1 Bhi yit peh fe dih yaghal mwan yaa nyil fhinin, bhi shar shiit/jep kam khi muk mu mwan nder muk. 2 Ndhi Puus Bhit Lapnok/Bhit Wu Pokovol wul, bhi kam-kam nlihNaan. Gurum mu bwer mu khiling nih bhi fii-po nmu. Mu sat nna, "Gwo si kat nkan kam si mu a ne?" "Gwo si kat nbiman si a ne?" "A meh a bih fii-po si mu ndhi nih phi shin khi sar nih si ye?" 3 "A nih a kapinta ma a, la khi Maryamu khi emnighin Jamis khi Joses khi Judas yaghal Siman ma a? Emnighin muk jirap mu nder mu mah?" Tugurnung yaa mu khi Jesu. 4 Bhi Jesu sat nmu, "Ngu jagham/naa-peh khi kha tong khi wen nnot yon/sihm ma, kat a khi yil khi muk ma yaghal nkan khi muk ma yaghal dighinlih khi muk ma." 5 Nih mak shin mehbi wuyon, kat a lhi sar khi kha niyen gok mu khi lat khi shuwal nmu det ma. 6 Wen khi shinzeen khi mu fii-poo nnih. Bhi del mwan khi jep yil wu diyen mu phi kam. 7 Bhi yong mu ndhi sar po vhil fe yaghal yaa lep mu shin pwat vhil-vhil, yaghal shin bal nmu khi kha riin wubis mu, 8 shin sat nmu nok mang mehbi pan nder sut nphe del mwan fe ma, wak bhi a la kam- nnot biredi, nnot ndaam, yaghal nnot nshaghal nbut zaal khi mu si- 9 dang bhi mu rwan kohop, yaghal mu khi rwan leh vhil ma. 10 Sat nmu, "Kat gu rho nmeh lih, bhi gu tong dih wul bhit ndhi gun yit peh fe dih. 11 Kat meh yil niyang lap gun kot niyang khiling ngun, kat gu yit peh fe, bhi gu pwas orong shin bah nkwak gu deh nnih deh a langting nmu dih." 12 Mu pwat mwan yaghal mu sat ngurum mu viling yit shikbis fut dih. 13 Mu pwat khi riin wubis mu bwer, yaghal mu pwas moor nkha niyen wu gok mu shin mu lat khi shuwal khi mu. 14 Long Herod khiling ndhi si, nphe ndhi sihm Jesu khaat-peh/wal bwer. Pak mu phi sina, "A Jon ngu baptisma ndhi mu yaghal khi nih ntughun yaghal nphe ndhi a si, bhi bal bih fii-po si mu phi shiit nbut muk." 15 Pak mu sat mu na, "Nih a Elijah." Shin pak mu na, "Nih a ngu jagham/naa-peh khi kha, khi pe nmeh niyen jagham mu wu gyet yam-yam." 16 Dang bhi ndhi Herod khiling bih si bhi sat nna, "Jon, ndhi a gap kha muk, mu yaghal khi nih nmuut." 17 Nphe Herod lang lep deh nmu yaa Jon dih shin lhi nmu bwaghat nlihkwoo nphe bih ndhi Hirodias (mat emnighin muk Philip) sat, nphe ndhi lap nih nmat. 18 Nphe ndhi Jon sat Herod nna, "Ret deh nghi ghi lap mat emnighin ghi dih ma." 19 Dang bhi Hirodias mang tugurnung khi nih bhi tang yarkaam deh nnih tih nih dih, bhi mak shin fe ma, 20 nphe ndhi Herod lughut Jon; man ndhi nih a gurum wuret shin nih khi riin nmhi Naan, bhi yit nih nkaham. Khiling bhilip khi muk tong khi lhi tugurnung nnih, dang bhi nih phi retyit muk nphe khiling nih. 21 Det bhi yar fe wul ndhi Herod shin plang nmhi puus lah fhini yaghal shirak sih nphe niyen shiit fhini mu, khi khinshong khi muk mu, khi niyen phitighim yil Galili mu. 22 Larep Hirodias shikasat wul duk bhi tam tam nmu, bhi lang enn/ret nyit Herod khi mhizep khi muk mu. Long fe sat nlarep fe na, "Yi tal mehbih ndhi yi phi dem fe bhi an nphe shin nyi." 23 Tuwarshini nnih nna, "Duk bih ndhi yi tal phi nih, an nphe shin fe nyi, ndhi khi wul nbot yil fhin wuyon." 24 Bhi yaghal put khibang bhi sat nnighin dih nna, "A tal a meh phi/nder muk eh?" Bhi sat nna, "A kha Jon ngu Baptisma." 25 Bhi lala bhi waji nder long fe, bhi tal phi muk, nna, "An phi dem nghi ghi shin n'an, khidetsi, kha Jon ngu Baptisma khi kha pirenti nmu shep." 26 Duk khi ndhi bih si shwal long fe, bhi bis ndhi khi niyang shin bih ndhi tal nphe ndhi tuwarshini gwe yaghal khi mhizep ndhi mu wul sih-peh nnih. 27 Bhi long fe lang lep nmeh khinshong ndhi nih phi tap nih yaghal sat nnih nphe mwan waji khi kha Jon. Ngu tap phi-peh mwan yaghal gap kha muk nlihkwoo ndhi nih dih. 28 Waji khi kha fe khi ka pirenti yaghal shin nlarep fe, bhi larep fe shin nnighin dih. 29 Ndhi shar shiit khi muk mu khiling bih si, bhi mu mwan mu mang kum muk mu mwan mu den khisher. 30 Shar shiit/jep kam khi Jesu mu wakwul nder muk bhi mu sat khiding bih ndhi du shin yaghal du kam nnih. 31 Bhi sat nmu, "Gu yaa mempeh ndhi nnot ngurum mu bhi gu lapnook leh." Nphe ndhi bwer mu phi mwan shin wakji, bhi mu kat peh nphe sih-sih ma. 32 Bhi mu del nbut shii am mu yaa mempeh mu lighim shikasut. 33 Dang bhi mu naa mu phi del bhi gurum mu mwan ndhi a mu, yaghal mu sho khider mu nkwak khi dighinyil fe khiding, bhi mu rho dih dangshe mu dih. 34 Ndhi ji mu rho phi kong fe, bhi nih naa du gurum mu bwer yaghal naa-jel khi mu nphe ndhi mu deh a khipe tihm mu nnot ngu tap/naa mu si. Asi bhi yaa kam bih mu bwer nmu. 35 Ndhi fe del, bhi shar shiit/jep kam khi muk mu ji nder muk mu sat Mu na, "Peh si a peh ndhi wen nnot gurum mu shin bhit fe del gwe. 36 Ghi shen mu shin wak deh nmu mwan yaa njep yil wu diyen mu nphe se'et membi nmhikasut deh nmu sih dih." 37 Dang bhi lap nmu nna, "Gun gu shin membih nmu sih." Mu sat nnih, "Mun nphe mwan se'et a biredi nmu denarii yakgurum sar yaghal mu shin nmu sih dih a?" 38 Sat nmu, "Gun a khi ghil mu dang mhi biredi eh? Mwan gu naa." Ndhi mu mwan mu man, bhi mu sat nna, "Ghil biredi mu paat khi sherep mu vhil." 39 Bhi nih lhi tiit ngurum fe mu duk-duk deh nmu yak pehtong njep song-soghol mu khishak khikha dem. 40 Mu nyil nbut jep song-soghol mu khishak; song-soghol nmhi gurum yakgurum paat paat yaghal yakgurm vhil vhil khi sar mu. 41 Bhi ir ghil biredi mu paat khi sherep mu vhil fe, yaghal ndhi naa peh khitingNaan bhi shin plant nNaan yaghal tarrap ghil fe bhi shin nshar shiit/jep kam fhini mu deh nmu shin der ngurum mu dih. Shin koo sherep vhil fe khinar mu khiding. 42 Khiding khi mu sih mak ndhi mu ighil khi nih. 43 Mu shak kop krom/bot biredi fe mu, wul nkhishak sar po vhil shin khi bot/krom sherep fe duk. 44 A gurum mu yakgurum paat yit sar yit paat (5,000) ndhi mu sih ghil biredi fe mu. 45 Dih wai bhi lhi nshar shiit/jep kam fhini mu rho nbut shii am deh mu taa ntighim nin nphe wakya nkwang ndhi si, nkwang Bethsaida, yaghal bwot du gurum fe mu deh nmu wak dih. 46 Ndhi mu wak, bhi nih yaghal kaa khiting npang nphe dang phi Naan. 47 Kansighin taa, bhi shii am fe wulkus khi naar kong wuyon fe, bhi deh nmehshin khi tighin. 48 Bhi nih naa mu phi daar khi kam tung shii am fe, nphe ndhi vivit fe nih phi dem khi mu ma. Khipe karfe feer ndhi lhipar si bhi yaghal mwan nder mu, nih phi mwan khika am fe, bhi nih phi dem del phi mu. 49 Dang bhi ndhi mu naa nih phi mwan khika am kong wuyon fe, bhi mu naa a khipe ndhi a mhimiling si yaghal mu fwa orr, 50 nphe ndhi mu naa nih bhi mu lwaghat. Lala bhi sat bhilip nmu yaghal sat nmu nna, "Gu nok lughut si! A an. Tap nbhi gu lwaghat ma!" 51 Nih yaghal rhi ndighin shii am fe a wu khime khi mu, bhi vivit fe dar. Bih fe fii-po nmu bwer. 52 Nphe ndhi mu man phishi biredi fe ma. Dang bhi, bhizung mu muut. 53 Ndhi mu tikkha, mu ji nyil Gennesaret yaghal mu bwaghat/den shii am fe dih. 54 Ndhi mu pwat nbut shii am fe, bhi gurum mu bes man nih, 55 bhi mu sho shipe-shipe khi yil fe duk-duk yaghal mu yaa wakji khi niyen gok mu khikha kharam fut khipe me kwang ndhi mu khiling ndhi nih dih. 56 Meh peh ndhi kat rhi dih khi jep yil, ma bhi yil wu nan mu, kot a khi yil fe duk-duk o, bhi mu khi lhi niyen gok fe mu nlihtuk/nkasuwa. Mu dang phi muk deh nnih yit nmu bhim phi leh khi muk dih, bhi gurum mu bwer ndhi mu bhim nih bhi shuwal khi mu lat.