yaa nmhe lha wang ndhe mwo pohovel sih ji satman nnaa, "Ghi ji nnan a nin nahgha mat tihleet ndhi khi tong khi dheel am ndhi a nyang nih (yihir dang kong nhi nnih), ² ndhi a wu khimhe khi daskaham yil mwo shin shihit lih leet yahal mwos tihleet khi muk a nyen dhikin yil sih ndhi mwo shu baa tih mwo. ³ Bih lha lep feh mang an shin dheel nbut khi riin shin wah yah ndem yahal a nnaa mhe mat khi tong khi dheel mhe lu wubis ndhi nih a boot khi khi-sher sim mhi bak peh. Lu wubis feh nih khi khaa mu pohovel yahal sohomsar. ⁴ Mat sih jwal mhe leh shi ran ran yahal lihit sat khi zinariya yahal pang mhi nbem mwo shi nkahan bwer. Nih phi yah mhe jang shi nsar dhi ndhi mwo dak nih khi zinaariya a wugam khi bih mwo ndhi bis naa yahal simshik wuban mhi tihleet khi muk. ⁵ Nbihkhin muk bhi mu ran mhe sim shi ndhi phishi feh a wusok: "Baitalami wu yon, nhikin shorop tihleet mu yahal bih wubis mwo ndhi khi dhikin yil sih". ⁶ A naa tihkim nyen mwan nder Naan mwo ndhi khi ten shu lang nkhaa muk gwe khi tihkim nyen ndhi mwo tya mwo nphe sim khi Jesu. Ndhi a naa nih bhi bih feh fii pwo nnan. ⁷ Dang bhi lha lep sih sat nnan nnaa "A mhe a bih ndhi ji khi bih fiipwo nnan yeh? A sat phishi sim mat feh ndhi mwo a wusok feh nghi yahal khi lu wubis sih ndhi mang nih, lu wubis sih ndhi nih khi khaa pohovel yahal sokom sar sih. ⁸ Lu wubis ndhi dok ghi naa kutdi khi detsih maa, dang bhi nih nphe shin put khaa nfung ndhi khi phe naa lang feh sih maa. Bih khi yah tihkook khi bih mwo. Mwo ndhi mwo ndhikin yil sih ndhi mwo ran sim mwo nbut takarda mhi sehen maa yahal nshe khi yil sih - bih fiipwo nphe khat mwo khat mwo nnaa lu wubis sih, nphe ndhi gyet nih dih bhi shin nih dih maa bih shin nih nphe kot dih. ⁹ Ndhi sih nih phi dem a en gurum ndhi man phitong dhikin yil sih khah ndhi mwo pohovel sih a pang pohovel ndhi mat sih khi tong khidheel. ¹⁰ Shin a daskaham mwo pohovel. Daskaham mwo pahat mwo bwak gwe, khimhemnih dih gwe yahal mukwa feh man kot dih gwe maa, yahal khat wul bhi nih nphe lang likim dang sih. ¹¹ Lu wubis ndhi gyet nih dih nshe, dhe kutdi khi detsih maa bhi a nih a miskaham wu pohokun sih. Nih nbut wu pohovel yahal nih nphe tihkook khi shin. ¹² Sokom ndhi yeh ghi naa mwo sar sih a daskaham mwo sar ndhi man mwo shin yil ndhi mwo nphe yah gwe maa, dang bhi mwo nphe khat baal nphe shin bih mwo khiphe daskaham mwo sih nphe 'awa' khime a wukhimhe khi lhu wubiss sih. ¹³ Mwo a khaan wu khimu, yahal mwo phi shin baal fut nphe shin jep bih mwo nlhu wubis sih. ¹⁴ Mwo nphe shin lyak khi lha tihim. Dang bhi lha tihim sih nih nphe sih lyak feh nphe ndhi nih a Naan ndhi khi baal maa dau, shin nih a wuyon nkhaa gohotshi daskaham mwo - yahal nyen ndhi mwo a wukhi mhe khi nih a nyen ndhi nih yong phe nmwo, a nih bun mwo yahal mwo khi shinzehen". ¹⁵ Lha lep sat nnan nnaa, "Am ndhi yeh ghi naa ndhi mat tihleet yeh khi tong dih sih, a gurum mwo, ndhi mwo dokol, yil mwo shinih shinih, yahal liis mwo bwer. ¹⁶ Sokom mwo sar ndhi ghi naa sih - mwo khi lhu wubis mwo khi nyang mat tihleet sih. Mwo khi lhi nnih dhe shinglhi (tehis) yahal shin dhe nguum, mwo khi aar lhu muk yahal mwo shaan nih khi wus. ¹⁷ Nphe ndhi Nda Naan viling bihzung dhe mwo gam nook khimuk, yahal mwo dem yahal mwo shin jep yil khi mwo nlhu wubiss, dhe nbhilip Nda Naan gam dih. ¹⁸ Yahal mat ndhi yeh ghi naa sih a yil wuyon ndhe dhe long nkaa daskaham yil sih mwo khidhing.