1 Shin a si duk bhi yaa kam-kam shi eskohop Kong wuyon, bhi du gurum mu bwer mu nerr nih shighir-kaat. Rhi nbut meh shii shi ndhi nbut kong wuyon fe, yaghal tong nbut fe. Du gurum fe mu duk-duk mu dih phi kong wuyon fe. 2 Kam bih nmu bwer nbut sihmbhilip, shin nbut kam khi muk, bih si a bih ndhi sat nmu. 3 "Gu khiling, ngu marr put mwan nphe kop sih fin. 4 Ndhi nih phi kop-kop, pak sherem sih fe mu fuu/phidik khi yar, bhi yer mu wul mu dighin sherem sih fe mu. 5 Pak sherem sih fe mu fuu/phidik khi ka yil ndhi khi pang, peh ndhi khi yil bwer ma. Lala bhi mu beh, nphe ndhi mu kat yil ndhi jong peh ma. 6 Dang bhi ndhi puus kaa, bhi mu shaan, shin nphe ndhi mu khi seen ma, bhi mu fiya. 7 Pak sherem sih fe mu fuu/phidik khinaar tihng irr mu. Tihn irr fe mu nan bhi mu dwat mu, bhi mu la meh lah ma. 8 Pak sherem sih fe fuu/phidik nbut yil wuret yaghal lihng lah ndhi nih phi yon, bhi pak mu lala wul yagurum khi sar si, shin pak wul yakgurum kun, yaghal pak yakgurum paat." 9 Bhi sat nna, "Meh gurum ndhi nih khi kom, bhi yit nnih khiling!" 10 Ndhi Jesu deh nmehshin, niyen nhdi mu kus khi nih a wukhime khi wu sar po vhil mu si mu tal phi muk nphe sihmbhilip fe mu. 11 Bhi sat nmu, "Mu shin bih ffipo khiting khi Naan ngun. Dang bhi niyen ndhi mu khibang bih mu duk-duk a nbut sihmbhilip mu, 12 nphe deh kat mu naa, eh mu naa, dang bhi mu naa ma, yaghal kat shin mu khiling, eh mu khiling, dang bhi mu man ma, ma bhi mu khi viling yaghal Naan khi kon khi nih nmu." 13 Bhi yaghal sat nmu, "Gun gu man kha sihmbhilip fe ma a? Shin anang deh gu man kha duk-duk wu kwa sihmbhilip fe mu dih eh? 14 Ngu maar ndhi kop sherem sih fin fe a nih a gwo ndhi kop bhilipNaan. 15 Mhisi mu a ndhi mu fuu phi kom yar si, khi peh ndhi mu kop bhilipNaan dih, dang bhi ndhi mu khiling bhilip fe si, bhi Sharfom/Shetan ji lala bhi dwan bhilip ndhi mu kop nbut mu fe nsar nmu. 16 Mhi si a ndhi mu kop mu khi kha yil ndhi khi pang, ndhi, kat mu khiling bhilip fe, bhi lala bhi mu lap khi ret-nyit. 17 Mu khi sen nsih-sut ma, dang bhi mu khi moghor a leh det. Deh kat wula ma bhi shujel taa nphe bhilip fe, bhi lala mu khi pwadhik. 18 Wu kwa fe mu a ndhi mu kop mu khinar irr. Mu khiling bhilip fe, 19 dang bhi tang khi yil, khi gwampeh khi bihlong, yaghal dem khi bih nkwa mu rho nbut mu yaghal mu dwat bhilip fe, bhi lah meh lah ma. 20 Bhi ndhi mu kop mu nbut yil wuret a niyen ndhi mu khiling bhilip fe yaghal mu lap, bhi mu beh sih-yagurum khime khi sar, ma bhi yakgurum yit paat met nbih ndhi mu kop." 21 Jesu sat nmu, "Gu del khi pitila ndighin lih a nphe den nih nbider khishak a, kot a nbider peteer bhiin eh? Gu del khi nih bhi gu den nih a khi petong pitila khiting. 22 Nphe meh bih a wusok ndhi mu khi man ma, shin meh bih a wusok/biya ndhi khi wen nnot nput khibang ma. 23 Kat meh gwo ndhi nih khi kom nphe khiling, bhi deh nnih khiling dih!" 24 Sat nmu na, "Gu lhi enn gu khi bih ndhi gu khiling, nphe ndhi bih kam-peh ndhi gu kam khi nih, mu nphe kam ngun a khini, shin mu nphe den kwa shi mak. 25 Nphe ndhi bih ndhi gurum khi nih, mu nphe shin wu kwa nnih, yaghal gwo ndhi wen nnot nih, mu khi dwan la bih ndhi shin nih khi nih." 26 Yaghal shin sat, "Khiting Naan deh a khipe meh gwo shi ndhi kop sih nyil si. 27 Khi taa nsaam nlhipar shin yaghal npuus, yaghal sih fe beh shin nan, bhi nih khi man ndhi kot a nan eh ma o. 28 Yil fe phi beh sih shikha sat: nshe bhi a gal fe, bhi kom fe, bhi yaghal sih ndhi kaa dih nkom fe. 29 Kat sih fe nung bhi nih lala khi lep khi jem, nphe ndhi taar diip sih wul." 30 Yaghal shin sat na, "A shishik meh ndhi mu kam khiting Naan eh, kot a meh sihmbhilip ndhi neh ndhi mu shin shiit khi nih kam nih eh? 31 Nih a khipe lah koon si, ndhi, kat mu kop nih, a wu kat ntighim ih-sih mu duk-duk khi yil. 32 Dang bhi, kat mu kop nih, bhi yon met ngokshi tihng mu nmaar fe, yaghal khi pwat khi song-soghol wu nan mu, ndhi yer khiting mu khi lihng lih fut dih nrin khi muk." 33 Khi sihmbhilip mu bwer khipe ndhi si bhi sat bhilip nmu, bwer ndhi khi shin man nmu, 34 yaghal khi sat meh bih nmu nnot sihmbhilip ma.Dang bhi ndhi nih nmehshin, bhi pyan bih fe duk-duk nshar shiit finin mu. 35 Par nih fe, ndhi kansighin taa, bhi sat nmu, "Mu mwan mu kam nkwang ndhi si." 36 Bhi mu yit du gurum fe mu dih, mu mang Jesu nder du, khipe ndhi nih dih, nbut shii am. Wu kwa shii am mu dih ndhi mu phi mwan a wukhime khi nih. 37 Dih det bhi meh kohom wu bal-bal yaghal khi am wu bal phi rho nbut shii am fe ndhi lhi shii am fe wulkus ngam khi am. 38 Dang bh Jesu shikhashin nih dih nbhider shii am fe, phi saam khi kha bih peteer. Mu mii nih, yaghal mu sat nnih mu na, "Ngu Kam, shuwal nghi ndhi mun nphe dwam ma a?" 39 Bhi yaghal khiting, biyal kohom fe, yaghal sat nkong fe, "Shaghap! Yi dar shaghat!" Bhi kohom fe dar, bhi yaghal peh tong shaghat. 40 Bhi sat nmu, "A meh lhi deh gu lwaghat dih ye? Khidetsi bhi gun khi shinzeen ma a?" 41 Lughut gam but mu yaghal mu sat nshak, "A weh si eh, ndhi kohom khi kong wu yon mu khi khiling nnih eh?"