Ep fe 13

1 Ndhi Jesu phi baa khipe lihnaan, nmeh khinar jep kam/shar shiit khimuk sat nnih nna, "Ngu Kam, ghi naa ndhiret pang si khi ndhiret lih si mu ah!" 2 Bhi sat nnih nna, "Ghi naa daskaham lih si mu ah? Meh pang khime nphe deh khikh nkwa nnot mu khi viling ma." 3 Ndhi tong khi dighir Pang Olives nkwang sar khi-tighin ndhi lihnaan dih, Pita, Jamis, Jon, khi Andarawus mu tal nder muk mbiya, 4 "Ghi sat nmun, bihsi mu nphe taa a penang eh? Mun nphe she naa a meh deh nmun mu man ndhi bih ndhi si mu wulkus nphe taa di eh?" 5 Jesu yaa sat nmu nna, "Gu tap niyak-niyak- yak- nmeh-gwo khi ngwam gun. 6 Bwer mu khi wul khi sihm nih yaghal mu na, 'A an a nih,' yaghal mu khi gwam gurum mu bwer. 7 Kat gu khiling bhilip liyak mu khi bhilip mu-na nka liyak, bhi gu nok dam/lughut si; a tiit nbih wuni mu taa dih, dang bhi lat fe wawul gwe ma. 8 Yil khi liyak yil, nkhan khi liyak nkhan. Yil khi sighin-peh mu bwer, shin nen khi taa bwer. Ndhisi mu a shwal sheh-la si. 9 Gu tong khisuk a wu-dhidak. Mu khi shin gun ntighim niyen diyel mu, mu khi nhass gun ndighin lihnaan. Gu diyam ntighim gwamna mu khi long wu nan mu nphe nih, khipe langtihng si nmu. 10 Dang bhi a tiit deh mu sat bhilipnaan wuret ngurum mu khi yil mu khiding dih. 11 Kat mu yak gun shin kam si nphe shin gun, gu nok shin leng khikha bih ndhi bhilip ma. Nphe ndhi npus wuni fe, bhi mu khi shin bih ndhi gu sat ngun; a gun gu lap bhilip ma, a Riin Wubang. 12 Emnighin khi shin emnighin nmu tih, yaghal nda khi shin la nih. Jep mu khi liyak nda du khi nighin du mu shin mu khi lhi nmu tiyo mu. 13 Gurum mu duk-duk mu khi niyang gun nphe sihm nih. Dang bhi gwo ndhi moghor wul nlat fe, bhi gwo fe khi kat bar. 14 Kat gu naa bih wu waar ndhi khi tihkok khipe dar si ma (yit ngu tang ran man), bhi yit niyen ndhi mu nJudiya mu sho wakya npang, 15 yit gwo ndhi nih khiting khi kha lih nok sam nyil wakham ndighinlih si kot a nphe mang meh bih shin-put si, 16 yaghal yit ngwo ndhi nmar nok wawul nphe mang leh fhin si. 17 Dang bhi rap nniyen ndhi mu khi la khi niyen ndhi mu phi shin yughur njep- mu nteer wuni mu! 18 Gu dangp-hinaan yak khi ntaa a lughun. 19 Nphe ndhi baga jel/wula, nkan ndhi sham taa gwe nshe ma, ndhi Naan dak yil fe, bhi a khidetsi, haiyo, ma bhi khi sham taa nkwa ma. 20 Kat bah a Nda Naan gap teer fe mu rwat/nbot ma, bhi meh gwo ndhi khi shik nphe bar ma. Dang bhi nphe nniyen ndhi mu bun/pwan mu, niyen ndhi taghat mu, bhi khi gap teer fe mu rwat. 21 Bhi kat meh gwo sat ngun nna, 'Gu naa, Kristi nih si!' ma bhi 'Gu naa, nih pwon si!' gu nok shin zeen si. 22 Nphe ndhi Kristi mhi dung mu khi niyen jagham/naa-peh khi kha mhi dung mu, mu khi wul yaghal mu shin bih fii-poo, nphe deh nmu gwam gurum mu dih, kat dem a khat, bhi khi niyen ndhi bun/taghat mu duk. 23 Gu tong khi suk a wu dhidak! A bhilip bih si mu ngun khiding dang deshe puus fe dih. 24 Dang bhi khidangkong wula/jel fe nteer wuni fe mu, bhi puus khi kwoo, tar khi shin pehbang ma, 25 zar mu khi tongkhiting pwadhik, yaghal bal ndhi khiting mu khi tung peh. 26 Bhi mu khi naa La Gurum phi wul nbut lhibhin khi baga bal khi yon. 27 Bhi khi lep jep lep fin mu yaghal khi kok gurum fhin mu ndhi bun/taghat lhi khishak ndighin gwo'ol mu feer, khi pehlang dighinyil ji lang khiting. 28 Gu kam sihmshik nder tihng kwoon. Kat bang tihng pwat yaghal doghom/yaa tang, bhi gu man ndhi tar-lhok wulkus. 29 Shin a si duk, kat gu naa bih si mu phi taa, bhi gu man ndhi wulkus, kus khi philih. 30 Zen, a sat ngun, nkhan gurum ndhi khidetsi mu khi del ma kat bih si duk-duk mu taa dang si ma. 31 Khitingnaan khi yil mu khi del, dang bhi bhilip fhin mu khi sham del ma. 32 Dang bhi nphe bhit wuni ma bhi teer wuni, meh gwo manma, khi jep lep khi Naan ndhi khitingnaan mu duk, ma bhi La fe, dang bhi a Nda fe det. 33 Gu tong nnot nsam! Gu naa peh a wuret shin gu dangphinaan, nphe ndhi gu man kot a penang oh ma. 34 Deh a khipe gwo ndhi del mwan-yit lin-nih yaghal den meh ngu shiit nphe naa lih fe, duk-duk khimu khi shiit dhik-dhik, yaghal sat ngu tap phi-peh tong khi enn nih. 35 Nphe ndhi a si gu tong khi enn gu, nphe ndhi gu man bhit ndhi ngulih nphe wawul ma; pak bhi ah nkansighin, kot a nnar lhipar oh, ndhi del-koo khi tokshik, ma bhi kot a phi-bhit oh. 36 Kat wul bhirit, bhi tap yak khi nkat gun nsaam. 37 Bih ndhi a sat ngun a sat a ngurum mu duk-duk: Gu tong khi enn-gu!"