1 Sat nmu nna, "Zen a sat ngun, pak gu mu ndhi mu khi dyerem si mu nphe sham muut ma deshe mu naa khitingNaan sam khi bal dih." 2 Khidangkong teer peme, Jesu kok Pita khi Jamis yaghal Jon mu ndershin mu khaa npang wu fyer, mu nmessut. Bhi shi-shik muk viling mbhisi khi yit mu. 3 Bhi leh nshi-shik muk viling a piya sak-sak, miliap sak-sak, piya met meh bih khi yil si ndhi khi vwang nih wul a si. 4 Bhi Elaijah nmeh a Musa mu nin kasut nmu, yaghal mu phi lap bhilip mu khi Jesu. 5 Pita lap yaghal sat nJesu na, "Ngu kam, ret ndhi mun mbhesi, peh dih asi bhi mu dak jep bit mu kun, khime npeh ghi, khime npeh Musa, yaghal khime npeh Elaijah." 6 (Nphe ndhi man bih ndhi ji sat ma, nphe ndhi bih fe lhi lughut nmu.) 7 Bhi meh mhilim fwan sam wup mu. Bhi mu khiling meh dighil put nbut mhilim fe nna, "Mhisi La dem fhinih si. Gu khiling nnih." 8 Bhi leh det, ndhi mu yighir phi naa-peh, ba mu naa meh gwo nder du ma, deh a Jesu det. 9 Ndhi mu tong npang fe mu phi yoksam, bhi nih kar mu nna tap niyo khi nsat meh gwo bih ndhi niyo naa, kat ba a khidangkong ndhi La Gurum yaghal nbut wu murrap/dwam mu ma. 10 Yaghal mu yit bih fe nbhizung du, dang bhi mu sat but khinar sut kot a meh a "yaghal nbut niyen ndhi mu murrap/dwam" oh. 11 Mu tal shi phi muk mu na, "A meh lhi deh niyen man ran mu na a Elaijah khi she wul dang si eh?" 12 Sat nmu nna, "Elaijah a tiit deh nnih kot a wushe wul dih dang nphe deh nnih bhin wawul khi bih mu dih khiding. A si bhi a meh lhi deh mu ran mu na a tiit deh La Gurum shu jel nphe bih mu bwer yaghal yaghal shin mu khi shin khi nih khipe gwo ndhi nih nnot nphishi/meh bih ma si eh? 13 Dang bhi a sat ngun Elaijah fe wul gwe, yaghal mu shin bih ndhi bhizung du mang/dem khi nih, khipe ndhi mu ran nbut bhilipNaan khi kha muk si." 14 Ndhi mu ji nder jep kam/shar shiit khi muk mu, bhi mu naa du gurum mu bwer mu den mu khinar yaghal niyen man ran mu phi gagharshik khi mu. 15 Bhi la-la ndhi mu naa Jesu, bhi lhi ap-po ndu gurum fe mu khiding yaghal ndhi mu phi sho kha'at phi muk bhi mu tal nih. 16 Nih tal phi jep kam/shar shiit fhinih mu, "Gun phi gagharshik khi mu a khikha meh?" 17 Bhi meh gwo nbut du gurum fe lap phi muk nna, "Ngu kam, a ji khi la nih nghi. Nih khi meh riin ndhi phi shin khi nih deh khi man lap bhilip ma. 18 Bih fe phi tong dwar nih yaghal tong khi mang nih kon nyil yaghal phimuk tong pang dhifil, ees aghas nih, shin shishik muk phi bal kakrak. A sat jep kam/shar shiit fhik mu nphe shang bih fe shin put nbut muk, dang bhi bih fe ma mu." 19 Lap nmu, "Sen ngurum ndhi teer si ndhi shin zen wen mu si, an nphe wet deh khi gun a nang wai eh? An nphe wet mohor khi gun a nang wai eh? Ghi ji khi nih n'an. 20 Mu ji khi la fe nnih. Ndhi riin fe naa Jesu, dih lala bhi lhi nkukwi mang nih gap. La fe pal nyil yaghal difhil pang nphimuk. 21 Jesu tal phi nda muk, "Wul a yii dang ndhi nih asi eh?" Nda fe sat nna, "Yaghal ndhi nih nla ji wul shini. 22 Tong khi wet kon khi nih nbut wus ma bhi am deh nnih tihkok khi nih dih. Kat ghi mak shin meh bih, ghi naa jel mu ghi baam mu." 23 Jesu sat nnih, '"Kat ghi mak ah'? Bih mu duk-duk a bih mak shin ngwo ndhi khi shin zen. " 24 La-la bhi nda la fe bwot oor nna, "A shin zen! Khi baam an khi en nok shin zen fhin si!" 25 Ndhi Jesu naa du gurum fe mu phi sho ji nder mu, bhi biyal/shen riin wubis fe yaghal sat nna, "Ghi riin phibam khi nmhi kom dwaghar, a sat shen nghi, ghi put ghi bah nbut muk, shin tap ghi waya dih ma." 26 Bih fe bwot orr yaghal shit la fe khi khikwi bal-bal det bhi yit nih dih. La fe lapshak khipe gwo ndhi muut si, ndhi lhi nmu bwer mu na, "Muut gwe." 27 Dang bhi Jesu shin sar ep nih shin kaa khiting, bhi la fe yaghal khiting. 28 Ndhi Jesu ji dighinlih fe, bhi jep kam/shar shiit khi muk mu tal phi muk nnabiya mu na, "A meh lhi deh mun mu put khi nih ma eh?" 29 Sat nmu na, "Bih si a bih shen put det kat a khi dangphinaan ma." 31 nphe ndhi nih phi kam bih jep kam/shar shiit fhini mu. Sat nmu, "Mu nphe shin La Gurum shin mwan khi sar meh gurum mu, yaghal mu khi tih nih. Kat mu lat tih nih, khi dangkong teer kun bhi nih nphe shin yaghal." 32 Dang bhi mu man phishi bhilip ndhi sat fe ma, yaghal mu lwughat nphe tal shi phimuk. 33 Bhi mu ji rho nKafarnaum. Khidangkong ndhi rhi ndhighinlih bhi tal phi mu nna, "Ye gun a phi bhilip meh khi yarkaam eh?" 34 Dang bhi mu deh kot. Nphe ndhi ye mu phi gagarshik nkha kot a weh a wuyon khiding oh. 35 Ndhi yaa peh tong, bhi yong jep kam/shar shiit fhini mu ndhi mu sar po vhil si khishak yaghal sat nmu nna, "Gwo ndhi nih phi dem kot a nih nphitighim, bhi khi kot a ndangkong yaghal ngu naa gokshi mu khiling." 36 Mang meh la wuleh bhi yaghal den nih khinar mu. Mang nih nsar nih yaghal sat nmu nna, 37 " Meh gwo ndhi khi la si yaa nphe sihm nih, lap a an duk, shin kat meh gwo lap an, bhi lap a an nmehsan det ma, dang bhi a khi gwo ndhi lep an duk." 38 Jon sat nnih, "Ngu kam, mu naa meh gwo shi phi pwan riin wubis khi sihm ghi yaghal mu dhin nih, nphe ndhi nih phi mwan nder mu ma/Nih a shar mwan fun ma." 39 Dang bhi Jesu sat nna, "Gu nok dhin nih si, nphe ndhi meh gwo ndhi mak shin bih ap-poo wuyon khi sihm nih bhi yaghal khidangkong bhi khi sat meh bih wubis nkha nih ma. 40 Meh gwo ndhi niyang mun ma nih a nmun duk. 41 Kat meh gwo shin ɗaa am shu ngun nphe ndhi gun a nmhi Kristi, a sat zen ngun, kiyen khi muk khi ben ma. 42 Meh gwo ndhi khi lhi nmeh la wuleh si ndhi mu phi shinzeen am gap kwak nih, bhi wak ye kat meh baga pang-ess fin mu viid ntok-nih yaghal mu kon nbut nighin am nkong wuyon/teku. 43 Kat sar ghi lhi nghi ghi gap shi ghi nphe pal, ghi gap shin-bah. Wak ye ghi rhi khi pe kat se'en nnot pak mat/met ndhi ghi kot khi sar mu vhil yaghal shin ghi kat kha-sak nbut wus mhi tai-tai, ndhi khi pit-pit ma. 44 Peh ndhi niyet khi mu khi dwam ma, shin wus fe khipe pit ma. 45 Kat kwak ghi lhi deh ghi gap shi ghi, gap nih shin-bah. Wak ndhi ghi rhi khipe kat se'en a khighil met ndhi ghi kot khi kwak ghi vhil yaghal mu kon ghi nbut wus wu tai-tai. 46 Peh ndhi niyet khi mu khi dwam ma, shin wus fe khipe pit ma. 47 Kat yit ghi lhi deh ghi gap shi ghi, shang/teh shin put. Wak ghi kat rhi nbut petong khi Naan khi yit asyit khime met ndhi ghi kot khi yit mu vhil yaghal mu kon ghi nbut wus mhi tai-tai, 48 khi peh ndhi niyet khi mu khi dwam ma, shin wus fe khipe pit ma. 49 Nphe ndhi duk-duk gurum mu nphe shan nwus khi khiin si. 50 Khiin a bih wuret, dang bhi kat khiin kudi khi shang fhit ma, ghi nphe shin a nang deh nnih kot khi shang fhit dih eh? Gu kot khi khiin khinar gu, yaghal gu deh khi tongshaghap khi shak."