1 Khidetsi deh teer vhil deh she bhit Taakha khi sih-peh Biredi ndhi nnot yisti. Niyen shiit Naan wu nan mu khi niyen man ran mu phi tang yar ndhi du shin deh ndun du yaa Jesu nnabiya yaghal du tih nih dih. 2 Nphe ndhi mu phi sat mu na, "A nbut teer retyit sih-peh fe ma, yak bah khi khi nji khi rwang khinar gurum mu." 3 Ndhi Jesu nih Betanya lih Siman ndhi nih a tihloghom, ndhi pan ghim khikha pehtong, bhi meh mat ji nder muk khi la tulwa khi moor ndhi khi taghas wuret ndhi khi shaghal bwer, nih a wuret. Piyan tulwa fe bhi dhik moor fe nkha muk. 4 Dang bhi pak mu dih ndhi tughurnung yaa mu. Mu lap bhilip khinar sut yaghal mu na, "A meh a phishi tihkok khi-bih si ye? 5 Moor khi taghas si ye mu khi se'et khi nih nhaghal ndhi met ndinari yakgurum sar po paat, yaghal mu shin nniyen wu piya mu." Bhi mu gwakjighir nnih mat fe. 6 Dang bhi Jesu sat nna, "Gu yit nih dih. A meh lhi deh gun phi jaghar nih dih ye? Shin a bih wuret ret n'an. 7 Gun khi niyen wupiya mu ndergu shi-bhit shi-bhit, bhi kat meh puus ndhi gu dem bhi gu shin wuret nmu, dang bhi gu kat an shi-bhit shi-bhit ma. 8 Nih shin bih ndhi man shin fe: nih tighir moor si n'an a nphe wum fhin. 9 Zen a sat ngun, meh peh ndhi mu kop bhilipnaan dih khi dighinyil si duk-duk, bhi mu khi lap bhilip khikha bih ndhi mat si shin, nphe diye khi nih." 10 Bhi Yahuza Iskarioti, nmeh khinar wu sar po vhil fe mu, del mwan nder niyen shiit Naan wu nan mu deh nnih shin nih nmu dih. 11 Ndhi niyen shiitnaan wu nan fe mu khiling, bhi ret nyit mu yaghal mu na du shin shaghal nnih.Bhi yaa tang yar deh nnih shin nih nmu dih. 12 Par puus ndhi nshe mhi retyit biredi nnot yisti, ndhi mu phi gap t'him retyit mhi Takaa, bhi shar shiit khi muk mu sat nnih mu na, "Ghi phi dem deh nmun mu dak peh a nneh, deh nghi ghi sih retyit Takaa dih eh?" 13 Lep jep kam/shar shiit fhini mu vhil yaghal sat nmu nna, "Mwan gu yaa ndighin nar yil fe, bhi meh gurum ndhi mang dihlang-am khi kat gun. Gu mwan nder muk. 14 Khipang ndhi rhi dih, bhi gu mwan gho rho ndighin nder muk yaghal gu sat ngulih fe, 'Ngu Kam nna, "Lih mhizep fhin nih a ne ndhi an nphe sih-sih retyit Takaa khi jep kam/shar shiit fhin mu eh?'" 15 Bhi khi nin meh baga lih khiting ndhi mu dak ret-ret gwe. Gu dak peh nmun dih." 16 Jep kam/shar shiit khimuk mu mu yighil mu yaa nnar ndighin-yil. Mu kat bih mu duk-duk khipe ndhi sat nmu si, yaghal mu dak peh sih-sih Takaa fe. 17 Ndhi kansighin taa, bhi ji khi wu sar po vhil fe mu. 18 Ndhi mu tong khipe sih-sih bhi mu phi sih-sih, Jesu sat nna, "Zen a sat ngun, nmeh gu ndhi mun phi sih-sih a wukhime nih nphe se'et khi an." 19 Duk-duk khi mu naa jel muk, yaghal khime-khime bhi mu sat nnih mu na, "Nphe zen a an ma?" 20 Jesu piring yaghal sat nmu na, "A nmeh khinar wu sar po vhil fe mu, ndhi nih phi lep ghil biredi nbut dah a wukhime khi an. 21 Nphe ndhi La Gurum khi mwan a khi bih ndhi bhilip khi Naan sat nkha muk si. Rap ngwo ndhi nphe se'et ki La Gurum si! Mangye dok mu lah nih ma." 22 Ndhi mu phi sih-sih, Jesu mang biredi, lhi wuret khikha fe, yaghal terep nih. Bhi shin nmu yaghal sat nna, "Gu lap ndhi-si. Ndhi-si a ghit shi-shik nih.' 23 Mang dah shu-am, shin plang, yaghal shin nmu, bhi mu duk-duk mu shu nbut fe. 24 Sat nmu nna, "Ndhi-si a tighim shwarshik fhin, tighim ndhi mu kon nphe gurum mu bwer. 25 Zen a sat ngun, an nphe shin shu am-tihng zak ma kat bah a par puus ndhi an shu nih a wu-pwo khiting Naan ma." 26 Ndhi mu lat mang tam, mu del kha nPang Olives. 27 Jesu sat nmu, "Duk-duk fuk nphe bwak khi ndangkong, nphe ndhi nih a wu-rhiran, 'An nphe shit ngu tap fe yaghal tihm fe mu khi fu shak.' 28 Dang bhi khidangkong ndhi a yaghal, bhi a del a mwan ntighim a waya nGalili." 29 Pita sat nnih, "Kat gurum mu bwak duk-duk, bhi wan nphe bah ma." 30 Jesu sat nnih, "Zen a sat nghi, nlipar si, deshe del-koh tokshik yit vhil dih, ghi nphe niyang an yit kun." 31 Dang bhi Pita sat, "Kat an nphe muut nder ghi, a niyan ghi ma." Mu duk-duk mu twarshut a si duk. 32 Ji mu rho nmeh-peh ndhi mu khi yong a Gethsemane, bhi yaghal Jesu sat njep kam/nshar shiit fhini mu, "Gu tong si deh an a dangphinaan dih." 33 Mang Pita, khi Jamis, yaghal Jon ndershin bhi yaghal doghom nin nhok ndhi jin njel khi leng jong-jong. 34 Sat nmu, "Se'en nih nbut shuwal, ndhi wul muut. Gu tong si yaghal gu tap peh." 35 Jesu ter kam ntighim leh, phitaa nyil, yaghal dangphinaan nna kat dem a khat, ye puus wuni khi del njin. 36 Sat nna, "Abba, Nda, khi ghi bhi bih mu khiding a wushi-shin. Ghi mang dah si shin-ba nkha nih. Dang bhi yit deh a nhok fhik katdel, ba a nman ma." 37 Bhin waji bhi kat mu phi sa'am, yaghal sat nPita, "Siman, ghi sa'am ah? Ghi mak tap peh nphe awa khime ma ah? 38 Ghi tap peh shin ghi dangphinaan yak ghi taa kam-en gurum. Riin phi dem fe, dang shop-shik zughum." 39 Shin del mwan dangphinaan, yaghal shin shiit khi sihm-bhilip wuni fe mu. 40 Bhin waji nkwa bhi kat mu phi saam, nphe ndhi yit mu tighin khi saam yaghal mu man bih ndhi du sat nnih ma. 41 Waji nyit wu kun bhi sat nmu nna, "Gu kudi phi saam shin gun phi nhok ah? Mak a si! Puus/bhit fe gam. Gu naa! Mu se'et khi La Gurum nsar niyen shikbis mu. 42 Gu yighil khiting; mu del. Gu naa, gwo ndhi nse'et khi an wulkus." 43 Ndhi kudi phi lap bhilip, Yahuza, nmeh nbut wu sar po vhil fe mu, ji wul, bhi du gurum mu bwer mu nder muk khi shuk ngar mu khi dughul nkur mu, mu tong a nder niyen shiit Naan wu nan mu, niyen man ran mu, yaghal daskaham mu. 44 Khidetsi ngu se'et khi nih kam nmu, nna, "Meh gwo ndhi a oghom nih, a nih a gwo fe. Gu yaa nih yaghal gu del khi nih nsar niyen tap peh mu." 45 Ndhi Yahuza waji rhi, lala bhi ka nder jesu yaghal sat nna, "Rabbi," bhi oghom nih. 46 Bhi mu shin sar mu yaa nih. 47 Dang bhi nme-meh mu ndhi khi dar kus shang shuk ngwan fhini yaghal gap kom nmeh la-lep khi ngu shiit Naan wuyon fe. 48 Jesu sat nmu, "Deh gwu pwat si, nang ghi lhi gun nphe yaa a wat wuyon, khi shuk ngwan mu yaghal nkur nphe yaa an ah? 49 Ndhi dok a wet nder gu shi-bhi shi-bhit phi kam nlihnaan, bhi gu yaa an ma. Dang bhi gu shin ndhi si a nphe deh nbhilip khi Naan gam dih." 50 Duk-duk niyen ndhi mu nder Jesu mu yit nih yaghal mu sho del. 51 Meh dengmar, ndhi lep a leh biyat ndhi wup neer shin khi nih, nih phi mwan khi der Jesu. Ndhi niyen fe mu yaa nih 52 bhi yit leh fe dih si del ngum. 53 Mu lap Jesu mwan khi nih nder ngu shiit Naan wuyon. Niyen shiit Naan wu nan mu duk-duk, daskaham mu khi niyen man ran mu neer nder muk. 54 Khidetsi Pita mwan njong dangkong, jong-jong khipe naar-lih ngu shiit Naan wuyon fe. Tong nder niyen tap phi-peh mu, ndhi mu phi danwus. 55 Dih bhi niyen shiit Naan wu nan fe mu khi khiding niyen tokdiyel mhi Yahudawa mu phi tang langting khi kha muk deh nmu kat peh tih nih dih. Dang bih mu kat meh bih ma. 56 Nphe ndhi mu bwer mu lap langting-jol nkha muk, dang bhi khi ndhi a si bhi mu kat meh langting ndhi a zen ma. 57 Pak mu yighil khiting yaghal mu kos langting dung khi kha muk; mu na, 58 "Mu khiliing nih phi sat nna, 'A righip lihnaan ndhi mu dhik khi sar si, yaghal nbut teer kun bhi a dhik nkwa nnot nsar.'" 59 Khi ndhi a si bhi langting khi mu yaa ma. 61 Dang bhi nhok khi-t'hik shi lap meh bhilip ma. Bhi shin ngu shiit Naan wuyon fe shin tal nnih shin nna, "A ghi a Kristi, La Wuretkhinaan fe ah?" 62 Jesu nna, "A an fe; yaghal ghi nphe naa La Gurum bhit ndhi nih khi tong khi sar wu sih nmu bal shin wul nbut libhin mhi khitingnaan." 63 Ngu shiit Naan wuyon fe teh leh khimuk yaghal sat nna, "Shin mu wal a langting mu ndhi ne zak eh? 64 Gu khiling tihkok khi sihm Naan khi mih. A meh a leng fuk eh?" Mu niyang nih wai a nphe ndhi mu na gwar mak a tih det. 65 Pak mu doghom bwak zel khi kha muk shin mu oghot yit muk yaghal mu nass nih bhi mu na, "Ghi naa-peh khi kha!" Niyen shiit fe mu mang nih yaghal mu bwap nih. 66 Ndhi Pita nih nyil nbut naar-kom, nmeh larep shiit mhi ngu shiitnaan wuyon ji nder muk. 67 Naa Pita ndhi dar nphe dan wus, bhi naa nih kus-kus. Bhi sat nna, "Ghi ye a wukhime khi ngu Nazarene fe, Jesu." 68 Dang bhi shi-shik/niyang, nna, "A man nih ma shin a man bih ndhi yi phi sat fe ma." Bhi put rhi nnaar-kom lih fe. Bhi del-koh tokshik. 69 Dang bhi larep shiit fe naa nih bhi yaa sat ngurum ndhi mu khi direm dih, "Gwo si a nmeh mu!" 70 Bhi bhinshin niyang/shishik. Deh leh bhi niyen ndhi mu khi direm dih mu yaa sat nPita mu na, "Zen ghi a nmeh mu, nphe ndhi ghi a ngu Galili duk." 71 Bhi doghom fhilip shin shin shwar-shin nna, "A man gwo si ndhi gun phi lap bhilip nkha muk fe ma." 72 Lala bhi del-koh fe shin tokshik wu vhil. Bhi Pita leng/diye khi bhilip ndhi Jesu sat njin: "Dang deshe del-koh tokshik yit vhil, bhi ghi nphe niyang/shii an yit kun," bhi yaghal taa nyil bhi wal bis-bis.