Ep fe 15

1 Mbhit-mbhit, bhi niyen shiit Naan wu nan fe mu ka'at awukhime khi daskaham fe mu yaghal niyen man ran mu khi niyen phitighim mhi Yahudawa fe mu duk-duk. Bhi mu bwaghat Jesu yaghal mu lap nih del khi nih. Mu shin nih Bilatus. 2 Bilatus tal phimuk nna, "A ghi a Long Yahudawa mu ah?" Piring nnih nna, "A ghi ghi sat a si." 3 Daskaham niyen shiit Naan fe mu phi ji khi nvhir diyel mu nkha Jesu. 4 Bilatus shin tal phimuk, "Ghi piring bhilip fe ma ah? Ghi naa nvhir diyel/bhilip mu ndhi mu phi ji khi nih khikha ghi ma ah!" 5 Dang bhi Jesu kudi khi lap bhilip nBilatus ma, bhi bih fe fii-poo nnih. 6 Dih bhi tong nbhit ret nyit sih-peh fe, Bilatus tong khi bwot meh gurum ndhi nlih-kwo, gwo ndhi mu wal a nih. 7 Dih nbhisi nder niyen ruwang mu nlih-kwo fe, khinaar niyen tihkha mu ndhi mu yak mu nphe ruwang, bhi a meh gurum ndhi sihm muk a Barabbas. 8 Du gurum fe mu ji nder Bilatus bhi mu yaa sat nnih deh nnih shin ndun khipe ndhi tong khi shin nmu nyii ndhi mu del si. 9 Bilatus piring nmu nna, "Gun phi dem an a shin Long Yahudawa mu ngun ah?" 10 Nphe ndhi man ndhi a nphe tihlhik a si deh niyen nan shiit Naan mu shin Jesu njin dih. 11 Dang bhi niyen nan shiit Naan fe mu kar du gurum fe mu deh nmu wal bwot Barabbas dih bul. 12 Bilatus shin piring nmu nna, "Bhi a shin a meh khi Long Yahudawa fe mu ye?" 13 Bhi shin mu fwa orr, "Kah nih shi shep!" 14 Bilatus sat nmu, "Shin a wubis ndhi ne ye?" Dang bhi shin mu fwa orr bal-bal maa wuye, "Kah nih shi shep." 15 Bilatus phi dem shin bih ndhi khi piya bhizung du gurum fe mu, bhi bwot Barabbas nmu. Bwap Jesu yaghal shin nih nmu deh mu kah nih dih. 16 Soja/shii-tighin mu lap nih shin kam ndighin nar-kom fe (ndhi a nih a peh wuyon khi gwamnati), yaghal mu yong gokshi soja/shii-tighin fe mu duk-duk. 17 Mu den meh biyat-wup nshik Jesu, yaghal mu lam tihng irr-ass mu shikhit khipe zung-kha bhi mu lep nnih. 18 Mu yaa tal nnih bhi mu na, "Mu wap/tal ghi, Long Yahudawa mu!" 19 Mu shit kha mu khi dughul yaghal mu bwak zel khikha muk. Mu ghim khi fhirim du ntighim muk tongna dun phi dhik a yil nnih. 20 Ndhi mu tet nih, bhi mu shang biyat fe nshik muk yaghal mu lep leh khimuk nnih, bhi mu pwat khi nih khibang deh nmu kah nih shi shep dih. 21 Mu lhi tiit nmeh ngu del-yar shi ndhi tong a nmeh yil deh nnih mang shep wula khi Jesu dih, sihm muk a Saminu Bakurane nda Iskandara mu khi Rufus. 22 Soja/shii-tighin mu wakji khi Jesu nmeh peh ndhi mu khi yong a Golgota (ndhi phishi fe a, "Peh Es-kha"). 23 Mu shin am la-tihng ndhi mu riyep khi ndhighin-tihng, bhi niyang shu fe. 24 Mu kaa nih yaghal mu ko leh khimuk mu kon pel deh nmu naa yar ndhi du kat gokleh fe khinaar soja fe mu. 25 A teer wu kun ndhi mu kaa nih. 26 Mu ran-ran diyel ndhi mu gap khikha muk, "Long Yahudawa mu." 27 Mu kaa wat mu vhil nder muk, nme-meh nsar dasih khimuk yaghal wukwa nsar kul. 28 Bhilip khi Naan gam ndhi sat nna mu khi wum nih a wukhime khi niyen niyang waar mu. 29 Niyen del yar mu fhilip nih, mu tat kha du, muna, "Aha! Ghi ndhi ghi lhi ghi righip lihnaan yaghal shin ghi dhik nih nteer kun si, 30 ghi put/bhirip khi kha sat khi mhi yaghal ghi sam khikha shep fe dak!" 31 A si fe duk bhi daskaham niyen shiit Naan fe mu tet nih khinar sut, awukhime khi niyen man ran mu, bhi sat nna, "Nih bar gokshi gurum mu, dang bhi mak bar khashin ma. 32 Yit deh nnih Kristi, Long Isarila sam khidetsi khikha shep si, deh nmun mu naa shin mu shinzen dih," shin niyen ndhi mu kaa mu awukhime khi nih mu tet nih. 33 Ndhi awa wu peme wul, peh kwo duk-duk khi yil fe mwan ji rhi awa wu pokofar. 34 N'awa mu pokofar fe Jesu wal khi dighil bal-bal, "Eloi, Eloi, lama sabachthani?" ndhi phi si na a, "Naan fhin, Naan fhin, a meh lhi deh ghi yit an dih eh?" 35 Pak niyen ndhi mu khi diyam nbhisi mu khiling bhilip khimuk yaghal mu na, "Gu naa, nih phi yong-peh nIliya." 36 Meh gurum si mwan, dhik am wu-dwang nsoso, lep khikha dughul, yaghal shin nnih deh nnih shu dih. Gwo fe nna, "Nmun mu naa kot Iliya khi ji sam khi nih dih oh." 37 Bhi Jesu wal khi dighil wu bal bhi muut. 38 Labule ndhi ndighin lihnaan fe bak-nar vhil tong khiting sm wul nyil. 39 Ndhi baga soja/shii tighin ndhi khi dar yaghal naa ndhi Jesu muut a si, bhi sat nna, "A zen gwo si a La Naan." 40 Shorop mu dih duk ndhi mu phi naa-peh pan njong. Khinar mu a Maryamu/Mary Magdaliya, Maryamu/Mary (nighin Jamis wu leh khi Joses), yaghal Salomi. 41 Ndhi nih nGalili bhi mu mwan nder muk yaghal mu shin shiit nnih. Shorop nkwa mu bwer mu mwan nder muk duk shin yaa nUrushalima. 42 Ndhi kansighin taa, nphe ndhi a Par Puus-dak-peh, ndhi a, bhit deshe ndhi Puus Lapnok dih, 43 Yusufu ndhi a ngu Arimatiya ji dih. Nih a gurum nshi mu phi shin yon nnih nbut daskaham yil mu, ndhi nih phi tong naa wul khi Naan. mwan yaa nder Bilatus nnot lughut yaghal tal nphe mang kum Jesu. 44 Bilatus fii-poo ndhi Jesu muut gwe; bhi yong baga soja fe yaghal tal phimuk kot Jesu muut oh. 45 Ndhi Bilatus khiling nder baga soja fe nna Jesu muut, bhi shin kum muk nYusufu. 46 Yusufu se'et malti/zal-wum. mang nih shin sam khikha shep fe, maar nih khi malti/zal-wum fe, yaghal den nih nbut tukhun ndhi mu ok nih a nnar lar/pang. Bhi bhiring pang oghot phi tughun fe khi nih. 47 Maryamu/Mary Magdaliya mu khi Maryamu/Mary nighin Joses mu naa peh ndhi mu wum Jesu dih.