1 Mu mwan mu kam nkwang wu dik shi kong wu yon fe, ndhi nkwang yil Geraseries. 2 Ndhi Jesu nih phi put nbut shii am fe, bhi lala bhi meh gwo shi tong put khipe khsiher ndhi nih khi riin wubis. 3 Gwo fe tong khi tong a dih khipe khisher fe mu. Meh gwo kiye/mak dang nih, mak ma bhi a khi ngwaghar. 4 Mu bwaghat nih yit bwer khi teng khi ngwaghar. Bhi kwap ngwaghar fe mu kwet-kwet shin kos teng fe. Meh gwo khi bal ndhi mak dhin nih ma. 5 Nbut lhipar khi puus bhit shi bhit nnaar khisher fe khi pang fe mu, bhi nih phi wet nwal shin gos/kwap shin khi pang wu aghas. 6 Ndhi naa Jesu njong, bhi sih waji nder muk yaghal kurum ntighim muk. 7 Nih wal khi dighil nin bal bal, "A meh khat an khi ghi eh, Jesu, Lah Nda Naan Wuyon Khiding ndhi Khiting eh? A dang ghi nphe Naan khi kha-shin, ghi nok shin jel n'an si." 8 Nphe ndhi nih tong phi sat nnih nna, "Put nbut gwo fe, ghi riin wubis." 9 Yaghal tal shi phi muk, "Sihm ghi a weh?" Bhi lap nnih, "Sihm nih a Legion, nphe ndhi mun bwer." 10 Yaghal shin wet a dang/dwak phi muk det yak khi shen dun shin pwat nkwang yil fe ma. 11 Dih bhi meh du alede mu dih phi sih-sih fut dih shi bhut dhighir, 12 bhi yaghal mu dang nih, mu na, "Ghi lep mun shi yaa nbut alede fe mu; deh nmun rho nbut mu dih." 13 Bhi yit nmu; riin wubis fe mu pwat yaghal mu rho nbut alede fe mu, bhi yaghal mu sho sam shi peh sam nbut kong wuyon, ndhi alede mu wul dubu vhil ndhi mu rho n'amnighin kok mu del khi mu. 14 Bhi niyen ndhi mu phi shin sih n'alede fe mu shoo yaghal mu wak mu sat bih ndhi taa dih khi yil fe, bhi gurum mu mwan deh nmu naa bih ndhi taa dih. 15 Bhi mu ji nder Jesu yaghal mu naa gwo ndhi dok nih khi riin wubis fe, gwo ndhi dok Legion nbut muk, khi tong dih, khi leh nshin yaghal nbut enn nih; bhi lughut tih mu. 16 Mu/niyen ndhi mu naa bih ndhi taa khi gwo ndhi dok khi riin wubis fe mu sat ngurum mu duk-duk bih ndhi taa, yaghal shin mu sat bih ndhi taa khi lede fe mu. 17 Bhi mu oghom dang nih deh nnih yit lot-yil fut dih. 18 Ndhi peh rhi nbut shii-am fe, bhi gwo ndhi riin wubis dok bhim nih fe dang phi Jesu deh nnih kot nder muk dih. 19 Dang bhi Jesu yit peh nnih ma, bhi sat nnih nna, "Ghi waya khipang fhik khi wu mii ghi mu yaghal ghi sat bih ndhi Nda Jesu shin nghi nmu, khi ndhi naa jel fhik." 20 Ndhi a si bhi del yaghal yaa sat/tiit bih ndhi Jesu shin njin khi yil Decapolis, bhi gurum mu duk-duk mu naa bih fii-po. 21 Khidetsi ndhi Jesu takah nkwang ndhi pwon si, nbut ndighin shii am fe, bhi du gurum mu bwer mu neer nih den khinar, nphe ndhi nih phi kong wuyon fe. 22 Bhi memeh nnaar niyen phitighim lihNaan fe mu, ndhi sihm muk a Jairus, ji, bhi ndhi naa nih, bhi krum nyil khi shii muk. 23 Bhi dang phi muk/dwak shizak, nih phi si na, "Larep nih wuleh wulkus nphe muut. A dang phi ghi, ghi ji ghi lang/den sar ghi khi kha muk deh nih kaham dih. 24 Bhi yaghal mwan nder muk, bhi du gurum mu bwer mu mwan khi dangkong muk shin mu mwan kus-kus khi nih. 25 Dih nbhi si bhi meh mat dih ndhi tong tighim phi del nnih nphe yii sar po/ka vhil. 26 Shu jel bwer nsar niyen shiit enn mu shin tih shaghal fhit duk-duk, bhi ndhi yeh khi kat kaham bhi nih a phi sihkhit yon det. 27 Ndhi khiling wul khi Jesu, bhi tong ji ndangkong muk nnaar du gurum mu yaghal bhim leh khi muk. 28 Nphe ndhi sat nna, "Kat a bhim a phi leh khi muk det, bhi an nphe kat kaham." 29 Ndhi bhim nih, bhi del khi tighim fe dar, yaghal khiling shisat ndhi kaham kat dih nkha wula ndhi shu. 30 Lala bhi Jesu khiling ndhi bal put nshin si. Bhi viling nbut du gurum fe yaghal sat na, "A weh bhim leh fhin eh?" 31 Jep kam/shar shiit khi muk mu sat nnih, "Ghi naa du gurum si mu tarang shak neer ghi, bhi ghi si na, 'A weh bhim an eh a?'" 32 Dang bhi Jesu viling naa peh deh nih naa kot a weh bhim jin oh. 33 Mat fe, ndhi man bih ndhi taa khi dih/kat dih, bhi lughut shin da'am. Ji bhi phitaa ntighim muk yaghal sat zen fe nnih khiding. 34 Jesu sat nnih nna, "Larep, shinzeen fi a nih shin kaham nyi. Yi mwan bih nzughum yaghal yi kat kaham nkha shuwal fi." 35 Ndhi nih phi lap bhilip, bhi pak gurum mu tong nder ngu phitighim lihNaan mu ji, mu phi si na, "Larep ghi muut. Shin ghi phi dampeh ngu kam a nphe meh?" 36 Dang bhi ndhi Jesu pan khiling bih ndhi mu sat, bhi sat ngu phitighim lihNaan fe nna, "Ghi nok lughut si. Ghi shinzeen det." 37 Dem ndhi meh gurum khi shinder nih ma, kat a Pita/Bitrus, khi Jamis, yaghal Jon, emnighin Jamis ma. 38 Mu rho lih ngu phitighim lihNaan fe bhi naa gurum mu phi bhilip-kuut bwer; mu phi err shin mu phi fwa orr du bal-bal. 39 Ndhi rhi nlih fe, bhi sat nmu na, "A meh lhi deh gun ntughurnung dih shin gun phi err eh? La fe muut ma, nih a phi saam det." 40 Mu shwar nih. Dang bhi lhi nmu khiding mu pwat khibang yaghal mang ndhi nda la fe khi nighin fe khi niyen ndhi mu nder muk, bhi mu rho kam khipe ndhi la fe nih dih. 41 Mang sar la fe bhi sat nnih nna, "Talitha koum!" ndhi kat mu viling bhi nih phi si na, "Larep wu-leh, a sat nyi, yi yaghal khiting." 42 La-la bhi larep fe yaghal khiting bhi mwan-mwan (nphe ndhi wul yii sar po vhil). Dih bhi fii-po shin lhi app-po nmu bwer. 43 Bhi sat nmu bal-bal tap nmeh gwo khi'n nman bih ndhi taa ma. Bhi yaghal sat nmu deh mu shin membi nnih sih dih.